އެޓްމޮސްފިއާ ފައުންޑޭޝަނުގެ ފަރާތުން ދިވެހި ޒުވާނުންނަށް ޚާއްޞަކޮށްގެން ކުރިއަށްގެންދާ ޑައިވިން ތަމްރީނު ޕްރޮގްރާމަކަށް ކުރިމަތިލުމުގެ ފުރުސަތު މިއަދު ހުޅުވާލައިފިއެވެ.
މޫދުބުޅާ ޑައިވް ސެންޓަރާ ގުޅިގެން ކުރިއަށްގެންދާ މި ޕްރޮގްރާމަކީ އަހަރަކު 10 ދިވެހިންނަށް ޑައިވިން ދާއިރާއިން ފަންނީ ތަމްރީނު ހޯދައިދިނުމަށް އެޓްމޮސްފިއާ ފައުންޑޭޝަނުން ސްޕޮންސާ ކުރާ، ހުރިހާ ޚަރަދެއް ހަމަޖެހިފައިވާ ޕްރޮގްރާމެކެވެ. މިހާރު ހުޅުވާލާފައިވަނީ މި ޕްރޮގްރާމުގެ ފުރަތަމަ ބުރުގައި ބައިވެރިވުމުގެ ފުރުސަތެވެ.
މި ޕްރޮގްރާމުގެ ދަށުން ހޮވޭ ބައިވެރިންނަށް ބައިނަލްއަގްވާމީ ގޮތުން ބަލައިގަންނަ ޑައިވިން ސެޓްފިކެޓްތައް ހާސިލުކުރުމަށް ބޭނުންވާ ފުރިހަމަ ތަމްރީނާއި އެހީތެރިކަން ހިލޭ ފޯރުކޮށްދެވޭނެއެވެ. މީގެ ތެރޭގައި ފަންނީ ތަމްރީނުތަކުގެ ފީ، ސެޓްފިކެޓް ފީ، ހުރުމާއި ކެއުން، އަދި އިންޝުއަރެންސްގެ ހަރަދުތައް ހިމެނޭ ކަމަށް އެ ފައުންޑޭޝަނުން މައުލޫމާތު ދެއެވެ.
މި ޕްރޮގްރާމަށް ކުރިމަތިލެވޭނީ އުމުރުން 18 އަހަރަށް ވުރެ މަތީ މީހުންނަށެވެ. ތަމްރީނު ފުރިހަމަކުރާ ފަރާތްތަކުން، ވަކި މުއްދަތަކަށް ރާއްޖޭގައި މަސައްކަތްކުރަން ޖެހޭނެއެވެ. އެއީ ހާސިލުކުރި ހުނަރުގެ ފައިދާ ރާއްޖޭގެ ފަތުރުވެރިކަމަށާއި ކަނޑުދަތުރުފަތުރުގެ ދާއިރާއަށް ސީދާ ގޮތެއްގައި ފޯރުކޮށްދިނުމުގެ މަގްސަދުގައި ނިންމާފައިވާ ނިންމުމެއް ކަމަށް އެ ފައުންޑޭޝަނުން ބުނެއެވެ.
މިކަމާ ގުޅޭގޮތުން އެޓްމޮސްފިއާ ފައުންޑޭޝަނުގެ ނައިބު ރައީސް އަބްދުލް އަޒީޒް އަބްދުލް ހަކީމް ވިދާޅުވީ، މި ޕްރޮގްރާމަކީ ދިވެހިންނަށް ކުރިއަށް ދިއުމުގެ އަމަލީ ފުރުސަތުތައް ހޯދައިދިނުމަށް އެ ފައުންޑޭޝަނުން ކުރާ މަސައްކަތުގެ ހެއްކެއް ކަމަށެވެ.
”މި ޕްރޮގްރާމުގެ މަގްސަދަކީ މި ދާއިރާއަށް ޝައުގުވެރިކަން ހުރި، ޑައިވިން އިން ކުރިއަށްދާން ބޭނުންވާ ޒުވާނުންނަށް މަގުފަހިކޮށްދިނުން. ތަމްރީނާއި ތަރައްގީއަށް އިންވެސްޓްކުރުމުން، ރާއްޖޭގެ އިގްތިސޯދުގެ އެންމެ މުހިންމު ދާއިރާގައި ދިވެހިންނަށް ފަންނީ ވަޒީފާތައް އަދާކުރުމުގެ ފުރުސަތު ބޮޑުވެގެންދާނެ،“ އަބްދުލް އަޒީޒް ވިދާޅުވިއެވެ.
އޭނާ އިތުރަށް ވިދާޅުވީ އުއްމީދަކީ މި ފުރުސަތުގެ ސަބަބުން ބައިވެރިންނަށް ހަމައެކަނި ސެޓްފިކެޓެއް ލިބުމުގެ ބަދަލުގައި ރާއްޖޭގައި ދެމެހެއްޓެނިވި ވަޒީފާގެ ފުރުސަތުތަކެއް ތަނަވަސްވެގެންދިއުން ކަމަށެވެ.
މި ޕްރޮގްރާމަށް ކުރިމަތިލުމުގެ އެންމެ ފަހު ސުންގަޑިއަކީ މި މަހުގެ 15 ވަނަ ދުވަހެވެ. ޑައިވިން ދާއިރާއިން ކުރިއަށް ދާން ބޭނުންވާ ޒުވާނުންނަށް މިއީ ފަހިކޮށްދެވުނު ރަނގަޅު ފުރުސަތެކެވެ.
