ދިވެހި އިންޖިނޭރުންގެ މަސައްކަތުގެ އަގުވަޒަންކުރުމަށް ދޭ ”އިންޖިނޭރުންގެ އެވޯޑު“ އަށް ކުރިމަތިލުމުގެ ފުރުޞަތު މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ އިން މިއަދު ހުޅުވާލައިފިއެވެ. މިއީ ރާއްޖޭގެ އިންޖިނޭރިންގ ދާއިރާގައި މަސައްކަތްކުރާ ފަރާތްތަކުގެ ހުނަރާއި ޚިދުމަތް ފާހަގަކުރުމަށް ދެވޭ ޝަރަފުވެރި އެވޯޑެކެވެ.
މި އެވޯޑުގެ މައިގަނޑު މަޤުޞަދަކީ އިންޖިނޭރިންގ ދާއިރާގެ ފަންނުވެރިކަން ފާހަގަކޮށް، އެ ދާއިރާއިން ކުރިއަށްދާން ބޭނުންވާ ޒުވާނުންނަށް ހިތްވަރުދީ، މި ދާއިރާއަށް ޒުވާނުން ޝައުޤުވެރިކުރުވުމެވެ. މިއީ ރާއްޖޭގެ އުމްރާނީ ތަރައްޤީގައި އިންޖިނޭރުން އަދާކުރާ މުހިންމު ދައުރުގެ އަގުވަޒަންކުރުމަށް އެޅުނު މުހިންމު ފިޔަވަޅެކެވެ.
ކޮންމެ އަހަރެއްގެ އޮގަސްޓު 30 ވަނަ ދުވަހަކީ ”ދިވެހިރާއްޖޭގެ އިންޖިނޭރުންގެ ދުވަސް“ ކަމުގައި ރައީސުލްޖުމްހޫރިއްޔާ ވަނީ ކުރިން ކަނޑައަޅުއްވާފައެވެ. މި އެވޯޑު ދިނުމަށް ހަމަޖެހިފައިވަނީ މި ދުވަހާ ގުޅުވައިގެން ބާއްވާ ޚާއްޞަ ރަސްމިއްޔާތެއްގައެވެ.
މިނިސްޓްރީން މަޢުލޫމާތު ދޭ ގޮތުގައި މި އެވޯޑު ދިނުމަށް ހަމަޖެހިފައިވަނީ ޖުމްލަ 10 ގިންތިއަކުންނެވެ. މީގެ ތެރޭގައި ވަކިވަކި ފަރުދުންގެ އިތުރުން، އިންޖިނޭރިންގ ދާއިރާގައި މަސައްކަތްކުރާ ކުންފުނިތަކަށްވެސް އެވޯޑަށް ކުރިމަތިލުމުގެ ފުރުޞަތު ވަނީ ހުޅުވާލެވިފައެވެ.
މި އެވޯޑަށް ނަން ހުށަހެޅުމުގެ ސުންގަޑިއަކީ އޮގަސްޓް 20 ވަނަ ދުވަހުގެ މެންދުރުފަހު 14:00 އެވެ. އެވޯޑަށް ކުރިމަތިލުމާ ގުޅޭ އިތުރު މަޢުލޫމާތާއި ފޯމު މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ ވެބްސައިޓުން ލިބެން ހުންނާނެ ކަމަށް އެ މިނިސްޓްރީން ބުނެއެވެ.
