ކައުންސިލްތަކަކީ ސަރުކާރުގެ ސިޔާސަތުތައް ތަންފީޒުކުރާ ސަރުކާރުގެ ފަށަލައެއްގެ ގޮތުގައި ދެކިގެން މަސައްކަތް ކުރުމަށާއި، ރައްޔިތުންގެ ތަރައްގީއަށް ހުރަސްނޭޅުމަށް ފޮރިން މިނިސްޓަރު އަބްދުﷲ ޚަލީލް ގޮވާލައްވައިފިއެވެ.
ޚަލީލް މިހެން ވިދާޅުވީ ކުރިޔަށް އޮތް ލޯކަލް ކައުންސިލް އިންތިހާބުގެ ކެމްޕެއިނަށް ޕީއެންސީ ކުރިޔަށް ގެންދިޔަ ޖަލްސާއެއްގައި ވާހަކަ ދައްކަވަމުންނެވެ.
ޚަލީލް ވިދާޅުވީ ރައީސް މުއިއްޒު ވެރިކަމަށް ވަޑައިގަތުމަށް ފަހު ލާމަރުކަޒީ ނިޒާމަށް ގެންނެވި އެންމެ ބޮޑު އެއް ބަދަލަކީ އަންހެނުންގެ ތަރައްގީއަށް މަސައްކަތް ކުރާ ކޮމިޓީތައް ބާރުވެރިކުރުވުންކަމަށެވެ. އެގޮތުން، ކުރިން އެއްވެސް ބާރެއް ނެތް މި ކޮމިޓީތަކުގެ ރައީސާގެ މަގާމަކީ ގާނޫނީ ގޮތުން މުސާރަ ލިބޭ ފުލްޓައިމް ވަޒީފާއަކަށް ބަދަލު ގެނައީ އާބާދީގެ ދެބައިކުޅަ އެއްބަޔަކީ އަންހެނުން ކަމަށްވާތީ، ބާރުވެރިކުރުވުމުގެ މަގްސަދުގައިކަމަށް ވިދާޅުވިއެވެ.
ކައުންސިލްތަކުގެ ދައުރާ ގުޅޭގޮތުން ވާހަކަދައްކަވަމުން ޚަލީލް ވިދާޅުވީ، ރާއްޖެއަކީ ޔުނިޓަރީ ދައުލަތަކަށް ވާއިރު ކައުންސިލްތަކުން ސަރުކާރުގެ މައިގަނޑު އެޖެންޑާ ތަންފީޒުކުރުމަށް އެއްބާރުލުން ދޭންޖެހޭނެ ކަމަށެވެ. މިސާލެއްގެ ގޮތުން އައްޑޫ ސިޓީގައި ގޫގުލް ފަދަ ދުނިޔޭގެ ބޮޑު ކުންފުންޏަކުން ކުރިއަށްގެންދަން އުޅުނު މަޝްރޫއަކަށް ކައުންސިލުން ހުރަސްއެޅިކަން މިނިސްޓަރ ފާހަގަކުރެއްވިއެވެ. އަދި އެފަދަ ކަންކަމުގައި ރައްޔިތުންގެ ހައްގުގައި ގާނޫނަށް ބަދަލު ގެނެސްގެން ނަމަވެސް މަޝްރޫއުތައް ކުރިއަށް ގެންދެވޭނެ މަގު ރައީސް ފަހިކޮށްދެއްވާނެކަމަށް ޚަލީލް ވަނީ ވިދާޅުވެފަ އެވެ.
މީގެ އިތުރުން، ކުރީގެ ސަރުކާރުން ލާމަރުކަޒީ ނިޒާމުގެ ނަމުގައި ރައްޔިތުންނަށް އޮޅުވާލައި، މުޅި ނިޒާމު ގަޑުބަޑުކޮށްލާފައިވާކަމަށް ޚަލީލް ވިދާޅުވި އެވެ. ހާއްސަކޮށް 2023 ގެ އިންތިހާބާ ދިމާކޮށް، ކަނޑުފަޅުން ގޯތި ދޫކުރުމަކީ އިހުލާސްތެރި ނިޔަތެއް އޮވެގެން ކުރި ކަމެއް ނޫންކަމަށާއި، އެއީ ހަމައެކަނި ވޯޓު ހޯދުމަށް ޖެހި މަޅިއެއްކަމަށް ޚަލީލް ވިދާޅުވި އެވެ.
ޚަލީލް ވިދާޅުވީ ރައީސް މުޢިއްޒުގެ ސަރުކާރުގެ ތަފާތަކީ ވީ ވައުދުތައް ފުއްދައިދިނުންކަމަށާއި، ގިރާވަރުފަޅާއި ތިލަފަޅު ހިއްކުމުގެ މަސައްކަތް ބާރަށް ކުރިއަށްދާކަމަށެވެ. އަދި މި ސަރުކާރުން ރައްޔިތުންނަށް ގޯތި ދޭނީ ކަނޑުން ނޫންކަމަށާއި، ބިން ހިއްކައިގެން ރައްޔިތުންނަށް ދިރިއުޅެވޭނެ އިންތިޒާމު ހަމަޖައްސަވާނެކަމަށް ޚަލީލް ވިދާޅުވި އެވެ.
