ނިމިދިޔަ ހަފުތާގެ ތެރޭގައި މާލެއާއި، ސިނަމާލެ ބުރިޖު އަދި ހައިވޭ ހިމެނޭ ސަރަހައްދުގައި ޖުމްލަ 41 އެކްސިޑެންޓު ހިނގާފައިވާކަމަށް ފުލުހުން ހާމަކޮށްފިއެވެ.
ފުލުހުން އާންމުކުރި ތަފާސްހިސާބުތަކަށް ބަލާއިރު، މި ހާދިސާތަކުގައި 11 މީހަކަށް އެކިވަރުގެ އަނިޔާވެފައިވާއިރު، ޖުމްލަ 45 އުޅަނދަކަށް ވަނީ ގެއްލުން ލިބިފައެވެ.
ފުލުހުންގެ މައުލޫމާތަށް ބަލާއިރު، މިދިޔަ ހަފްތާގައި އެންމެ ގިނަ އެކްސިޑެންޓު ހިނގާފައިވަނީ ފެބުރުއަރީ މަހުގެ 21 ވަނަ ދުވަހުއެވެ. އެ ދުވަހު އެކަނިވެސް 11 އެކްސިޑެންޓު ހިނގާފައިވެއެވެ. ދެވަނައަށް އެންމެ ގިނަ ހާދިސާ ހިނގި ފެބުރުއަރީ 15 ވަނަ ދުވަހު 8 އެކްސިޑެންޓު ރިޕޯޓުކޮށްފައިވެއެވެ.
މީގެ އިތުރުން ފެބުރުއަރީ 16، 17 އަދި 19 ވަނަ ދުވަހު ކޮންމެ ދުވަހަކު 6 އެކްސިޑެންޓު ހިނގާފައިވާއިރު، 18 އަދި 20 ވަނަ ދުވަހު ހިނގާފައިވަނީ ކޮންމެ ދުވަހަކު 2 އެކްސިޑެންޓެވެ.
މި އެކްސިޑެންޓުތަކުގެ ތަފްސީލަށް ބަލާއިރު، ގިނަ ހާދިސާތައް ހިނގާފައިވަނީ ދުވާލުގެ ވަގުތުތަކުގައެވެ. އެގޮތުން 33 އެކްސިޑެންޓެއް ދުވާލު ހިނގާފައިވާއިރު، ރޭގަނޑުގެ ވަގުތުތަކުގައި ހިނގާފައިވަނީ 8 އެކްސިޑެންޓެވެ. މިއީ ޖުމްލަ ހާދިސާތަކުގެ 20 އިންސައްތައެވެ. ފުލުހުން ހާމަކުރި ގޮތުގައި، މި ހަފްތާގައި ހިނގި އެކްސިޑެންޓުތަކުގެ ތެރޭގައި ހިމެނެނީ ކުދި 38 އެކްސިޑެންޓާއި ސީރިއަސް 3 އެކްސިޑެންޓެވެ.
ސަރަހައްދުތަކަށް ބަލާއިރު އެންމެ ގިނަ ހާދިސާ ހިނގާފައިވަނީ މާލޭގެ މަގުތަކުގައެވެ. މާލޭގައި 36 އެކްސިޑެންޓު ހިނގާފައިވާއިރު، ސިނަމާލެ ބްރިޖާއި ހައިވޭގައި 12 އެކްސިޑެންޓު ހިނގާފައިވެއެވެ. މި ހާދިސާތަކުގައި އެންމެ ގިނައިން ހިމެނެނީ ސައިކަލުތަކެވެ. އެގޮތުން ސައިކަލަކާއި ކާރެއް ޖެހިގެން 9 އެކްސިޑެންޓު އަދި ސައިކަލާއި ސައިކަލެއް ޖެހިގެން 8 އެކްސިޑެންޓު ހިނގާފައިވާކަމަށް ފުލުހުން ބުނެއެވެ.
މިމަހުގެ ދެވަނަ ހަފްތާގައި 43 އެކްސިޑެންޓެއް ހިނގާފައިވާއިރު، ނިމިދިޔަ ހަފްތާގައި އެކްސިޑެންޓުތަކުގެ އަދަދު ވަނީ ކުޑަކޮށް ދަށްވެފައެވެ. ނަމަވެސް، މާލެ ސަރަހައްދުގައި ހިނގާ އެކްސިޑެންޓުތަކުގައި މީހުންގެ ފުރާނަ ގެއްލުމާއި އުޅަނދުތަކަށް ބޮޑެތި ގެއްލުންތައް ލިބެމުންދާތީ، މަގުތައް ބޭނުންކުރާއިރު ޓްރެފިކް ޤަވާއިދުތަކަށް ފުރިހަމައަށް ތަބާވުމަށް ފުލުހުން ވަނީ އިލްތިމާސްކޮށްފައެވެ.
