ކަނޑުމަގުން ރާއްޖެއަށް ސިއްރުން އެތެރެކުރަން އުޅުނު 8 މިލިއަނަށްވުރެ ގިނަ ސިނގިރޭޓް ކަސްޓަމްސްއިން އަތުލައިގެންފިއެވެ.
ކަސްޓަމްސްއިން ސޯޝަލް މީޑިއާގައި ބުނެފައިވަނީ ސެޕްޓެންބަރު 27 ވަނަ ދުވަހު، މާލޭ ކޮމާޝަލް ހާބަރުގައި ހިންގި ޚާއްސަ އޮޕަރޭޝަނެއްގައި “ޖެނެރަލް ކާގޯ”ގެ ގޮތުގައި ޑިކްލެއަރކޮށްފައިވާ ޝިޕްމަންޓެއް ބަލާފާސްކޮށް، އެ ޝިޕްމަންޓުގެ ތެރެއިން ގިނަ އަދަދެއްގެ ސިނގިރޭޓް ފޮރުވާފައި ހުއްޓާ ފެނިފައިވާ ކަމަށެވެ.
އެގޮތުން ޖުމްލަ 8،527،480 ސިނގިރޭޓް ހޯދައި، ކަސްޓަމްސްގެ ބެލުމުގެ ދަށަށް ގެންގޮސްފައިވާ ކަމަށް ބުނެފައިވެއެވެ.
އެ މައްސަލަ މިހާރު ތަހުގީގުކުރަމުންދާކަމަށް ވެސް ކަސްޓަސްމްސްއިން ބުނެފައިވެއެވެ.
ދުންފަތުގެ އިމްޕޯޓު ޑިއުޓީ 2024 ވަނަ އަހަރު ބޮޑުކުރުމާއެކު ޑިއުޓީން ސަލާމަތްވުމަށް ވަގަށް ރާއްޖެއަށް ސިނގިރޭޓު އެތެރެކުރުމުގެ މައްސަލަތައް ފެންމަތިވިއެވެ. އެގޮތުން މީގެ ކުރިން ވެސް ވަގަށް އެތެރެކުރި ގިނަ އަދަދެއްގެ ސިނގިރޭޓު ކަސްޓަމްސްއިން އަތުލައިގެންފައިވެއެވެ.
ނަމަވެސް، މިހާރު ސަރުކާރުން ވަނީ އަނެއްކާވެސް ސިނގިރޭޓުގެ ޑިއުޓީ ކުޑަކޮށްފައެވެ.
