މަސްތުވާތަކެތި ފޮރުވާފައި ހުރި ފޮތްތަކެއް ހިމެނޭ ފޮށިގަނޑެއް ބަލާ ޕޯސްޓް އޮފީހަށް ދިޔަ މީހަކު 18 އަހަރަށް ޖަލަށްލުމަށާއި، 75,000 ރުފިޔާއިން ޖޫރިމަނާކުރުމަށް ކްރިމިނަލް ކޯޓުން ހުކުމްކޮށްފިއެވެ.
މިދިޔަ ހޯމަ ދުވަހު މި ހުކުމް އިއްވާފައިވަނީ އައްޑޫ މީދޫ، ހުދުވިލާގޭ އަލީ މުފާވިޒުގެ މައްޗަށެވެ.
އޭނާގެ މައްޗަށް ސާބިތުވެފައިވަނީ މަސްތުވާތަކެއްޗާބެހޭ ގާނޫނުގެ ޖަދުވަލު 1 ގައިވާ މަސްތުވާއެއްޗެއް ރާއްޖެއަށް އެތެރެކުރުމުގައި ބައިވެރިވުމުގެ ކުށުގެ ދައުވާއެވެ.
މިއީ 2023 ވަނަ އަހަރުގެ ޑިސެމްބަރު މަހު، މަސްތުވާތަކެތި ފޮރުވާފައި ހުރި ފޮތްތަކެއް ހިމެނޭ ފޮށިގަނޑެއް ބަލާ މުފާވިޒު ޕޯސްޓް އޮފީހަށް ދިޔަ މައްސަލައެކެވެ.
އެ ފޮށިގަނޑަކީ އެހެން މީހެއްގެ ނަމުގައި ރާއްޖެ ފޮނުވާފައިވާ ފޮށިގަނޑަކަށްވާއިރު، މުފާވިޒު އެ ފޮށިގަނޑު ނަގަން ދިޔައީ ފޮށިގަނޑުގައި ނަން އޮތް މީހާގެ ސިޓީއަކާއި އައިޑީ ކާޑުގެ ކޮޕީއެއް ހިފައިގެންނެވެ.
ޝައްކު ކުރެވޭ ކަންތަކެއްގެ ސަބަބުން މުފާވިޒުގެ ހާޒިރުގައި އެ ފޮށިގަނޑު ކަނޑައި ބަލައި ފާސްކުރިއިރު، އޭގެ ތެރޭގައި ހުރި ފޮތްތަކުގައި ފޮރުވާފައި ހުރި އެއް ކިލޯއަށް ވުރެ ގިނަ ގްރާމްގެ މެތުކެތިނޯން ފެނިފައިވެއެވެ.
މުފާވިޒު ބުނި ގޮތުގައި އޭނާ އެ ފޮށިގަނޑު ބަލާ ދިޔައީ މީހަކު ބުނެގެންނެވެ. އެހެންނަމަވެސް އޭނާ ދިން ފޯނު ނަންބަރަށް ގުޅުމުން އެއްވެސް ޖަވާބެއް ލިބިފައި ނުވާތީ އޮޕަރޭޝަން ކުރިއަށް ގެންދެވޭ ގޮތެއް ނުވިއެވެ. އެ ފޮށިގަނޑާ ހަވާލުވާން އަންނަ މީހާ ހޯދުމަށް ”ކޮންޓްރޯލްޑް އޮޕަރޭޝަން“ އެއް ކުރިއަށް ގެންދަން އުޅުނު އޮޕަރޭޝަން ގެންދެވޭ ގޮތެއްނުވެ އެވެ.
މި މައްސަލައިގައި ކޯޓުގައި މުފާވިޒު ބުނެފައި ވަނީ ފޮށިގަނޑުގައި މަސްތުވާތަކެތި ހުރިކަން އޭނާއަށް ނޭނގޭ ކަމަށާއި، އޭނާ އެތަނަށް ދިޔައީ ޕޭޖެއްގެ ޑެލިވަރީ އޯޑަރެއް ފުރިހަމަ ކުރުމަށް ކަމަށެވެ. މައްސަލައިގައި ކްރިމިނަލް ކޯޓުގެ ހުކުމުގައި ވަނީ، މައްސަލައިގެ ކަންހިނގާފައިވާ ގޮތަށް ބަލާއިރު މުފާވިޒުގެ ދައުރަކީ މަސްތުވާތަކެތި ހުރި ފޮށިގަނޑު ރާއްޖެ އެތެރެކޮށް އޭގެ މަންޒިލާ ހަމައަށް ފޯރުކޮށްދިނުމުގެ ބައިވެރިއެއްގެ ދައުރު ކަމަށެވެ. އަދި އޭނާއަކީ މި ސިލްސިލާގައި މެދުވެރިއެއްގެ ދައުރު އަދާކޮށްފައިވާ މީހެއްކަން އޭނާގެ އަމަލުތަކުންނާއި ހެކިންގެ ބަހުން ސާބިތުވާ ކަމަށް ކޯޓުން ކަނޑައެޅިއެވެ.
މުފާވިޒުގެ މައްޗަށް 18 އަހަރުގެ ޖަލު ހުކުމެއް އިއްވި ނަމަވެސް، މައްސަލައިގެ ތަހުގީގަށާއި ޝަރީއަތް ނިމެންދެން އޭނާ ބަންދުގައި ހުރި މުއްދަތު އުނިކުރުމުން، ދެން އޭނާ ތަންފީޒު ކުރަންޖެހޭނީ 15 އަހަރާއި ނުވަ މަހާއި 27 ދުވަހުގެ ޖަލު ހުކުމެކެވެ.
މީގެ އިތުރުން 75,000 ރުފިޔާގެ ޖޫރިމަނާ ކުރިއަށް އޮތް 12 މަސްދުވަހުގެ ތެރޭގައި މީރާއަށް ދެއްކުމަށް ވެސް ހުކުމުގައި ވަނީ އަމުރުކޮށްފައެވެ.
