ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވަޢުދުފުޅާ އެއްގޮތަށް، 1447 ވަނަ އަހަރުގެ ބަރަކާތްތެރި ރަމަޟާން މަހަށް ކޮންމެ ގޭބީސީއަކަށް ސަރުކާރުން ދޭ ރޯދަ ހަދިޔާ، މަސްދަޅު ކޭސް ދޫކުރާނީ ރޯދަ މަހުގެ 15 ވަނަ ދުވަހާ ހަމައަށް ކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.
ވަޒީރު އާދަމް ޝަރީފް ވިދާޅުވީ، މާލޭ ސަރަހައްދުގައި މިހާރު މަސްދަޅު ކޭސް ދޫކުރަމުންދާ އެމްސީއެލްޕީގެ ޕަބްލިކް ވޯކްސް އަދި ހުޅުމާލޭ ފޭސް 1 އާއި ފޭސް 2 ގައި ހުންނަ މިފްކޯގެ ފިހާރައިން ރޯދަ މަހުގެ 15 ވަނަ ދުވަހުގެ ނިޔަލަށް މި ހަދިޔާ ދޫކުރަމުން ގެންދާނެ ކަމަށެވެ.
ރަމަޟާން މަހު ކޮންމެ ގޭބީސީއަކަށް ރޯދަ ހަދިޔާ ބެހުމަށް ނިންމަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާންކުރެއްވީ، ސަރުކާރަށް އެއް އަހަރު ފުރުމުގެ ކާމިޔާބީ ފާހަގަކުރުމަށް ބޭއްވި ރަސްމިއްޔާތުގައެވެ. މިގޮތުން މަސްދަޅު ކޭސް ބަހަން ފަށާފައިވަނީ މިދިޔަ އަހަރުގެ ރޯދަ މަހުން ފެށިގެންނެވެ. ރައީސްގެ ވަޢުދާ އެއްގޮތަށް މި އަހަރުގެ ރޯދަ މަހަށް ގޭބީސީތަކަށް މަސްދަޅު ކޭސްތައް ބެހުމުގެ މަސައްކަތް ފަށާފައިވަނީ ޖެނުއަރީ މަހުގެ 24 ވަނަ ދުވަހުއެވެ.
ތަފާސްހިސާބުތަކަށް ބަލާއިރު، މިހާތަނަށް މާލޭ ސަރަޙައްދުގެ 54,000 އަށްވުރެ ގިނަ ގޭބީސީއަށް މަސްދަޅު ކޭސް ވަނީ ދޫކޮށްފައެވެ. މި އަހަރު ޖުމްލަ 118,773 ގޭބީސީއަކަށް މަސްދަޅު ކޭސް ބެހުމަށް ސަރުކާރުން ވަނީ ހަމަޖައްސާފައެވެ. އޭގެ ތެރޭގައި ހިމެނެނީ މާލޭގެ 61,755 ގޭބީސީއަކާއި އަތޮޅުތެރޭގެ 56,918 ގޭބީސީއެވެ.
މާލޭ ސަރަހައްދުގައި ސަރުކާރުގެ އިދާރާތަކުން މި މަސައްކަތް ކުރިއަށް ގެންދާއިރު، އަތޮޅު ތެރޭގެ ރަށްރަށުގައި މަސްދަޅު ކޭސް ބަހަމުން ދަނީ އެ ރަށެއްގެ ރަށު ކައުންސިލްތައް މެދުވެރިކޮށް ކަމަށްވެސް ސަރުކާރުން މަޢުލޫމާތު ދެއެވެ.
