ރަސްމާލެ މަޝްރޫޢަކީ ރައްޔިތުންގެ ބޯހިޔާވަހިކަމުގެ ނަމުގައި ފަށައި، ގާނޫނުއަސާސީއާ ޚިލާފަށް އަދި ކޮރަޕްޝަނަށް މަގުފަހިވާ ގޮތަށް ކުރިއަށްގެންދާ މަޝްރޫޢެއް ކަމަށް ތުހުމަތުކޮށް، އެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅައިފިއެވެ.
މި މައްސަލަ އޭސީސީއަށް ހުށަހެޅުއްވީ، ގާނޫނީ ވަކީލު، އަދި ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސެއިނެވެ.
އީގަލް ހިލްސް އިން ރަސްމާލޭގެ އާބަން އޭރިއާގައި ދުނިޔޭގެ ފެންވަރުގެ މެރީނާއަކާއި، ޕްރިމިއަމް ރެޒިޑެންސްތަކާއި ރިސޯޓުތައް ހިމެނޭހެން ބިޔަ މަޝްރޫއެއް ހިންގަން ރާވާފައިވާއިރު، އިދިކޮޅު ސިޔާސީ ފަރާތްތަކުން ބުނަމުން ދަނީ މިއީ ރާއްޖޭގެ ބިން ނުއަގުގައި ބޭރުގެ ކުންފުންޏަކަށް ”ވިއްކާލުން“ ކަމަށެވެ. އަދި މި ނިންމުމަކީ ގާނޫނުއަސާސީއާ ހިލާފު ނިންމުމެއްކަމަށް ބުނެ، އެކަން ހުއްޓުވުމަށް އެދި އަލީ ހުސެއިންގެ ފަރާތުން ވަނީ ސުޕްރީމް ކޯޓަށް ދުސްތޫރީ މައްސަލައެއް ވެސް ހުށަހަޅާފައެވެ.
މި މައްސަލައާ ގުޅޭގޮތުން އަލީ ހުސައިން ވިދާޅުވީ، ރަސްމާލެ ހިއްކަން ފެށީ ވެސް ބަޖެޓުން ބޭރުން ގާނޫނުއަސާސީއާ ހިލާފަށް ކަމަށާއި، މި މަޝްރޫއު ކުރިއަށް ގެންދިޔައީ ރަށްރަށުގައި ފަށާފައި ހުރި ފެނާއި ނަރުދަމާ ފަދަ ރައްޔިތުންގެ އަސާސީ އެތައް މަޝްރޫއުތަކެއް ހުއްޓުވާލުމަށްފަހު ކަމަށެވެ. އަދި މި މަޝްރޫއުގެ ދަށުން 500 ހެކްޓަރުގެ ބޮޑު ބިމެއް އެއީ ގާތްގަނޑަކަށް 26 ރިސޯޓު ހެދޭނެ ވަރުގެ ސަރަހައްދެއް އެއްވެސް ބިޑް ކުރުމެއް ނެތި، ޒަޔަނިސްޓުންނަށް ވާގިވެރިވާ ބޭރުގެ ކުންފުންޏަކަށް ދިނުމުން ނުހަނު ކަންބޮޑުވާންޖެހޭކަމަށް އޭނާ ފާހަގަކުރެއްވިއެވެ.
އަލީ ހުސައިން ވިދާޅުވި ގޮތުގައި، އެކުއިޒިޝަން ކޮސްޓެއް ނެގުމެއް ނެތި ރާއްޖޭގައި ބޭރު މީހުން ދާއިމީކޮށް ވަޒަންވެރިކުރުވައި އާބާދުކުރުމަކީ މި ސަރުކާރުން ފަށަން އުޅޭ އާ ވިޔަފާރިއެކެވެ. މިއީ ރިސޯޓު ހިންގުމަށް ބިން ދިނުމާ މުޅިން ތަފާތު، ގައުމަށް ނުރައްކާތެރި ސީރިއަސް މައްސަލައެއްކަމަށް އޭނާ ވިދާޅުވިއެވެ.
އޭސީސީއަށް މި މައްސަލަ ހުށަހެޅި މައިގަނޑު ސަބަބުތަކުގެ ތެރޭގައި އެއްބަސްވުމުގެ އެއްވެސް ތަފުސީލެއް ހާމަކޮށްފައި ނުވުމާއި، ގާނޫނުއަސާސީއާ ހިލާފަށް ”ހުސްނުވާ 99 އަހަރަށް“ ނުވަތަ މުއްދަތެއް ނެތް ގޮތަށް ބިން ދޫކޮށްފައި އޮތުން ހިމެނެއެވެ. އެގޮތުން 99 އަހަރަށް ބިން ދިނުމަށްފަހު، އެތަނުގައި އަޅާ އިމާރާތްތައް ގަންނަ ފަރާތްތަކަށް އަނެއްކާވެސް އިތުރު 99 އަހަރު ދެވޭ ގޮތަށް އޮތުން ގާނޫނާ ކަނޑައެޅިގެން ހިލާފުކަމަށް އަލީ ހުސެއިން ވިދާޅުވި އެވެ.
އަލީ ހުސައިން ވަނީ ގައުމުގެ ސިޔާދަތާއި މިނިވަންކަމުގެ ދިފާއުގައި، އަމިއްލަ ވަޒީފާއަށް ބެލުމެއް ނެތި މިނިވަންކަމާއެކު މި މައްސަލަ ތަހުގީގުކޮށް ފިޔަވަޅު އެޅުމަށް އޭސީސީގެ މެންބަރުންނަށް ގޮވާލައްވާފައެވެ.
