ޤާނޫނާއި ޚިލާފު އެއްވެސް ކަމެއް މިސަރުކާރަކުން ނުކުރާނެކަމަށް މައްޗަންގޮޅި އުތުރު ދާއިރާގެ މެމްބަރު އިބްރާހިމް މުހައްމަދު ވިދާޅުވެއްޖެއެވެ.
ސަންގުޓީވީގެ ”ހަބަރަށްފަހު“ ޕްރޮގްރާމްގައި ވާހަކަފުޅު ދައްކަވަމުން މެމްބަރު ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާއި މިސަރުކާރުގެ ކެބިނެޓުގެ އެއްވެސް ވަޒީރަކު ޤާނޫނުން ބޭރުން އެއްވެސް ކަމެއް ނުކުރައްވާނެ ކަމުގެ ފުރިހަމަ ޔަޤީންކަން މިއަދު ދިވެހި ރައްޔިތުންނަށް އޮންނާނެ ކަމަށެވެ.
އިދިކޮޅު ފަރާތްތަކުން ދައްކާ ވާހަކަތަކަށް ރައްދު ދެއްވަމުން މެމްބަރު ވިދާޅުވީ، އިދިކޮޅުން ކުރާ ތުހުމަތުތަކަކީ މިއަދު ރައްޔިތުން ޤަބޫލުކުރާނެ ވާހަކަތަކެއް ނޫން ކަމަށެވެ.
”ޤާނޫނާއި ޚިލާފު އެއްވެސް ކަމެއް މިވަގުތު ރާއްޖޭގައި މިވަގުތު މިއޮތް ސަރުކާރަކުން ނުކުރާނެ. އެއީ ކޮންފާރމް ކަމެއް،“ މެމްބަރު ވިދާޅުވިއެވެ.
ފްލެޓްތަކުގެ ކުލިން މާފުދިނުމާ ގުޅޭގޮތުން އިދިކޮޅުން ކުރާ ތުހުމަތުތަކަށް އިޝާރާތް ކުރައްވައި އިބްރާހިމް މުހައްމަދު ވިދާޅުވީ، ސަރުކާރުން ހަދާފައި ހުރި ފްލެޓުތަކުގެ ކުއްޔަށް މާފުދިނުމަކީ ސަރުކާރުގެ އަތްމަތީގައި އޮތް ކަމެއް ކަމަށެވެ. އަދި ދައުލަތުގެ ބެލުމުގެ ދަށުގައި ހުރި އިމާރާތްތަކާ މެދު ގޮތް ނިންމުމަކީ ސަރުކާރުން ކުރަންޖެހޭ ކަމެއް ކަމަށާއި، މިއީ އެއްވެސް ގޮތަކަށް އިންތިޚާބަކާ ދިމާކޮށް ކުރި ކަމެއް ނޫން ކަމަށްވެސް އޭނާ ވިދާޅުވިއެވެ.
މީގެ އިތުރުން މެމްބަރު ފާހަގަކުރެއްވި ގޮތުގައި، ރައީސުލްޖުމްހޫރިއްޔާގެ ރިޔާސީ ވައުދުފުޅުތައް ރައްޔިތުންނަށް ފެންނާނެހެން ފޮތެއްގެ ސިފައިގައި ޕްރިންޓްކޮށްފައިވުމަކީ ރައީސްގެ ނިޔަތް ސާފުކަން ހާމަވާ ކަމެކެވެ. އެހެންކަމުން، އިދިކޮޅު ފަރާތްތަކުން މިކަމުގައި ތުހުމަތު ކުރުމުގެ އެއްވެސް ފުރުސަތެއް ނެތް ކަމަށް އޭނާ ވިދާޅުވިއެވެ.
މެމްބަރު މިހެން ވިދާޅުވެފައިވާއިރު، މާލެ ސިޓީގެ ސިނަމާލެ އަދި މާލޭހިޔާ ފްލެޓްތަކުގައި ދިރިއުޅޭ ފަރާތްތަކުގެ ކަންބޮޑުވުންތަކަށް ހައްލު ހޯއްދަވައިދެއްވުމުގެ ގޮތުން، އެ ފަރާތްތަކަށް 100,000 ރުފިޔާގެ ޚާއްޞަ އިނާޔަތެއް ދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދާދި ފަހުން ވަނީ ނިންމަވާފައެވެ.
