ރާއްޖޭގައި މިހާތަނަށް އެޗްއައިވީ ޖެހިގެން 71 ފަރާތެއް ރިޕޯޓްކޮށްފައިވާ ކަމަށާއި އޭގެ ތެރެއިން މިހާރު ދުނިޔޭގައި ތިބީ 53 މީހުން ކަމަށް ސިއްހަތާއި އާއިލާއާއި އިޖުތިމާއީ އެހީއާ ބެހޭ ވަޒީރު ޑރ. ގީލާ އަލީ ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ވިދާޅުވީ، އާބާދީގެ ނިސްބަތުން ބަލާއިރު ރާއްޖޭގައި މި ބަލި ޖެހިފައިވަނީ 0.01 އިންސައްތަ މީހުންނަށް ކަމަށެވެ.
”މިވަގުތު އެޗްއައިވީ ޖެހިގެން އަޅުގަނޑުމެނަށް ރިޕޯޓުކުރެވިފައިވަނީ 71. އަދި ސަވައިވިންގ ކޭސަސް އަކީ 53،“ ގީލާ ވިދާޅުވިއެވެ.
އެޗްއައިވީ އަކީ 1991 ވަނަ އަހަރުން ފެށިގެން ރާއްޖެއިން ފެންނަމުންދާ ބައްޔެއްކަން ފާހަގަކުރައްވައި ވަޒީރު ވިދާޅުވީ، އޭރުންސުރެ ރައްޔިތުން ހޭލުންތެރިކުރުމަށް ފުޅާ ދާއިރާއެއްގައި ޕްރޮގްރާމްތައް ހިންގަމުންދާ ކަމަށެވެ. އަދި ދުނިޔޭގެ ނިސްބަތަށް ބަލާއިރު ރާއްޖޭގައި ބަލި ޖެހިފައިވާ މީހުންގެ އަދަދު މަދުކަމަށާއި، ބަލި ކޮންޓްރޯލް ކުރުމުގެ ޕްރޮގްރާމްތައް އެކަށޭނަ ގޮތެއްގައި ކުރިއަށްދާ ކަމަށް ވެސް ވިދާޅުވިއެވެ.
ވަޒީރު ގީލާ ވިދާޅުވީ އެޗްއައިވީ ޖެހިފައިވާކަން އެނގުމާއެކު އެ ބައްޔަށް ދޭ އެންމެ ރަނގަޅު ބޭސް ސަރުކާރުން ފޯރުކޮށްދެމުން އަންނަ ކަމަށެވެ. މީގެ އިތުރުން ކޮންޓެކްޓް ޓްރޭސިން ހަދައި ބަލި ފެތުރިދާނެ ގޮތްތަކާ ގުޅޭ މައުލޫމާތު ދިނުމާއި، އާއިލާތަކަށް ބޭނުންވާ ކައުންސެލިންގ ދިނުމުގެ މަސައްކަތް ވެސް ޕްރޮގްރާމްގެ ދަށުން ކުރިއަށްދާ ކަމަށް ވިދާޅުވިއެވެ.
ރާއްޖޭގައި އެޗްއައިވީއަށް ގިނައިން ޕޮޒިޓިވްވެފައި ވަނީ ރައްކާތެރި ނޫން ގޮތުގައި ޖިންސީ ގުޅުން ހިންގުމުގެ ސަބަބުން ކަމަށާއި، ލޭ އަޅާ މީހުންނާއި މަސްތުވާތަކެތި ބޭނުންކުރާ މީހުންނަކީ މި ބަލީގެ ނުރައްކާ އޮތް ބައެއް ކަމަށް ވަޒީރު ފާހަގަކުރެއްވިއެވެ. އެހެންނަމަވެސް ބަލި މީހުންގެ ގަޔަށް ލޭ އެޅުމުގެ ކުރިން ހަދަންޖެހޭ ހުރިހާ ޓެސްޓުތަކެއް ހަދައި، ރާއްޖޭގައި ވަރަށް ރައްކާތެރިކަމާއެކު ލޭ ޓްރާންސްފިއުޒް ކުރެވެމުންދާ ކަމުގެ ޔަގީންކަން ވަޒީރު ވަނީ ދެއްވާފައެވެ.
