ރާއްޖޭގައި މަސްތުވާތަކެތި ބޭނުންކުރުމަށް ”ޑްރަގު ކެފޭ“ ތަކުގެ ގޮތުގައި ހިންގަމުންދިޔަ 17 ތަނެއް މިހާތަނަށް ބަންދުކޮށްފައިވާ ކަމަށާއި، ކުރިއަށް އޮތް ނޮވެމްބަރު މަހާ ހަމައަށް މާލޭގައި އެފަދަ ހިދުމަތްދޭ ހުރިހާ ތަނެއް އެއްކޮށް ބަންދުކުރުމަށް އަމާޒު ހިފައި އޮޕަރޭޝަންތައް ކުރިޔަށް ގެންދާނެކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެ އެވެ.
އަހަރެއްހާ ދުވަސް ފަހުން ރޭ ކުރިޔަށް ގެންދިޔަ ”އަހާ“ ފޯރަމްގައި އިހުސާން ވިދާޅުވީ ވިދާޅުވީ، ޑްރަގު ކެފޭތަކުގެ ގޮތުގައި ހިންގި ތަންތަނުގެ ތެރެއިން މާލެއިން 12 ތަނަކާއި، އައްޑޫ ސިޓީން 4 ތަނެއްގެ އިތުރުން ފުވައްމުލަކު ސިޓީން އެއް ތަން މިހާތަނަށް ބަންދުކޮށްފައިވާ ކަމަށެވެ. މަސްތުވާތަކެތި ބޭނުންކުރުމަށް ކެފޭގެ އުސޫލުން ހިދުމަތްތައް ދީ، އެފަދަ ވިޔަފާރިތައް ހިންގުން ވަނީ އާންމުވާން ފަށާފަ އެވެ.
މިފަދަ ހިދުމަތްދޭ ތަންތަން ކޯޓު އަމުރަކާ ނުލައި 24 ގަޑިއިރަށް ބަންދުކުރުމުގެ ނޯޓިސް ނެރުމުގެ ބާރު ފުލުހުންނަށް ލިބޭގޮތަށް މަސްތުވާތަކެއްޗާ ބެހޭ ގާނޫނަށް ދާދިފަހުން ވަނީ އިސްލާހު ވެސް ގެނެސްފަ އެވެ. އެގޮތުން މިހާރު އަމަލު ކުރަމުންދާ މި ގާނޫނުގެ ދަށުން ކޯޓު މެދުވެރިކޮށް ގިނަވެގެން 3 މަސްދުވަހަށް އެފަދަ ތަންތަން ބަންދުކުރުމުގެ އަމުރު ލިބޭއިރު، އެ އަމުރާ ހިލާފުވެ ތަކުރާރުކޮށް އެކަން ކުރާނަމަ އެފަދަ ތަންތަން ދައުލަތަށް ނެގުމުގެ ބާރުވެސް ގާނޫނުން ވަނީ ލިބިދީފަ އެވެ. އަދި ކޯޓު އަމުރުގެ ދަށުން ބަންދުކުރާ ތަންތަނަށް ހުއްދަނެތި ވަދެނުކުމެ ހެދުމަކީ ވެސް ކުށެއްގެ ގޮތުގައި ކަނޑައަޅައި މަސްތުވާތަކެތި ގަނެ، ވިއްކައި އެ ބޭނުންކުރަން ތިބޭނެ ވަކި ތަނެއް ހިންގާނަމަ އެ ކުށަށް 5 އަހަރުގެ ޖަލު އަދަބަކާއި އެއްލަކަ ރުފިޔާއާއި ހަމައަށް ޖުރިމަނާ ކުރެވޭނެކަމަށް ގާނޫނުގައި ވެއެވެ.
މީގެއިތުރުން އެފަދަ ކަމެއް ހިނގާކަން އެނގިހުރެ އެކަން ދޫކޮށްލާފައިވާ ގޭގެ ވެރިފަރާތާއި ކުއްޔަށް ހިފާފައިވާ ފަރާތްތަކާމެދު ވެސް ހަރުކަށި ފިޔަވަޅު އެޅޭނެކަމަށް ގާނޫނު ބުނެ އެވެ.
ގާނޫނުން މިހާރު ބޮޑެތި ބާރުތައް ލިބިދީފައިވާތީ، އޮޕަރޭޝަންތައް ވަރުގަދަކުރެވިފައިވާކަން ފާހަގަކުރައްވައި އިހުސާން ވިދާޅުވީ މީގެކުރިން އެއް ތަނެއް ކިތަންމެ ގިނަ ފަހަރު އެފަދަ ތަނަކަށް ރެއިޑް ކުރި ނަމަވެސް، ޖެހިގެން އަންނަ ދުވަހު އަނެއްކާވެސް އެތަން ހުޅުވައިގެން ވިޔަފާރިކުރަމުންދިޔަ ކަމަށެވެ. ނަމަވެސް އެ މައްސަލަށް ވެސް މިހާރު ބޮޑު ހައްލެއް ލިބިފައިވާކަމަށް އިހުސާން ވިދާޅުވި އެވެ.
އިހުސާން ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ މައިގަނޑު ސިޔާސަތަކީ މަސްތުވާތަކެތި ބޭނުންކުރާ ފަރާތްތަކަށް އެކަށީގެންވާ ފަރުވާ ދިނުމާއެކު، އޭގެ ސަޕްލައި އެއްކޮށް ހުއްޓުވުން ކަމަށެވެ. އެގޮތުން ރާއްޖޭގައި މަސްތުވާތަކެތީގެ ވިޔަފާރިކުރާ 24 ނެޓްވޯކެއްގެ މައްސަލަ މިހާރުވެސް ބަލަމުން އަންނައިރު، ފާއިތުވި ދެ އަހަރާއި ބައިގެ ތެރޭގައި 1.5 ބިލިއަން ރުފިޔާގެ މަގުމަތީ އަގުހުރި 1.3 ޓަނުގެ މަސްތުވާތަކެތި އަތުލައިގަނެވިފައިވާކަމަށް ވަނީ ވިދާޅުވެފަ އެވެ.
