އަފްޣާން ރައްޔިތުން ގޮވައިގެން ދަތުރުކުރި މުދާ އުފުލާ ލޮރީއެއް، އަފްޣާނިސްތާނުގެ އިރުމަތީ ހައިވޭއެއްގައި ފުރޮޅާލައި ހިނގި ނުރައްކާތެރި އެކްސިޑެންޓެއްގައި 18 މީހުން މަރުވެއްޖެއެވެ. މަރުވި މީހުންގެ ތެރޭގައި 10 ކުޑަކުދިން ހިމެނޭ ކަމަށް އެ ގައުމުގެ ކަމާބެހޭ ފަރާތްތަކުން މަޢުލޫމާތު ދެއެވެ.
ލަޣްމާން ޕްރޮވިންސްގެ ގަރުޣާއީ ޑިސްޓްރިކްޓްގައި މި ހާދިސާ ހިނގާފައިވަނީ ހޮނިހިރު ދުވަހުގެ ފަތިހު 5:30 އެހާކަންހާއިރުއެވެ. ތާލިބާން ސަރުކާރުގެ ތަރުޖަމާނު ޒަބީހުﷲ މުޖާހިދު ވިދާޅުވި ގޮތުގައި، މި އެކްސިޑެންޓް ހިނގާފައިވަނީ ސުރުޚަކާން ކުއަޓް ކައިރިންނެވެ.
ލަޣްމާން ޕްރޮވިންސްގެ ސިއްހީ ޑިރެކްޓަރު އަމީނުﷲ ޝަރީފް ވިދާޅުވީ، މި އެކްސިޑެންޓް ހިނގަން މެދުވެރިވީ ލޮރީ ދުއްވަން އިން ޑްރައިވަރަށް ނިދިޖެހި، ކޮންޓްރޯލުން ނެއްޓިގެން މަގުން ކަސިޔާރުވެ ކައިރީގައި އޮތް ވަޅގަނޑަކަށް ލޮރީ ވެއްޓުމުގެ ސަބަބުންނެވެ. މި ލޮރީގައި ގިނަ އަދަދެއްގެ އާއިލާތަކަކާއި އެމީހުންގެ ގެންގުޅޭ ސާމާނުތައް ބަރުކޮށްފައި ހުއްޓެވެ.
މި ހާދިސާގައި 30 އަށްވުރެ ގިނަ މީހުން ޒަޚަމްވެފައިވާއިރު، އޭގެ ތެރެއިން ބައެއް މީހުންގެ ހާލު ސީރިއަސް ކަމަށް ޚަބަރު ލިބެއެވެ. ޒަޚަމްވި މީހުންނަށް މިހާރު ދަނީ އަވަށްޓެރި ނަންގަރްހާރު ޕްރޮވިންސްގެ ހޮސްޕިޓަލްތަކުގައި ފަރުވާ ދެމުންނެވެ. މި އާއިލާތަކަކީ ކުނާރު ޕްރޮވިންސްގައި ވަގުތީ ގޮތުން މަޑުކުރުމަށްފަހު، ވެރިރަށް ކާބުލްއަށް ދިއުމަށް ދަތުރުކުރި ބައެކެވެ.
މި ހާދިސާއާ ގުޅިގެން އަފްޣާނިސްތާނުގެ ސަރުކާރުން ވަނީ ހިތާމަ ފާޅުކޮށްފައެވެ. އަދި ނޭޝަނަލް ޑިޒާސްޓާ މެނޭޖްމަންޓް އޮތޯރިޓީން ވަނީ އަސަރުކުރި އާއިލާތަކަށް އެހީތެރިވުމުގެ ގޮތުން 730,000 އަފްޣާނީ (ގާތްގަނޑަކަށް 10,000 ޑޮލަރު) ގެ ކުއްލި މާލީ އެހީއެއް އިއުލާނުކޮށްފައެވެ.
އަފްޣާނިސްތާނަކީ ގަރުނުތަކެއް ވަންދެން ހިނގަމުންދާ ހަނގުރާމައިގެ ސަބަބުން މަގުތައް ހަލާކުވެ، އުޅަނދުފަހަރުގެ ފެންވަރު ދަށްވުމާއި ޓްރެފިކް ގަވާއިދުތަކަށް އަމަލުނުކުރުމުގެ ސަބަބުން މިފަދަ ނުރައްކާތެރި އެކްސިޑެންޓްތައް އާންމުކޮށް ހިނގާ ގައުމެކެވެ. އދ. ގެ ތަފާސްހިސާބުތަކުން ދައްކާގޮތުގައި، ޕާކިސްތާނުން ގަވާއިދާ ޚިލާފަށް އުޅޭ މީހުން ބޭރުކުރުމަށް ފަށާފައިވާ ހަރަކާތާ ގުޅިގެން މިއަހަރުގެ މިހާތަނަށް 447,000 އަށްވުރެ ގިނަ އަފްޣާން ރައްޔިތުން ވަނީ އެނބުރި ގައުމަށް އައިސްފައެވެ.
