މިއަހަރުގެ ޖޫން މަހު ރައްޔިތުންގެ މަޖިލީހުގެ ޖަލްސާތައް އަލުން ފެށޭއިރު، އެމްޑީޕީގެ ޕާލިމަންޓަރީ ގްރޫޕުގެ 13 ވަނަ މެންބަރެއްގެ ގޮތުގައި ހިތަދޫ މެދު ދާއިރާގެ ކެންޑިޑޭޓް ޢަބްދުﷲ ޞޯބިރު (ސޯބެ) އިންނަވާނެ ކަމަށް ގަލޮޅު ދެކުނު ދާއިރާގެ މެންބަރު މީކާއީލް ނަސީމް ވިދާޅުވެއްޖެއެވެ.
މީކާއީލް މިހެން ވިދާޅުވީ ކުރިއަށް އޮތް ބައި-އިލެކްޝަނާ ގުޅިގެން ރޭ އެމްޑީޕީ ހަރުގޭގައި ބޭއްވި ކެމްޕޭން ޖަލްސާގައި ވާހަކަދައްކަވަމުންނެވެ.
އައްޑޫ އަކީ އަބަދުވެސް އެމްޑީޕީގެ ރޫހު އޮތް ތަނެއްކަން ފާހަގަކުރައްވައި މީކާއީލް ވިދާޅުވީ، މި އިންތިޚާބަށްފަހު އެ ގޮނޑި އަލުން އެމްޑީޕީއަށް ކާމިޔާބުވާނެ ކަމުގެ ފުރިހަމަ އިތުބާރު އެބައޮތް ކަމަށެވެ. ކެންޑިޑޭޓް ސޯބެއަށް ތައުރީފު ކުރައްވަމުން އޭނާ ވިދާޅުވީ، ސޯބެއަކީ ހިތަދޫގެ ތަރައްޤީއަށް ބޮޑެތި ޚިދުމަތްތަކެއް ކޮށްދެއްވާފައިވާ ބޭފުޅެއް ކަމަށާއި، އެފަދަ ބޭފުޅަކާއެކު ސިޔާސީ މައިދާނުގައި މަސައްކަތް ކުރަން ލިބުމަކީ ފަހުރެއް ކަމަށެވެ.
ރާއްޖޭގެ މިހާރުގެ ސިޔާސީ މަސްރަޙާ މެދު ކަންބޮޑުވުން ފާޅުކުރައްވަމުން މީކާއީލް ތުހުމަތު ކުރެއްވި ގޮތުގައި، މިހާރު ރާއްޖޭގައި ނޫސްވެރިކަމުގެ މިނިވަންކަމާއި ބަސްބުނުމުގެ މިނިވަންކަން ވަނީ ވަރަށް ބޮޑަށް ހަނިކޮށްފައެވެ. އޭނާ ވިދާޅުވީ، ”މިއީ ހަމައެކަނި އައްޑޫ ރައްޔިތުން އައްޑޫ މީހަކަށް ވޯޓުދޭ އިންތިޚާބެއް ނޫން. މިއީ މުޅި ރާއްޖޭގެ ޑިމޮކްރަސީގެ މިސްރާބު ކަނޑައަޅައި، އެ ޑިމޮކްރަސީ ދިފާއުކުރުމަށް ދޭ ވޯޓެއް،“ ކަމަށެވެ.
މިހާރު ހިނގަމުންދާ 20 ވަނަ ރައްޔިތުންގެ މަޖިލީހުގައި އެމްޑީޕީ ތަމްސީލުކުރައްވަނީ 12 މެންބަރުންނެވެ. އެހެންކަމުން، ޖޫން 6 ވަނަ ދުވަހު ބޭއްވުމަށް ހަމަޖެހިފައިވާ ބައި-އިލެކްޝަން ކާމިޔާބުކޮށް ސޯބެ މަޖިލީހަށް އިންތިޚާބުވެއްޖެނަމަ، އެމްޑީޕީގެ ޕާލިމަންޓަރީ ގްރޫޕުގެ އަދަދު 13 އަށް އަރާނެއެވެ. މިއީ ސަރުކާރު ޒިންމާދާރުކުރުވުމަށް މުހިންމު ބަދަލަކަށް ވާނެ ކަމަށް އެ ޕާޓީން ގަބޫލުކުރެއެވެ.
ސަރުކާރު ހިންގާ ޕީއެންސީން މަޖިލީހުގެ ބޮޑު އަޣުލަބިއްޔަތެއް ހޯދާފައިވާއިރު، އިދިކޮޅު އެމްޑީޕީން ދަނީ ކުރިއަށް އޮތް ބައި-އިލެކްޝަންތައް ކާމިޔާބުކޮށް މަޖިލީހުގައި އެ ޕާޓީގެ ދައުރު ފުޅާކުރުމަށް ބޮޑެތި މަސައްކަތްތަކެއް ކުރަމުންނެވެ. އައްޑޫ ސިޓީއަކީ ތާރީޚީ ގޮތުން އެމްޑީޕީގެ ކިއްލާއެއްގެ ގޮތުގައި ބެލެވޭތީ، މި ގޮނޑި ކާމިޔާބުކުރުމަށް އެ ޕާޓީގެ އިސްވެރިން އަންނަނީ އަތޮޅުތެރޭގައި ވަރުގަދަ ކެމްޕޭން ހަރަކާތްތަކެއް ހިންގަމުންނެވެ.
