ލާމަރުކަޒީ ގާނޫނު ބަޔާން ކުރަނީ ރަށުގެ ތަރައްގީއަށް ބޭނުންވާ ކަންތައްތައް ސަރުކާރާ ގުޅިގެން ކުރުމާއި، ރައްޔިތުންނަށް ބޭނުންވާ އަސާސީ އަދި މުނިސިޕަލް ހިދުމަތްތައް ފޯރުކޮށްދިނުންކަމަށް ހެންވޭރު އުތުރު ދާއިރާގެ މެމްބަރު އަހުމަދު އައިފާން ވިދާޅުވެއްޖެ އެވެ.
ބައެއް ރަށްތަކުގައި ސަރުކާރުން ކުރިޔަށް ގެންދިއުމަށް އިއުލާނު ކުރި ޕްރޮޖެކްޓުތައް ކުރިޔަށް ގެންދިއުމަށް އޮތް އެންމެ ބޮޑު ހުރަހަކީ، އިދިކޮޅު ކައުންސިލްތަކުން އެކަމަށް ހުރަސް އަޅަމުން ދިއުންކަމަށް އެންމެ ފުުރަތަމަ ވިދާޅުވީ ރައީސް ޑރ. މުހައްމަދު މުއިއްޒެވެ.
ޕީއެންސީގެ ޑޯޓުޑޯ ހަރަކާތުގެ ތެރެއިން ”ސަންގު“ އާއި ވާހަކަ ދައްކަވަމުން އައިފާން ވިދާޅުވީ، ރައްޔިތުންނަށް ބޭނުންވާ އަސާސީ ހިދުމަތްތައް ފޯރުކޮށްދިނުމަށާއި ރަށްރަށުގެ ތަރައްގީއަށް ސަރުކާރުން ކުރާ މަސައްކަތްތަކަށް ބައެއް އިދިކޮޅު ކައުންސިލްތަކުން އެކި ގޮތްގޮތުން ދަތިކުރަމުންދާ ކަމަށެވެ. މިގޮތުން ރަށްރަށުގައި އޭޓީއެމް މެޝިން ބެހެއްޓުމަށާއި ފުޓްސަލް ދަނޑުތައް އެޅުމަށް ބޭނުންވާ ބިން ހަމަޖައްސައިދިނުމުގައިވެސް ސިޔާސީ ބޭނުމަކަށްޓަކައި ހުރަސްއަޅަމުންދާކަމަށް އައިފާން ވިދާޅުވި އެވެ.
އައިފާން ވިދާޅުވީ ލާމަރުކަޒީ ގާނޫނު ބަޔާން ކުރަނީ ރަށުގެ ތަރައްގީއަށް ބޭނުންވާ ކަންތައްތައް ސަރުކާރާ ގުޅިގެން ކުރުމާއި، ރައްޔިތުންނަށް ބޭނުންވާ އަސާސީ އަދި މުނިސިޕަލް ހިދުމަތްތައް ފޯރުކޮށްދިނުމަށް ކަމަށެވެ. ނަމަވެސް ބައެއް ކައުންސިލްތަކުން ބަލަނީ ސަރުކާރު ޖަވާބުދާރީ ކުރުވަންކަމަށް ބުނެ ތަރައްގީގެ މަސައްކަތްތައް ހުއްޓުވޭތޯކަމަށް އައިފާން ވިދާޅުވި އެވެ،
އައިފާން ވިދާޅުވީ، ސަރުކާރުގެ މަޝްރޫއުތަކަށް ކައުންސިލްތަކުން ހުރަސްއަޅާނަމަ، ލޯކަލް ގަވަރމަންޓް އޮތޯރިޓީ (އެލްޖީއޭ) މެދުވެރިކޮށް އެ ބިންތައް ހޯދައިގެން ވެސް ރައްޔިތުންނަށް މި ސަރުކާރުން ހިދުމަތް ފޯރުކޮށްދޭނެ ކަމަށެވެ. އަދި ބައެއް ސިޓީ ކައުންސިލްތަކުން ރައީސުލްޖުމްހޫރިއްޔާގެ އޮފީހުން ފޮނުވާ ސިޓީތަކަށް އެއްވެސް ޖަވާބެއް ނުދީ ބޭއްވުމަށްފަހު، ފަހު ވަގުތު އެއީ ކައުންސިލުން ކުރި ކަމެއްގެ ގޮތުގައި ދައްކަން އުޅޭކަމުގެ ތުހުމަތު ވެސް ކުރެއްވިއެވެ.
ރައްޔިތުންނަށް ދިމާވެފައިވާ މައްސަލަތައް ހައްލުކޮށްދިނުމުގެ ހަގީގީ ވިސްނުން ހުރީ ހަމައެކަނި ޕީއެންސީގެ ކެންޑިޑޭޓުންގެ ކިބައިގައިކަމަށް ފާހަގަކުރައްވައި އައިފާން ވިދާޅުވީ، ސަރުކާރާ ގުޅިގެން ރަށްރަށާއި ސިޓީތައް ތަރައްގީކުރުމަށްޓަކައި ޕީއެންސީގެ ކެންޑިޑޭޓުންނަށް ވޯޓު ދިނުން މުހިންމު ކަމަށެވެ. ހާއްއްސަކޮށް މާލެ ސިޓީގެ މޭޔަރުކަމަށް ޕީއެންސީގެ ޓިކެޓުގައި ވާދަކުރައްވާ މޫސާ އަލީ ޖަލީލަކީ ރައްޔިތުންނަށް ހިދުމަތް ކުރުމުގެ ސާފު ވިސްނުމުގައި ނުކުމެ ހުންނެވި ބޭފުޅެއްކަމަށް އައިފާން ވިދާޅުވި އެވެ.
