މިއަހަރުގެ ރަމަޟާން މަހުގެ ފުރަތަމަ 15 ދުވަހުގެ ތެރޭގައި ފިޠުރު ޒަކާތުގެ ގޮތުގައި 5.4 މިލިޔަން ރުފިޔާ ލިބިފައިވާކަމަށް މޯލްޑިވްސް ޒަކާތު ހައުސްއިން ހާމަކޮށްފިއެވެ.
މިއީ ފާއިތުވެދިޔަ ތިން އަހަރާ އަޅާބަލާއިރު، ރަމަޟާން މަހުގެ ފުރަތަމަ 15 ދުވަހު އެންމެ ގިނަ އަދަދަކަށް ޒަކާތުގެ ފައިސާ ލިބުނު އަހަރުކަން އެ އިދާރާއިން ފާހަގަކުރެއެވެ.
ޒަކާތު ހައުސްއިން ހިއްސާކޮށްފައިވާ ތަފާސްހިސާބުތަކަށް ބަލާއިރު، މިހާތަނަށް ފިޠުރު ޒަކާތުގެ ގޮތުގައި ޖުމްލަ 5,482,171 ރުފިޔާ ވަނީ ލިބިފައެވެ. މީގެ ކުރިން އެ އިދާރާއިން ހާމަކޮށްފައިވާ ގޮތުގައި، ރަމަޟާން މަހުގެ ފުރަތަމަ ހަފުތާގެ ތެރޭގައި އެކަނިވެސް 1.3 މިލިޔަން ރުފިޔާ ލިބިފައިވެއެވެ.
އޮންލައިންކޮށް ޒަކާތް ދެއްކުމުގެ އިންތިޒާމުތައް
މިއަހަރުގެ ފިޠުރު ޒަކާތް އޮންލައިންކޮށް ބަލައިގަންނަން ފަށާފައިވަނީ ރަމަޟާން މަހުގެ ފުރަތަމަ ދުވަހުން ފެށިގެންނެވެ. ރަމަޟާން މަހުގެ 27 ވަނަ ދުވަހުގެ ހެނދުނު 06:00 އާ ހަމައަށް ޖުމްލަ ހަތް ޕްލެޓްފޯމެއް މެދުވެރިކޮށް އޮންލައިންކޮށް ޒަކާތް ދެއްކޭނެއެވެ. އޭގެ ތެރޭގައި ދިރާގު، އުރީދޫ، މޯލްޑިވްސް އިސްލާމިކް ބޭންކް، ބޭންކް އޮފް މޯލްޑިވްސް، ފަހިޕޭ، އަވަސް އެޕް އަދި ބަނޑޭރި ޕޭ ހިމެނެއެވެ. މީގެ ތެރެއިން ބަނޑޭރި ޕޭ މެދުވެރިކޮށް ރަމަޟާން މަހުގެ އެންމެ ފަހު ދުވަހާ ހަމައަށް ވެސް ޒަކާތް ދެއްކޭނެ ކަމަށް ޒަކާތު ހައުސްއިން މަޢުލޫމާތުދެއެވެ.
ކައުންޓަރުތަކުން ޒަކާތް ބަލައިގަތުން
ރަމަޟާން މަހުގެ ފަހު ދިހައަކީ ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައިވާތީ، ކައުންޓަރުތަކުން ޒަކާތް ބަލައިގަންނަ ގަޑިތަކަށް ވަނީ ބަދަލު ގެނެސްފައެވެ. އެގޮތުން މާރިޗު 10 އިން 19 އަށް، ހުކުރު އަދި ހޮނިހިރު ފިޔަވައި ކޮންމެ ދުވަހަކު ހެނދުނު 11:00 އިން މެންދުރު 14:00 އަށް އިސްލާމީ މަރުކަޒުގެ ޖަލްސާކުރާ މާލަމުން ޒަކާތް ބަލައިގަންނާނެއެވެ. އަތޮޅުތެރޭގެ ރަށްރަށުގައި ޒަކާތް ބަލައިގަންނާނީ ރަށު ކައުންސިލް އިދާރާތަކުންނެވެ.
ޒަކާތުގެ ގޮތުގައި ދައްކަންޖެހޭ މިންވަރު
މިއަހަރު ފިޠުރު ޒަކާތުގެ ގޮތުގައި ދައްކަންޖެހޭ މިންވަރުތަކަކީ: އާދައިގެ ހަނޑޫ ނަމަ 12ރ، ތައިލެންޑް ހުދު ހަނޑޫ 53ރ، ރަތް ހަނޑޫ 96ރ، ބާސްމަތީ އާދައިގެ 77ރ، ބާސްމަތީ މޮޅު 109ރ، ބާސްމަތީ އެންމެ މޮޅު 136ރ، އާދައިގެ ފުށް 10ރ، އަދި އާޓާ ފުށް 75ރ އެވެ.
އޮންލައިންކޮށް ޒަކާތް ދައްކަން ދަތި ފަރާތްތަކަށް ނަގުދު ފައިސާ އާއި ކޭޝް ކާޑުން ޒަކާތް ދެއްކޭނެ އިންތިޒާމު މިހާރު ވަނީ ހަމަޖައްސާފައެވެ. ކައުންސިލްތަކުން ޒަކާތް ބަލައިގަތުމުގައި ބޭނުންކުރާނީ ”ފިޠުރު ޕޯޓަލް“ ކަމަށާއި، މި ޕޯޓަލް މެދުވެރިކޮށް ފައިސާ ދެއްކުމުން ވަގުތުން އެސް.އެމް.އެސް މެދުވެރިކޮށް ކަށަވަރުކުރުން ލިބޭނެ ކަމަށްވެސް ޒަކާތު ހައުސްއިން ބުނެފައިވެއެވެ.
