ދިވެހިރާއްޖެ ބޮޑު ދަރަންޏެއްގައި އޮތް ނަމަވެސް، އެކަމުގެ ސަބަބުން ރަށްރަށުގެ ތަރައްޤީގެ ތަޞައްވުރަށް ހުރަސްއެޅިގެން ނުވާނެ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ޗެއާޕާސަންގެ އިންތިޚާބުގެ ކެމްޕޭނަށް ހއ. ހޯރަފުއްޓަށް ކުރެއްވި ޒިޔާރަތުގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، ރާއްޖޭގެ އިޤްތިޞާދީ ޙާލަތު ކިތަންމެ ދަތި ނަމަވެސް، ހޯރަފުށި ފަދަ ރަށްރަށުން މަސައްކަތް ކުރަންވީ އެ ރަށްރަށުގައި ހުރި ވަސީލަތްތަކާއި އުމްރާނީ ތަރައްޤީގެ ބޭނުން އެންމެ ފުރިހަމައަށް ހިފުމަށް ކަމަށެވެ.
”ހޯރަފުއްޓަކީ ދަރަނިވެރި ރަށެއް ނޫން؛ ދަރަނިވެރިވެފައިވަނީ މުޅި ރާއްޖެ،“ ރައީސް ނަޝީދު ވިދާޅުވިއެވެ.
އެމަނިކުފާނު ފާހަގަކުރެއްވި ގޮތުގައި ރާއްޖޭގެ މާލީ ޙާލަތު އޮތް ގޮތުން ރަށުގެ ތަރައްޤީއަށް ހުރަސްއެޅިގެން ނުވާނެއެވެ. ސަބަބަކީ ކުރިއަށްދާނެ ވަސީލަތްތަކާއި އުމްރާނީ ތަރައްޤީ އެ ރަށުގައި ހުރުމުންނެވެ.
މި ބައްދަލުވުމުގައި ރައީސް ނަޝީދު ވަނީ އެމްޑީޕީގެ ޗެއާޕާސަންގެ މަޤާމަށް އިންތިޚާބުވެވަޑައިގެންފިނަމަ، ޕާޓީގެ ސެކްރެޓޭރިއަޓްގައި ’ޕްރޮޖެކްޓް ޑިޕާޓްމަންޓް‘ އެއް އުފައްދަވާނެ ކަމަށް އިޢުލާން ކުރައްވާފައެވެ.
މި އިދާރާގެ މައިގަނޑު މަސައްކަތަކީ ކައުންސިލްތަކާ ގުޅިގެން ރަށްރަށުގެ ތަރައްޤީއާއި ތަސައްވަރުގެ މަޝްރޫޢުތައް ޙަޤީޤަތަކަށް ހެދުމަށް އެހީތެރިކަން ފޯރުކޮށްދިނުން ކަމަށް އެމަނިކުފާނު ވިދާޅުވިއެވެ.
ތިލަދުންމަތީގެ އެންމެ ތަރައްޤީވެފައިވާ އެއް ރަށުގެ ގޮތުގައި ހޯރަފުށި ސިފަކުރައްވަމުން ނަޝީދު ވިދާޅުވީ، އެ ރަށުގައި ގިނަ އިންވެސްޓްމަންޓްތަކެއް ކުރެވިފައިވާ ކަމަށެވެ. ނަމަވެސް، ފުރުޞަތުތައް ހޯދުމަށްޓަކައި ރަށުގެ އާބާދީ މަދުވަމުންދާ ދިއުމާމެދު އެމަނިކުފާނު ކަންބޮޑުވުން ފާޅުކުރެއްވިއެވެ.
އެމަނިކުފާނު ޤަބޫލުފުޅުކުރައްވާ ގޮތުގައި ތަރައްޤީ މިނެކިރަންވާނީ ހަމައެކަނި ހިންގޭ މަޝްރޫޢުތަކުން ނޫނެވެ. އޭގެ ބަދަލުގައި އެ މަޝްރޫޢުތަކުން ވަޒީފާ އުފެދި، އާމްދަނީ ލިބި، ރައްޔިތުންގެ ދިރިއުޅުމުގެ ފެންވަރު މަތިވާ މިންވަރަށް ބަލައިގެންނެވެ.
މަސްވެރިކަމުގެ ދާއިރާއަށް ކުރިމަތިވެފައިވާ ގޮންޖެހުންތަކަށް އަލިއަޅުއްވާލައްވަމުން ނަޝީދު ވިދާޅުވީ، ތެލުގެ އަގުބޮޑުވުމާއި މަހުގެ ފައިދާ ކުޑަވުމުގެ ސަބަބުން މަސްވެރިންނަށް ބޮޑެތި ދަތިތަކާ ކުރިމަތިވަމުންދާ ކަމަށެވެ. އަދި ބޮޑެތި ދޯނިފަހަރު ދުއްވާ ފަރާތްތަކަށް ޚަރަދުތައް ބޮޑުވެ، ލިބޭ މަންފާ ކުޑަވަމުންދާކަން އެމަނިކުފާނު ފާހަގަކުރެއްވިއެވެ.
ނިންމާލަމުން ރައީސް ނަޝީދު ވިދާޅުވީ، ހޯރަފުށީގައި ހުރި ވަސީލަތްތަކުގެ ބޭނުން ހިފައިގެން އިޤްތިޞާދީ ފުރުޞަތުތައް އިތުރުކުރުމަކީ ރަށުން މީހުން ހިޖުރަކުރުން ހުއްޓުވުމަށް އޮތް އެންމެ މުހިންމު މަގު ކަމަށެވެ. އެމަނިކުފާނު ވަނީ އެމްޑީޕީގެ ޗެއާޕާސަން ކަމަށް އިންތިޚާބުވެވަޑައިގެންފިނަމަ، ރަށްރަށުގެ މިފަދަ އިޤްތިޞާދީ ތަޞައްވުރުތައް ކާމިޔާބު ކުރުމުގައި ސާބިތުކަމާއެކު ހުންނަވާނެ ކަމުގެ ޔަޤީންކަން ދެއްވާފައެވެ.
