ސްކޭމްގެ 3،000 މައްސަލައިގައި 35 މިލިއަނަށް ވުރެ ގިނަ ރުފިޔާ ގެއްލުނުއިރު، އޭގެތެރެއިން އަނބުރާ ހޯދުނީ 13 މިލިއަން ރުފިޔާ ކަމަށް ފުލުހުން ބުނެފިއެވެ.
ފުލުހުންގެ ތަފާސްހިސާބުތަކުން ދައްކާގޮތުގައި، 3،000 މައްސަލައިގައި އާންމުންގެ އަތުން 35 މިލިއަނަށްވުރެ ގިނަ ދިވެހި ރުފިޔާ ވަނީ ގެއްލިފައެވެ. މީގެ ތެރެއިން ފުލުހުންނަށް އަނބުރާ ހޯދިފައިވަނީ 13 މިލިއަނަށްވުރެ ގިނަ ރުފިޔާ ކަމަށް ފުލުހުންވަނީ ބުނެފައެވެ. މި މައްސަލަތަކުގެ ތެރެއިން، ގެއްލުނު ފައިސާ އެއްކޮށް އަނބުރާ ހޯދިފައިވަނީ 1,196 މައްސަލައެއްގައިކަމަށާއި އަދި 279 މައްސަލައެއްގައި ފައިސާގެ ބައެއް ހޯދިފައިވާއިރު، މިއީ ފައިސާ ގެއްލުމަށްފަހު އެ އަނބުރާ ހޯދުމަކީ ބުރަ މަސައްކަތެއް ކަމާއި، ބައެއް ހާލަތްތަކުގައި އެ ފައިސާ އެއްކޮށް ގެއްލިދިއުމުގެ ފުރުސަތު އޮތްކަން ތަފާސްހިސާބުތަކުންދައްކާކަމަށް ފުލުހުންވަނީ ބުނެފައެވެ.
މަކަރާއި ހީލަތުން ފައިސާ ހޯދުމަށް އެންމެ ގިނައިން ބޭނުންކޮށްފައިވަނީ އޮންލައިންކޮށް ވިޔަފާރިކުރުމުގެ ނަމުގައި ހިންގާ ”އީ-ކޮމާސް“ ސްކޭމްތަކެވެ. މިފަދަ 1,478 މައްސަލައެއް ރިޕޯޓްކޮށްފައިވާކަމަށް ފުލުހުންގެ ތަފާސްހިސާބުރތަކުން ދައްކައެވެ. މީގެ އިތުރުން ބޭރު ފައިސާ މާރުކުރުމުގެ ނަމުގައި ހިންގި 540 ސްކޭމްގެ މައްސަލައާއި، އެކި ފަރާތްތަކުގެ ނަމުގައި މީހުންނަށް އޮޅުވާލައިގެން ހިންގި (އިމްޕަރސަނޭޝަން) 439 މައްސަލަ ހިމެނެއެވެ.
އެ ސްކޭމްތައް ހިންގާފައިވާ ގޮތްތަކަށް ބަލާއިރު، އެންމެގިނަ މައްސަލަތައް ފުލުހުންނަށް ހުށަހަޅާފައި ވަނީ، ފޭސްބުކް މާކެޓްޕްލޭސް ބޭނުންކޮށްގެން ހިންގި ސްކޭމްތަކެވެ. އެ ބާވަތުގެ 1،093 މައްސަލަ ހުށަހެޅިއިރު، ވައިބާ މެދުވެރިކޮށް ހިންގި 911 މައްސަލަ ވަނީ ރިޕޯޓުކޮށްފައެވެ.
މީގެއިތުރުން، ފޯނު ކޯލާއި އައިބޭއާއި ޓެލެގްރާމާއި ވަޓްސްއަޕާއި އިންސްޓަގްރާމް އަދި ޓިކްޓޮކް މެދުވެރިކޮށް ސްކޭމްތައް ހިންގާފައިވާ ކަަމަށް ފުލުހުން ވަނީ ބުނެފައެވެ.
ފުލުހުން ވަނީ ރައްޓެއްސެއް ނޫނީ ގާތްތިމާގެ މީހެއް ޒާތީ މައުލޫމާތަކަށް އެދިއްޖެ ނަމަ، އެއީ އެ މީހާތޯ ކަށަވަރުކުރުމަށާއި، އެއްވެސް ހާލެއްގައި ޕިން ނަންބަރު ނުވަތަ އޯޓީޕީ ނަންބަރު ހިއްސާނުކުރަން އެދިފައެވެ.
ހަމަ އެހެންމެ އޮންލައިންކޮށް ފެންނަ ކޮންމެ އިޝްތިހާރަކީ، ނުވަތަ ލިބޭ ކޮންމެ މެސެޖަކާއި ކޯލަކީ ތެދު މައުލޫމާތު ކަމަށް ނުދެކުމަށާއި ފައިސާގެ މުއާމަލާތެއް ކުރުމުގެ ކުރިން ނުވަތަ އަމިއްލަ މައުލޫމާތެއް ހިއްސާކުރުމުގެ ކުރިން ވިސްނުމަށްވަނީ ނަސޭހަތްތެރިވެފައެވެ.
މުއާމަލާތް ކުރެވެނީ ކާކާތޯ ޔަގީންކުރުމަށާއި އަވަސް އަރުވާލައިގެން ފައިސާ ފޮނުވަން ކުރާ ޑިމާންޑްތަކަށް ސަމާލުވާށެވެ. އޯޓީޕީ، ޕާސްވޯޑް، ނުވަތަ ބޭންކިންގ މައުލޫމާތު އެއްވެސް ފަރާތަކަށް ހިއްސާނުކުރުމަށް އިލްތިމާސްކޮށްފައެވެ. އަދި ޝައްކުއުފެދޭ ކަމެއް ކުރިމަތިވެއްޖެނަމަ، ކަމާބެހޭ އިދާރާއަކަށް ލަސްނުކޮށް ހިއްސާކުރުމަށް ފުލުހުންވަނީ އިލްތިމާސްކޮށްފަވެއެވެ.
