އިންސާނާގެ އުމުރުން ދުވަސްވަމުންދާ ވަރަކަށް ހަށިގަނޑުގެ އެކި ގުނަވަންތަކަށް ބަދަލު އަންނަ ފަދައިން، ލޮލުގެ ފެނުމަށް ވެސް ބަދަލުތަކެއް އާދެއެވެ. މީގެ ތެރެއިން އެންމެ އާންމު އެއް މައްސަލައަކީ އުމުރުން ދުވަސްވުމުން ދިމާވާ ’އޭޖް ރިލޭޓެޑް މެކިއުލާ ޑިޖެނެރޭޝަން‘ އެވެ. މިއީ އުމުރުން 50 އަހަރުން މަތީގެ މީހުންނަށް ދިމާވާ، އަދި ފަރުވާއެއް ހޯދިފައިނުވާ ބައްޔެކެވެ. ނަމަވެސް، ލޮލުގެ ޚާއްޞަ ޑޮކްޓަރުން ވިދާޅުވާ ގޮތުގައި ދިރިއުޅުމުގެ އާދަކާދައަށް ގެންނަ ބަދަލުތަކުން މި ބަލީގެ ނުރައްކާ ކުޑަކުރެވިދާނެއެވެ.
1. ދުންފަތުގެ އިސްތިއުމާލުކުރުން ހުއްޓާލުން
ދުންފަތުގެ އިސްތިއުމާލުކުރުމަކީ ލޮލުގެ ފެނުން ގެއްލުމަށް މެދުވެރިވާ އެންމެ ބޮޑު އެއް ސަބަބެވެ. ދުންފަތުގެ ދުމުގެ ސަބަބުން ލޮލުގެ ރެޓިނާގެ ސެލްތަކަށް އޮކްސިޑޭޓިވް ސްޓްރެސް ކުރިމަތިވެ، މެކިއުލާ ހަލާކުވުމަށް މަގުފަހިވެއެވެ. ޑޮކްޓަރުން ވިދާޅުވާ ގޮތުގައި، ދުންފަތުގެ އިސްތިއުމާލުކުރުން ހުއްޓާލާތާ 20 އަހަރުވުމުން، އެމީހެއްގެ ލޮލަށް ހުންނަ ނުރައްކާ އާންމު މީހަކާ އެއްވަރުވެއެވެ. އެހެންކަމުން، ވީހާވެސް އަވަހަކަށް މި އާދަ ދޫކޮށްލުމަކީ ލޮލުގެ ސަލާމަތަށް އެޅޭ މުހިންމު ފިޔަވަޅެކެވެ.
2. ސިއްހަތަށް ފައިދާހުރި ކާނާ ބޭނުންކުރުން
ކާބޯތަކެތީގެ ސަބަބުން ލޮލުގެ ސިއްހަތަށް ބޮޑު ބަދަލެއް އާދެއެވެ. ޕްރޮސެސްކޮށްފައިވާ ކާނާއާއި، ހަކުރު އަދި ސަރުބީ ގިނަ ތަކެތި ކެއުމަކީ ލޮލުގެ ފެނުން ބަލިކަށިވާ ކަމެކެވެ. މީގެ ބަދަލުގައި ފެހިކަން ގަދަ ފަތުގެ ބާވަތްތަކާއި، މޭވާއާއި، ތަރުކާރީ ގިނައިން ބޭނުންކުރުމަކީ ލޮލަށް ބޭނުންވާ މުހިންމު މާއްދާތައް ލިބިދޭނެ ކަމެކެވެ. މިއީ ލޮލުގެ ފެނުން ދަށްވުން ލަސްކޮށްދޭ ކަމެއް ކަމަށް ދިރާސާތަކުން ދައްކައެވެ.
3. ގަވާއިދުން ލޯ ޗެކްކުރުން
ލޮލުގެ ބަލިތަކަކީ ކުރީކޮޅު ދެނެގަނެވިއްޖެނަމަ، އޭގެ ނުރައްކާ ކުޑަކުރެވިދާނެ ބަލިތަކެކެވެ. އުމުރުން ދުވަސްވާ މީހުން ގަވާއިދުން ލޮލުގެ ޚާއްޞަ ޑޮކްޓަރަކަށް ދައްކައި، ލޮލުގެ ޕްރެޝަރާއި ފެނުން ޗެކްކުރަންވާނެއެވެ. ޚާއްޞަކޮށް ފެނުމުގެ މެދުން ފުސްވުން ނުވަތަ ސީދާ ރޮނގުތައް ގުދުކޮށް ފެންނަން ފަށައިފިނަމަ، ލަސްނުކޮށް ޑޮކްޓަރަށް ދެއްކުން މުހިންމެވެ.
4. އަވިން ރައްކާތެރިވުން
އިރުގެ ދޯދިތަކުގައި ހިމެނޭ އަލްޓްރާވައިލެޓް (UV) ރޭސްއަކީ ލޮލުގެ ފެނުމަށް ގެއްލުންދޭ އެއްޗެކެވެ. ބޭރަށް ނުކުމެ އުޅޭއިރު ލޮލަށް ރައްކާތެރިކަންދޭ އަވިއައިނު ބޭނުންކުރުމަކީ ލޮލުގެ ފެނުން ދިގު މުއްދަތަކަށް ދެމެހެއްޓުމަށް އެހީތެރިވެދޭނެ ކަމެކެވެ. މީގެ އިތުރުން ކޮމްޕިއުޓަރާއި ފޯނު ފަދަ ތަކެތި ބޭނުންކުރާއިރު ވެސް ލޮލަށް ބާރުބޮޑުނުވާނެ ގޮތަށް ބެލުން މުހިންމެވެ.
5. ހަށިގަނޑުގެ ބަރުދަނާއި ކަސްރަތު
ލޮލުގެ ސިއްހަތަކީ މުޅި ހަށިގަނޑުގެ ސިއްހަތާ ގުޅިފައިވާ ކަމެކެވެ. ލޭގެ ޕްރެޝަރު މަތިވުމާއި ހަކުރުބަލީގެ ސަބަބުން ލޮލުގެ ފެނުމަށް ނޭދެވޭ އަސަރުކުރެއެވެ. ގަވާއިދުން ކަސްރަތުކުރުމާއި، ހަށިގަނޑުގެ ބަރުދަން އެއްވަރެއްގައި ހިފެހެއްޓުމަކީ ލޭގެ ދައުރުވުން ރަނގަޅުކޮށްދީ، ލޮލަށް ބޭނުންވާ އޮކްސިޖަން ފޯރުކޮށްދިނުމަށް އެހީތެރިވެދޭ ކަމެކެވެ.
ލޮލުގެ ފެނުމަކީ އިންސާނާއަށް ލިބިފައިވާ އެންމެ ބޮޑު އެއް ނިއުމަތެވެ. އުމުރުން ދުވަސްވުމަކީ ފެނުން ދަށްވުމަށް މެދުވެރިވާ ސަބަބެއް ނަމަވެސް، މަތީގައި ބަޔާންކުރެވުނު ފަދަ ދިރިއުޅުމުގެ އާދަކާދަތަކަށް ސަމާލުކަން ދީފިނަމަ، ދިގު މުއްދަތަކަށް ލޮލުގެ ފެނުން ސަލާމަތް ކުރެވިދާނެއެވެ. މިއަދު އަޅާ ކުޑަ ފިޔަވަޅަކީ މާދަމާގެ މިނިވަން ދިރިއުޅުމަށް އެޅޭ ބޮޑު ބިންގަލެކެވެ.
