”ސްކޯލިއޯސިސް“ އޭ ބުނީމައި އެއީ ބައްޔެއްކަން އިނގެނީ ތީގެ ތެރެއިން ކިތައް މީހުންނަށްބާވައެވެ؟ މިއީ އަޅުގަނޑުމެންގެ މުޖުތަމައުގައި އެހާ ބޮޑަށް ދެކެވޭ ވާހަކައަކަށް ނުވިޔަސް، މިއީ ވަރަށް ގިނަ ބަޔަކަށް ދިމާވާ ސިއްހީ މައްސަލައެކެވެ. މި ލިޔުމުގައި ބަލާލާނީ ސްކޯލިއޯސިސްއަކީ ކޮބައިކަމާއި، މި ބަލި ޖެހެން މެދުވެރިވާ ސަބަބުތަކާއި، ބަލީގެ އަލާމާތްތަކުގެ އިތުރުން މިކަމަށް އޮތް ފަރުވާތަކުގެ މައްޗަށެވެ.
ސްކޯލިއޯސިސް އަކީ އިންސާނާގެ ބުރަކަށީގެ ކަށިގަނޑު ނުވަތަ މައިބަދަ އެއްފަރާތަކަށް އަރިވުމަށް ކިޔާ ނަމެކެވެ. އާންމު ގޮތެއްގައި ސިއްހަތު ސަލާމަތުން ހުންނަ މީހެއްގެ މައިބަދަ ފަހަތުން ބަލާއިރު ފެންނާނީ ސީދާކޮށެވެ. ނަމަވެސް ސްކޯލިއޯސިސް ހުންނަ މީހުންގެ މައިބަދަ ހުންނާނީ ”S“ ނުވަތަ ”C“ އަކުރެއްގެ ބައްޓަމަށެވެ. މިއީ ކުޑަކުދިންނާއި ބޮޑެތި މީހުންނަށްވެސް ދިމާވެދާނެ ސިއްހީ މައްސަލައެކެވެ.
އަންހެން ކުދިންނަށް އޮތް ނުރައްކާ
ސްކޯލިއޯސިސް އަކީ ފިރިހެނުންނަށްވުރެ ބޮޑަށް އަންހެނުންނަށް ޖެހުމުގެ ފުރުސަތު ބޮޑު ބައްޔެއްގެ ގޮތުގައި މެޑިކަލް ދިރާސާތަކުން ދައްކައެވެ. ޚާއްޞަކޮށް، ބާލިޣުވާ އުމުރުގެ އަންހެން ކުދިންގެ މައިބަދަ ގުދުވުމުގެ މައްސަލަ ކުރިމަތިވުމުގެ ފުރުސަތު ފިރިހެން ކުދިންނަށްވުރެ އަށް ގުނަ އިތުރެވެ. މިކަން މިހެން ދިމާވާ ސީދާ ސަބަބެއް ސައިންސްވެރިންނަށް އަދި ހޯދިފައި ނުވި ނަމަވެސް، ހޯރމޯންތަކަށް އަންނަ ބަދަލުތަކާއި، ހަށިގަނޑު ހެދިބޮޑުވާ ދުވެއްޔަށް އަންނަ ތަފާތުތަކަކީ މީގެ ސަބަބުތަކެއް ކަމުގައި ބެލެވެއެވެ.
ބަލިޖެހޭ ސަބަބުތައް
ސްކޯލިއޯސިސް ޖެހެން މެދުވެރިވާ ސީދާ ސަބަބު ގިނަ ފަހަރަށް އޮންނަނީ ނޭނގިފައެވެ. މިއަށް ކިޔަނީ ”އިޑިއޯޕެތިކް ސްކޯލިއޯސިސް“ އެވެ. މިއީ އެންމެ އާންމުކޮށް ފެންނަ ވައްތަރެވެ. މީގެ އިތުރުން، އުފަންވާއިރު މައިބަދައިގެ އުނިކަމެއް ހުރުމުން (ކޮންޖެނިޓަލް) ނުވަތަ ނާރުތަކާއި މަސްތަކަށް ޖެހޭ ބަލިތަކުގެ ސަބަބުން (ނިއުރޯމަސްކިއުލަރ) އިންވެސް މިބަލި ޖެހެއެވެ. ބައެއް ހާލަތްތަކުގައި މިއީ އާއިލީ ގޮތުން ވާރުތަވާ ބައްޔެއްގެ ގޮތުގައިވެސް ފާހަގަކުރެވެއެވެ.
ބަލި ދެނެގަންނާނެ ގޮތް
ސްކޯލިއޯސިސް ހުރިކަން ދެނެގަތުމަށް ބަލާލެވިދާނެ ބައެއް ނިޝާންތަކެއް ހުރެއެވެ. އޭގެ ތެރޭގައި ދެ ކޮނޑު އެއްވަރު ނުވުން، އުނަގަނޑުގެ ދެފަރާތް އެއްވަރު ނުވުން، އަދި ކުރިއަށް ގުދުވާއިރު ބުރަކަށީގެ އެއްފަރާތް މައްޗަށް އުފުލިފައި ހުރުން ހިމެނެއެވެ. ޑޮކްޓަރުން މި ބަލި ޔަގީންކުރުމަށްޓަކައި ”އެޑަމްސް ފޯވާޑް ބެންޑް ޓެސްޓް“ ހެދުމަށްފަހު، އެކްސް-ރޭ އެއްގެ އެހީގައި މައިބަދަ ގުދުވެފައިވާ މިންވަރު ބަލައެވެ.
ފަރުވާގެ ގޮތްތައް
ސްކޯލިއޯސިސްގެ ފަރުވާ ބިނާވެފައިވަނީ ބަލިމީހާގެ އުމުރާއި، މައިބަދަ ގުދުވެފައިވާ މިންވަރުގެ މައްޗަށެވެ. މައިގަނޑު ފަރުވާތަކުގެ ތެރޭގައި ގަވާއިދުން ޗެކަޕް ހެދުމާއި، މައިބަދަ އިތުރަށް ގުދުވިޔަނުދިނުމަށްޓަކައި އަޅުވާ ”ބްރޭސިންގް“ ނުވަތަ ހަރު އޮނިގަނޑު ހިމެނެއެވެ. މީގެ އިތުރުން ބުރަކަށީގެ މަސްތައް ވަރުގަދަ ކުރުމަށް ފިޒިއޮތެރަޕީ ދެވޭއިރު، ހާލަތު ވަރަށް ބޮޑަށް ގޯސްވެއްޖެނަމަ އޮޕަރޭޝަން ކުރަން ޖެހުމަކީވެސް އެކަށީގެންވާ ކަމެކެވެ.
ސްކޯލިއޯސިސްއަކީ ކުރީބައިގައި ދެނެގަނެވިއްޖެނަމަ، އޭގެ ނުރައްކަލުން ސަލާމަތްވުމަށް ފަސޭހަވާނެ ބައްޔެކެވެ. ޚާއްޞަކޮށް ކުޑަކުދިން ހެދިބޮޑުވަމުން އަންނަ އުމުރުގައި ބުރަކަށީގެ ބައްޓަމަށް އަންނަ ބަދަލުތަކަށް ބެލެނިވެރިން ސަމާލުވުމަކީ ވަރަށް މުހިންމު ކަމެކެވެ. މި ބައްޔާ މެދު ހޭލުންތެރިކަން އިތުރުކޮށް، ސިއްހީ މާހިރުންގެ އިރުޝާދު ހޯދުމަކީ ދުޅަހެޔޮ ދިރިއުޅުމަކަށް އެޅޭނެ ބޮޑު ފިޔަވަޅެކެވެ.
