ރަސްމާލެ ތަރައްގީ ކުރުމުގެ މަޝްރޫއާ ގުޅިގެން ޔޫއޭއީގެ އީގަލް ހިލްސް ކުންފުންޏާއެކު ސަރުކާރުން ވެފައިވާ އެއްބަސްވުމުގައި ރައްޔިތުންނަށް އޮޅުވާލުންތަކަކާއި ބޮޑެތި ޝައްކުތަކެއް އެބަހުރި ކަމަށާއި، އެ އެއްބަސްވުމުގެ ހުރިހާ ތަފްސީލެއް ރައްޔިތުންނަށް ސާފުކޮށްދީ ހާމަކުރަންޖެހޭކަމަށް ރައްޔިތުންގެ މަޖިލީހުގެ ކެލާ ދާއިރާގެ ކުރީގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.
ސަންގުޓީވީގެ ”ޚަބަރަށްފަހު“ ޕްރޮގްރާމްގައި ޝަރީފް ވިދާޅުވީ، ސަރުކާރުގެ ފަރާތުން އެއީ ހަމައެކަނި އެމްއޯޔޫ ނުވަތަ ލެޓާ އޮފް އިންޓެންޓެއްކަމަށް ބުނެ ކަންކަން އޮއްބާލަން މަސައްކަތް ކުރި ނަމަވެސް، މަންޒަރު ފެންނަނީ އެހެން ނޫން ކަމަށެވެ. ޝަރީފް ވިދާޅުވި ގޮތުގައި އެމްއޯޔޫއެއް ނުވަތަ ލެޓާ އޮފް އަންޑަސްޓޭންޑިންއަކީ މަޝްރޫއެއްގެ ވަރަށް ފުރަތަމަ މަރުހަލާ ނަމަވެސް، ދުނިޔޭގެ ނުފޫޒުގަދަ އަދި މުއްސަނދި ކުންފުންޏެއްކަމަށްވާ އީގަލް ހިލްސްގެ ވެބްސައިޓުން ފެންނަން ހުރި ތަފްސީލީ ޕްލޭންތަކާއި، ރިއަލް އެސްޓޭޓް އުސޫލުން ތަންތަން ދޫކުރާނެ ގޮތްތަކާއި ކުރެހުންތަކުން ދޭހަވަނީ ދެ ފަރާތުގެ ދެމެދުގައި ވަރަށް ފުޅާ ދާއިރާއެއްގައި ކަންކަން އެއްބަސްވެ ނިމިފައިވާ ކަމެވެ.
ދެ ފަރާތުގެ ދެމެދުގައި ލިޔެކިޔުންތައް ބަދަލުކުރެވި، ކަންކަން އެއްބަސްވެ ނިމިފައި އޮތުމުން މެނުވީ ޑުބާއީގެ އެފަދަ ބޮޑު އަދި ނުފޫޒުގަދަ ކުންފުންޏެއްގެ ޗެއާމަން ރާއްޖެއާ ބެހޭގޮތުން އެފަދަ ވާހަކަތަކެއް ނުދައްކަވާނެކަމަށް އޭނާ ފާހަގަކުރެއްވިއެވެ.
ހަމައެކަނި ލެޓަރ އޮފް އިންޓްރެސްޓެއް ނުވަތަ އެމްއޯޔޫއެއް ނޫން މި ސޮއިކުރެވެން އުޅެނީއަކީ. އެއަށްވުރެ ބޮޑު އެއްބަސްވުމެއް ހަދައިގެން މި އުޅެނީ. ދެ ފަރާތުން ލިޔެކިޔުންތައް ބަދަލުކުރެވި، ކަންކަން ނިމިފައި އޮތީމަ ޑުބާއީގެ އެވަރުގެ ބޮޑު ކުންފުންޏެއްގެ ޗެއާމަން ރާއްޖެއާ ބެހޭގޮތުން އެފަދަ ވާހަކަތަކެއް އެ ދެއްކެވީ
މީގެއިތުރުން، ސަރުކާރު ބަންދު ގަޑިއެއްގައި ހައުސިންގ މިނިސްޓްރީގެ ލޮކަރު ހުޅުވައި، އޭގައި ހުރި ލިޔެކިއުންތަކެއް ނަގަން ބަޔަކު މަސައްކަތް ކުރިކަމަށް އަޑުފެތުރި، އަދި އެކަން ފުލުހުން ތަހުގީގުކޮށް ލިޔެކިޔުންތައް ގެއްލިފައި ނުވާކަމަށް ބުނެފައިވީ ނަމަވެސް، މި ހުރިހާ ކަމަކުން ވެސް ރައްޔިތުންނަށް ޝައްކުކުރުމުގެ ޖާގަ ލިބިގެންދާކަމަށް ޝަރީފް ވިދާޅުވި އެވެ.
ޝަރީފް ވިދާޅުވީ، ސަރުކާރުން ބުނާ ވަރަށް ވުރެ މާ ބޮޑު ކަންތައްތަކެއް މި މައްސަލައިގެ އަޑީގައި ހިނގަމުންދާ ކަމަށެވެ.
ޝަރީފް ވިދާޅުވީ މި ސަރުކާރު ވެރިކަމަށް އައީ ރައްޔިތުންނަށް އެއްވެސް ކަމެއް ނުފޮރުވާނެކަމަށް ބުނެ، ހުރިހާ އެއްބަސްވުންތަކެއް ހާމަކުރުމުގެ ރިޔާސީ ވައުދާއެކު ކަމަށެވެ. ހާއްސަކޮށް ޗާގޮސް މައްސަލައިގައި އެއްބަސްވުންތައް ވެސް ހާމަކުރާނެކަމަށް ބުނެ އައި ސަރުކާރަކުން، ރަސްމާލެ އެއްބަސްވުން ހާމަކުރުމުގައި ފަސްޖެހޭތީ ރައްޔިތުންނާއި ސިޔާސީ ފަރާތްތަކުން ކަންބޮޑުވުން ފާޅުކުރަމުންދާކަމަށް އޭނާ ވިދާޅުވި އެވެ.
މީގެއިތުރުން ޝަރީފް ފާހަގަކުރެއްވި ގޮތުގައި، ހެދިފައި ހުރި ގާނޫނުތަކާއި ގަވާއިދުތަކުގެ ތެރެއިން ރިއަލް އެސްޓޭޓް އުސޫލުން ތަންތަން ތަރައްގީކޮށް ވިއްކުމަކީ އެއްވެސް ރައްޔިތަކު ދެކޮޅު ހަދާނެ ކަމެއް ނޫނެވެ. ނަމަވެސް، ރައްޔިތުންނަށް ބޯހިޔާވަހިކަން ހޯދައިދިނުމަށާއި، ރާއްޖޭގައި ގެދޮރު ނެތް އެކަކުވެސް ނުހުންނާނެކަމަށް ބުނެ ތަކުރާރުކޮށް ވާހަކަދައްކައި ވައުދުތައްވެ، ހިއްކި ބިމުން ބޮޑު ބައެއް ވަކި ހިސާބަކުން ވިއްކާލަން ނިންމުމުން އެއީ ބަލައިގަނެވޭނެކަމެއް ނޫންކަމަށް ވިދާޅުވިއެވެ.
ހެދިފައި ހުރި ގާނޫނުތަކާއި ގަވާއިދުތަކުގެ ތެރެއިން ރިއަލް އެސްޓޭޓް އުސޫލުން ތަންތަން ތަރައްގީކޮށް ވިއްކުމަކީ އެއްވެސް ރައްޔިތަކު ދެކޮޅު ހަދާނެ ކަމެއް ނޫން. އެކަމަކު ރައްޔިތުންގެ ބޯހިޔާވަހިކަމުގެ ނަމުގައި، ރާއްޖޭގައި ގެދޮރު ނެތް އެކަކުވެސް ނުހުންނާނެ ކަމަށް ބުނެ ތަކުރާރުކޮށް ވާހަކަ ދައްކަމުން ގޮސް، ވެލިފުންޏެއް އަޅައި ހިއްކި ބިމުން ބޮޑު ބައެއް ވަކި ހިސާބަކުން ވިއްކާލަން ނިންމުމުން އެއީ ބަލައިގަނެވޭނެ ކަމެއް ނޫން
ރަސްމާލެއިން 500 ހެކްޓަރަށް ވުރެ ބޮޑު ބިން ޔޫއޭއީގެ އީގަލް ހިލްސް ކުންފުންޏަށް 99 އަހަރަށް ދިނުމަށް ދިވެހި ސަރުކާރުން ވެފައިވާ އެއްބަސްވުމާ ގުޅިގެން ރައްޔިތުންގެ މެދުގައާއި އިދިކޮޅު ސިޔާސީ ޕާޓީތަކުގެ މެދުގައި ބޮޑެތި ހިޔާލުތަފާތުވުންތަކެއް ވަނީ އުފެދިފައެވެ.
މި މައްސަލަ މަޖިލީހުގެ ކުރީގެ މެމްބަރު އަދި ގާނޫނީ ވަކީލު އަލީ ހުސެއިން ވަނީ އެ އެއްބަސްވުމަކީ ގާނޫނުއަސާސީއާ ހިލާފު އެއްބަސްވުމެއްކަމަށް ކަނޑައަޅައިދިނުމަށް އެދި ސުޕްރީމް ކޯޓަށް ދުސްތޫރީ މައްސަލައެއް ހުށަހަޅުއްވާފައެވެ. އަދި ބަޖެޓުން ބޭރުން ރަސްމާލެ ހިއްކައި، ބިޑް ކުރުމަކާ ނުލައި އީގަލް ހިލްސްއާއެކު އެއްބަސްވުމެއް ގާއިމުކޮށްފައިވާތީ، އޭގައި ކޮރަޕްޝަން އެކުލެވޭ ކަމަށް ތުހުމަތުކޮށް އެންޓި-ކޮރަޕްޝަން ކޮމިޝަން (އޭސީސީ) އަށް ވެސް ވަނީ މައްސަލަ ވައްދާފައެވެ.
މި ފާޑުކިޔުންތަކާއި ތުހުމަތުތަކާ ގުޅިގެން ބަންޑާރަނައިބު އަހުމަދު އުޝާމް ވިދާޅުވެފައިވަނީ، ”މޯލްޑިވްސް ވޯޓާފްރޮންޓް އެންޑް މެރީނާ މަޝްރޫއު“ ހިންގަން އީގަލް ހިލްސްއާ އެކު ސޮއިކުރީ ހަމައެކަނި ލެޓާ އޮފް އިންޓެންޓް ނުވަތަ ކޮމާޝަލް ޓާމްސް އެގްރީމެންޓެއްގައި ކަމަށެވެ.
އުޝާމް ވިދާޅުވީ، މަޝްރޫއު އަމަލީ ގޮތުން ފެށުމުގެ ކުރިން މިހާރު ވެވިފައިވާ އެއްބަސްވުމުގައިވާ ޝަރުތުތަކުގެ މައްޗަށް ބިނާކޮށް، ދެފަރާތުގެ މެދުގައި އިތުރަށް މަޝްވަރާކޮށްގެން އެކުލަވާލާ ޑެފިނިޓިވް އެއްބަސްވުންތަކެއްގައި ސޮއިކުރަންޖެހޭނެ ކަމަށެވެ. އަދި އެއާއެކު މިކަމާ ގުޅުންހުރި ގާނޫނުތައް ރައްޔިތުންގެ މަޖިލީހުން ފާސްކުރުމަކީ ވެސް މި މަޝްރޫއު ކުރިއަށް ގެންދިއުމަށް ކޮންމެހެން ފުރިހަމަކުރަންޖެހޭ ޝަރުތެއްކަމަށް އޭނާ ވިދާޅުވިއެވެ.
