ސިޔާސީ ގޮތުން ހިޔާލު ތަފާތުވާ ފަރާތްތަކުންވެސް ސަރުކާާރުގެ ފަޅިއަށް އެރުމަށް އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ގޮވާލައްވައިފިއެވެ.
ކޮންގްރެސް ޕާޓީގެ ތިނަދޫ ސިޓީގެ މާލޭ އޭރިއާ ކެމްޕެއިން އޮފީސް ހުޅުވުމުގެ ހަފްލާގައި މިނިސްޓަރ ޝަހީމް ވިދާޅުވީ ސިޔާސީ ހަލަބޮލިކަމުން ނެއްޓި ރާއްޖެ މިހާރު މިސްރާބު ޖަހާފައިވަނީ އަމާން ދިމާލަކަށްކަމަށެވެ. އެގޮތުން ގައުމު މިގޮތުގައި ދެމެހެއްޓުމަށް މަސައްކަތް ކުރަން ޖެހޭ ކަމަށާއި އެކަންކަން ހާސިލް ވާނީ ސަރުކާރުން ތާއިދުކުރާ ކެންޑިޑޭޓުންނަށް ވޯޓު ދީގެންކަމަށް ޝަހީމް ވިދާޅުވި އެވެ.
ޝަހީމް ވިދާޅުވީ ހާއްސަކޮށް ތިނަދޫއަށް ބެލިނަމަވެސް، އެރަށަށް ބޭނުންވާ ތަރައްގީވެސް ގެނެވޭނީ މި ސަރުކާރާއިއެކު ތިބެ ކަމަށެވެ.
ޕީއެންސީގެ ތިނަދޫގެ މޭޔަރ ކެންޑިޑޭޓަށް ތައުރީފްކުރައްވާ ޝަހީމް ވިދާޅުވީ އެއީ ވަރަށް ރަނގަޅަށް މަސައްކަތް ކުރައްވާނެ ބޭފުޅެއް ކަމަށެވެ. ޝަހީމް ވިދާޅުވީ ތިނަދޫގެ ތަރައްގީއަށް ރައީސް ވަރަށް ހާއްސަ ސަމާލުކަމެއް ދެއްވާ ކަމަށެވެ. ޝަހީމް ވިދާޅުވީ ކައުންސިލް އިނތިހާބު ކާމިޔާބު ކުރަން ޖެހޭ އެންމެ މުހިންމު ސަބަބަކީ ސަރުކާރުގެ ސިޔާސަތުތައް ތަންފީޒުކުރުމަށް ފަސޭހަވެގެން ދާނެތީ ކަމަށެވެ.
ޝަހީމް ވިދާޅުވީ ކައުންސިލް އިންތިހާބު ކާމިޔާބު ކުރަންޖެހޭނީ ބަޔަކަށް ފުރައްސާރަ ނުކޮށް، ރިވެތި ގޮތުގައި ކެމްޕެއިންކޮށްގެން ކަމަށެވެ.
