ދިވެހި ފުލުހުންގެ ޚިދުމަތުން އިސްނަގައިގެން، މަގުމަތީގައި ކަސްރަތުކުރާ ފަރާތްތަކަށް އަމާޒުކޮށްގެން ހޭލުންތެރިކުރުވުމުގެ ޚާއްޞަ ޙަރަކާތެއް ލ. ފޮނަދޫގައި ކުރިއަށް ގެންގޮސްފިއެވެ. ފެބުރުވަރީ މަހުގެ 21 ވަނަ ދުވަހު ބޭއްވި މި ޙަރަކާތަކީ މަގުމަތީގެ ސަލާމަތާއި ރައްކާތެރިކަން އިތުރުކުރުމަށް ފުލުހުން ކުރަމުންދާ މަސައްކަތްތަކުގެ ތެރެއިން ހިންގުނު ޕްރޮގްރާމެކެވެ.
މި ޙަރަކާތުގެ މައިގަނޑު މަޤްޞަދަކީ ދުވެ ކަސްރަތުކުރުމަށް މަގު ބޭނުންކުރާ ފަރާތްތަކަށް އެންމެ އެކަށީގެންވާ ރައްކާތެރިކަމެއް ހޯދައިދިނުމާއި، މަގުމައްޗަކީ ހުރިހާ ފަރާތްތަކަށް އަމާން ތަނަކަށް ހެދުމެވެ. މިގޮތުން، ކަސްރަތުކުރާއިރު އަމިއްލަ ނަފުސުގެ ރައްކާތެރިކަމަށް ސަމާލުކަންދޭންޖެހޭ ކަންކަމާއި، މަގު ހުރަސްކުރުމުގައި ބަލަންޖެހޭ އުސޫލުތައް ބައިވެރިންނަށް ކިޔައިދީފައިވެއެވެ.
ޚާއްޞަކޮށް އަނދިރި މަގުތަކުގައި ދުވެ ނުވަތަ ހިނގާ ހަދާއިރު، މަގުން ދުއްވާ އުޅަނދުތަކަށް ސަމާލުކަންދިނުމަށް ފުލުހުން ވަނީ ނަސޭހަތްތެރިވެފައެވެ. މި ޙަރަކާތުގެ ތެރެއިން، ރޭގަނޑު ވަގުތުތަކުގައި ކަސްރަތުކުރާ ފަރާތްތަކަށް ފަސޭހައިން ފެންނާނެހެން ހުރުމަށް އެހީތެރިވުމުގެ ގޮތުން ރިފްލެކްޓިވް އަރމް ބޭންޑް ހަދިޔާކޮށްފައިވެއެވެ.
މީގެ އިތުރުން، މަގުމަތީގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން ލ. އަތޮޅުގެ މީހުން ދިރިއުޅޭ ހުރިހާ ރަށެއްގައި ސިލްސިލާ ޙަރަކާތްތަކެއް ފަށާފައިވާކަމަށް ފުލުހުން މަޢުލޫމާތުދެއެވެ. މި ޙަރަކާތްތައް ރަމަޟާން މަހުގެ ކޮންމެ ހުކުރު ދުވަހެއްގެ ހަވީރު ކުރިއަށް ގެންދިއުމަށް ވަނީ ރޭވިފައެވެ. މިގޮތުން އެއްގަމު ދަތުރުފަތުރުގެ ޤަވާއިދުތަކަށް ބޯލެނބުމަށާއި، އުޅަނދު ދުއްވާއިރު ސަމާލުކަންދޭންޖެހޭ ކަންކަމާ ގުޅޭ މަޢުލޫމާތު ދަނީ ފޯރުކޮށްދެމުންނެވެ.
ރަމަޟާން މަހުގެ ހަވީރުގެ ވަގުތުތަކަކީ މަގުތައް ބާރުބޮޑުވާ ވަގުތުތަކަކަށްވާތީ، ކުޑަކުދިން ގޮވައިގެން ސައިކަލު ދުއްވާއިރު ޚާއްޞަ ސަމާލުކަމެއް ދިނުމަށް ފުލުހުން ވަނީ އިލްތިމާސްކޮށްފައެވެ. އަދި އުޅަނދު ޕާކުކުރުމުގައި ރަނގަޅު އުސޫލުތައް ބޭނުންކުރުމަށް ބާރުއަޅައި، މަގުމަތީގެ ރައްކާތެރިކަމާ ގުޅޭ ލީފްލެޓްތައްވެސް މި ޙަރަކާތުގެ ތެރެއިން ވަނީ ބަހާފައެވެ.
