މި އަހަރުގެ މިހާތަނަށް މުޅި ރާއްޖެއިން 2,183 ޑެންގީ ހުން ޖެހިގެން ރިޕޯޓްކޮށްފައިވާ ކަމަށާއި، މިއީ މިދިޔަ އަހަރުގެ މި މުއްދަތާ އަޅާބަލާއިރު ކަންބޮޑުވާ މިންވަރެއްގެ އިތުރުވުމެއް ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
އެޗްޕީއޭގެ ތަފާސްހިސާބުތަކުން ދައްކާ ގޮތުގައި މިދިޔަ އަހަރުގެ ފުރަތަމަ ހަތަރު މަސްދުވަހު ރިޕޯޓްކޮށްފައިވަނީ 374 ކޭސްއެވެ. ނަމަވެސް މި އަހަރުގެ މިހާތަނަށް އެ އަދަދު ވަނީ 2,183 އަށް އަރާފައެވެ. މިއީ މިދިޔަ އަހަރާ އަޅާބަލާއިރު ފަސް ގުނައަށްވުރެ ބޮޑު އިތުރުވުމެކެވެ.
މި އަހަރުގެ މިހާތަނަށް ޑެންގީ ރިޕޯޓްކޮށްފައިވާ ގޮތަށް ބަލާއިރު، ޖެނުއަރީ މަހު 679 ކޭސް، ފެބްރުއަރީ މަހު 428 ކޭސް، މާރިޗް މަހު 600 ކޭސް އަދި އޭޕްރީލް މަހު 476 ކޭސް ވަނީ ރިޕޯޓްކޮށްފައެވެ. މިދިޔަ އަހަރުގެ މި ހަތަރު މަހު ކޭސްތައް ހުރީ 100 އިން ދަށުގައެވެ. އެގޮތުން މިދިޔަ އަހަރުގެ ޖެނުއަރީ މަހު 76، ފެބްރުއަރީ މަހު 87، މާރިޗް މަހު 76 އަދި އޭޕްރީލް މަހު ރިޕޯޓްކޮށްފައިވަނީ 135 ކޭސްއެވެ.
މި އަހަރު އެންމެ ގިނައިން ޑެންގީ ކޭސްތައް ރިޕޯޓްކޮށްފައިވަނީ އަތޮޅުތެރެއިންނެވެ. ތަފާސްހިސާބުތަކުން ދައްކާ ގޮތުގައި އަތޮޅުތަކުން 1,813 ކޭސް ރިޕޯޓްކޮށްފައިވާއިރު، މާލެ ސަރަހައްދުން ރިޕޯޓްކޮށްފައިވަނީ 370 ކޭސްއެވެ.
އެޗްޕީއޭ އިން ބުނީ ޑެންގީ ކޮންޓްރޯލް ކުރުމަށްޓަކައި ކަމާގުޅުންހުރި އެންމެހާ އިދާރާތަކާ ގުޅިގެން މަސައްކަތް ކުރަމުންދާ ކަމަށެވެ. އަދި ބަލިން ރައްކާތެރިވުމަށްޓަކައި އެންމެ މުހިންމު ކަމަކީ މަދިރި އުފެދޭ ތަންތަން ނައްތާލުމާއި މަދިރިން ރައްކާތެރިވުމަށް ސަމާލުކަން ދިނުން ކަމަށް އެ އެޖެންސީން ފާހަގަކުރެއެވެ.
ބަލީގެ އަލާމާތެއް ފެނިއްޖެ ހާލަތެއްގައި، ލަސްނުކޮށް ޞިއްޙީ އެހީތެރިންގެ އިރުޝާދާ އެއްގޮތަށް ފަރުވާ ހޯދުމަށް އެޗްޕީއޭ އިން ވަނީ އާންމުންނަށް އިލްތިމާސްކޮށްފައެވެ.
