މީގެ ދަށުން ބާއްވާ ބިޒްނަސް ފޯރަމް އޮންނާނީ އަންނަ މެއި މަހުގެ 13 އަދި 14 ގައެވެ. މި ފޯރަމްގައި އައްޑޫ ސިޓީގެ ވިޔަފާރިވެރިންގެ އިތުރުން މާލޭގެ އެކި ދާއިރާތަކުގެ ވިޔަފާރިވެރިންނާއި ސިނާޢީ މަސައްކަތްތަކުގައި ހަރަކާތްތެރިވާ ފަރާތްތަކުން ބައިވެރިވާނެއެވެ.
މިނިސްޓަރު ވިދާޅުވި ގޮތުގައި، މި ފޯރަމްގެ މައިގަނޑު މަޤްޞަދަކީ މުޅި ރާއްޖޭގައި ވިޔަފާރިތައް ފުޅާކުރުމަށް މަގުފަހިކޮށްދިނުމާއި، އިންވެސްޓްމަންޓް ފުރުޞަތުތަކާ ގުޅޭގޮތުން ހޭލުންތެރިކަން އިތުރުކުރުމެވެ. މީގެ އިތުރުން ސަރުކާރުން ވިޔަފާރިވެރިންނަށް ފޯރުކޮށްދޭ ޚިދުމަތްތަކާ ބެހޭ މަޢުލޫމާތު ފޯރުކޮށްދިނުމަކީވެސް މި ފޯރަމްގެ މަޤްޞަދެކެވެ.
މި އިވެންޓަކީ ހަމައެކަނި އިޤްތިޞާދީ މަޝްވަރާތަކަށް ހާއްސަ އިވެންޓެއް ނޫން ކަމަށާއި، މަސައްކަތްތެރިންނާއި، ޓެކްނޮލޮޖީއާއި، އިދާރީ ޚިދުމަތްތަކުގެ އިތުރުން މުއައްސަސާތަކުގެ އެހީތެރިކަމާ ގުޅޭ މަޢުލޫމާތުވެސް މި ފޯރަމްގެ ތެރެއިން ލިބޭނެ ކަމަށް އޮފިޝަލުން ވިދާޅުވިއެވެ. މި ފޯރަމްގައި މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ އިތުރުން ސަރުކާރުގެ ގިނަ މުއައްސަސާތަކަކުން ބައިވެރިވާނެއެވެ.
ސަރުކާރުން ބުނީ ގުޅުންހުރި ހުރިހާ މުއައްސަސާތަކެއް އެއް ޕްލެޓްފޯމަކަށް ގެނައުމުން، ވިޔަފާރިވެރިންނަށް ބޭނުންވާ މަޢުލޫމާތާއި ޚިދުމަތްތައް އެއްތަނަކުން ފަސޭހަކަމާއެކު ލިބިގެންދާނެ ކަމަށެވެ.
ނޫސްވެރިންގެ ބައްދަލުވުމުގައި މިނިސްޓަރު އިތުރަށް ވިދާޅުވީ، ހިތަދޫ އެމް.ޕީ.އެލް ކޮމާޝަލް ޕޯޓް ފްރީ ޒޯން މަޝްރޫޢުގެ ”ޕައިލެޓް“ މަސައްކަތްތައް މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) އާ ގުޅިގެން ވަރަށް އަވަހަށް ފަށާނެ ކަމަށެވެ.
މި ފްރީ ޒޯން މަޝްރޫޢުގެ ސަބަބުން ރާއްޖޭގެ ދެކުނުގައި ވިޔަފާރިއާއި، ޝިޕިންގ، ލޮޖިސްޓިކްސް އަދި އިންވެސްޓްމަންޓްތަކަށް ބޮޑު ކުރިއެރުމެއް ލިބި، ވަޒީފާގެ އާ ފުރުޞަތުތަކެއް ހުޅުވިގެންދާނެ ކަމަށް ބެލެވެއެވެ.
ސަރުކާރުން މިކަން ސިފަކުރަނީ އިޤްތިޞާދީ މަސައްކަތްތައް ލާމަރުކަޒީކޮށް، އައްޑޫ ސިޓީއަކީ ރާއްޖޭގެ އިޤްތިޞާދީ އަދި ވިޔަފާރީގެ މައި ހަބަކަށް ހެދުމަށް ރައީސް ޑރ. މުޢިއްޒު ގެންގުޅުއްވާ ތަޞައްވުރުގެ މުހިންމު ފިޔަވަޅެއްގެ ގޮތުގައެވެ.
