ތޫނު އެއްޗަކުން ހަމަލާދީ ސ. ހިތަދޫ، ވަރުދީގޭ، އަހުސަން ބަޝީރު މަރާލި މައްސަލައިގައި ކުށް ސާބިތުވެ މަރުގެ ހުކުމް އިއްވާފައިވާ އިބްރާހީމް ޝަހުމްގެ މައްސަލައިގެ ހުރިހާ އަޑުއެހުންތަކެއް ސުޕްރީމް ކޯޓުން ނިންމާލައި، ހުކުމް އިއްވުމުގެ މަރުހަލާއަށް ގޮސްފިއެވެ.
މި މައްސަލައަކީ ޝަހުމްގެ މައްޗަށް ކޮށްފައިވާ މަރުގެ ހުކުމަކީ ނިހާއީ ހުކުމެއްގެ ގޮތުގައި ކަނޑައެޅުމަށް ސުޕްރީމް ކޯޓުގައި ކުރިއަށްދާ މައްސަލައެކެވެ. މި މައްސަލައިގައި ހޯމަ ދުވަހު ބޭއްވި އަޑުއެހުމަކީ، ހުކުމް އިއްވުމުގެ ކުރިން މައްސަލައާ ގުޅޭގޮތުން ބައެއް ކަންކަން އިތުރަށް ސާފުކުރުމަށްޓަކައި ބޭއްވި އަޑުއެހުމެކެވެ.
ހޯމަ ދުވަހުގެ އަޑުއެހުމުގައި، މައްސަލަ ބައްލަވާ ފަނޑިޔާރުންގެ ބެންޗުން ކުރިން ކުރައްވާފައިވާ ސުވާލުތަކަށް ދައުލަތުގެ ފަރާތުންނާއި ޝަހުމްގެ ފަރާތުން ވަނީ ޖަވާބުދާރީވެފައެވެ. އަދި އޭގެ ފަހުން، މައްސަލައާ ގުޅިގެން ފަހު ބަސް ބުނުމުގެ ފުރުސަތު ދެފަރާތަށް ވެސް ފަނޑިޔާރުން އެރުވިއެވެ.
ދެފަރާތުގެ ވާހަކަތަކަށް ފަހު، މި މައްސަލައިގެ އަޑުއެހުންތައް މުޅިން ނިމުނީ ކަމަށް ފަނޑިޔާރުންގެ ބެންޗުން ވަނީ އިއުލާނު ކުރައްވާފައެވެ. އެހެންކަމުން، މި މައްސަލައިގައި ދެން އޮންނާނީ އެންމެ ފަހު މަރުހަލާ ކަމަށްވާ، ސުޕްރީމް ކޯޓުން މައްސަލައިގެ ފަހު ހުކުމް އިއްވުމަށް ބާއްވާ ޝަރީއަތުގެ މަޖިލީހެވެ.
މި މައްސަލައިގައި ދައުވާ އުފުލާފައިވަނީ މއ. ވީނަސްތަރި ހަސަން ޝިމާޒް މުހައްމަދު ސުވާދާއި ޝަހުމްގެ މައްޗަށެވެ. އެމީހުންގެ މައްޗަށް ކުށް ސާބިތުނުވާ ކަމަށް 2014 ވަނަ އަހަރު ކްރިމިނަލް ކޯޓުން ހުކުމް ކުރި އެވެ. ނަމަވެސް އެ ނިންމުން އިސްތިއުނާފު ކުރުމުން، ހައިކޯޓުން މިހާރު ވަނީ އެ ދެމީހުންގެ މައްޗަށް ކުށް ސާބިތުވާ ކަމަށް ކަނޑައަޅާފައެވެ.
އެ ދެމީހުންގެ މައްޗަށް ކުށް ސާބިތުވާކަމަށް ހައިކޯޓުން ނިންމީ ”ޑައިންގް ޑެކްލަރޭޝަން“ ނުވަތަ މަރުމަތީގައި ވެފައިވާ އިއުތިރާފަށް ބުރަވެއެވެ.
މީގެއިތުރުން، އަހުސަން މަރުވުމުގެ ކުރިން ހޮސްޕިޓަލުގައި އޮވެ، އޭނާ މަރާލީ ދައުވާލިބޭ މި ދެމީހުން ކަމަށް އެތަނުގައި ތިބި ބައެއް މީހުން ގާތުގައި ބުނެފައިވާކަންވެސް ހުކުމުގައި ފާހަގަކޮށްފައިވެއެވެ.
ހަމައެއާއެކު، ހާދިސާ ހިނގި ވަގުތު އެ ސަރަހައްދުގައި ޝަހުމް ހުރިކަމަށް ބައެއް ސިއްރު ހެކިން ބުނެފައިވާއިރު، ހަމަލާ ދިން މަންޒަރު ފެނުނު ކަމަށްވެސް ސިއްރު ހެކިވެރިޔަކު ވަނީ ހެކިބަސް ދީފައެވެ.
އަހުސަންގެ މަރުގެ ހާދިސާ ހިނގުމުގެ ކުރިން، 2010 ވަނަ އަހަރުގެ މެއި މަހު މާޒިޔާ ދަނޑު ކައިރީގައި ހިންގި ނުރައްކާތެރި މާރާމާރީއެއްގައި މ. ބިއުޓީފްލާވާ މުހައްމަދު ހުސައިން މަރާލި މައްސަލައިގައި ހައްޔަރު ކުރި މީހުންގެ ތެރޭގައި ވެސް ޝަހުމް ހިމެނެ އެވެ.
އަހުސަންއަށް ހަމަލާދީފައި ވަނީ އެ މައްސަލައިގައި ބަންދުކުރުމަށްފަހު ޝަހުމް ދޫކޮށްލާފައި ވަނިކޮށެވެ. ނަމަވެސް، ފަހުން މުހައްމަދު ހުސައިންގެ މަރުގެ މައްސަލައިގައި ދައުލަތުން އޭނާގެ މައްޗަށް އުފުލި ޓެރަރިޒަމްގެ ކުށް ސާބިތުވެ، ވަނީ އުމުރު ދުވަހުގެ ޖަލު ހުކުމެއް އިއްވާފަ އެވެ.
އެ ހުކުމް ތަންފީޒުކުރަމުން ދަނިކޮށް، 2014 ވަނަ އަހަރުގެ އޮކްޓޯބަރު 14 ގައި ޝަހުމް ވަނީ މާފުށީ ޖަލު ފަޅާލައި ފިލައިގެން މާލެ އައިސްފައެވެ. އޭނާ ހައްޔަރު ކުރީ ފިލައިގެން އުޅޭތާ ފަސް ދުވަސް ފަހުން، މާވެޔޮމަގުގައި ހުރި ގެސްޓްހައުސެއްގެ ތެރޭގައި ހުއްޓަ އެވެ.
