އެއް މަސް ދުވަހުގެ ޗުއްޓީއަކަށް ފަހު އަންނަ ހޯމަ ދުވަހު މަޖިލީހުގެ ޖަލްސާތައް ފަށަން ތާވަލުކޮށްފިއެވެ.
މަޖިލީހުގެ މި އަހަރުގެ ތިންވަނަ ދައުރުގެ ފުރަތަމަ ޖަލްސާ އަންނަ ހޯމަ ދުވަހު ބާއްވަން ތާވަލުކޮށްފައިވާއިރު، އެ ޖަލްސާއަށް އެޖެންޑާކޮށްފައިވާ ކަންކަމުގެ ތެރޭގައި ހިމެނެނީ:
- ޑެޕިއުޓީ ކޮމިޝަނާ އޮފް ޓެކްސޭޝަންގެ މަގާމަށް ބޭފުޅަކު އައްޔަންކުރުމަށް ރައީސުލްޖުމްހޫރިއްޔާ ފޮނުވާފައިވާ މައްސަލަ ދިރާސާކޮށް ގޮތެއް ނިންމުމަށް ކޮމިޓީއަށް ފޮނުވުން
- ”މައްކަތުލް މުކައްރަމާ ކޮންވެންޝަން އޮފް ދަ މެމްބަރ ސްޓޭޓްސް އޮފް ދަ އޮގަނައިޒޭޝަން އޮފް އިސްލާމިކް ކޯޕަރޭޝަން އޮން އެންޓި ކޮރަޕްޝަން ލޯ އެންފޯސްމަންޓް ކޯޕަރޭޝަން“ގައި ރާއްޖެއިން ބައިވެރިވުމަށް ރައީސުލްޖުމްހޫރިއްޔާ ފޮނުވާފައިވާ މައްސަލަ ދިރާސާކޮށް ގޮތެއް ނިންމުމަށް ކޮމިޓީއަށް ފޮނުވުން
- ސަރުކާރުގެ ފަރާތުން ފުވައްމުލަކު މެދު ދާއިރާގެ މެމްބަރު އަލީ ފަޒާދު ހުށަހަޅުއްވާފައިވާ ކުށްކޮށްގެން ހޯދާފައިވާ މުދަލާ ބެހޭ ބިލުގެ މަސައްކަތް
އެއް މަހުގެ ޗުއްޓީއަކަށްފަހު މި އަހަރުގެ ތިން ވަނަ ދައުރުގެ ޖަލްސާތައް ފަށަން ތާވަލުކޮށްފައިވާއިރު، މަޖިލީހުގެ ޖަލްސާއެއް އެންމެ ފަހުން ބާއްވާފައިވަނީ މިދިޔަ އޮގަސްޓް މަހުގެ 26 ވަނަ ދުވަހުއެވެ.
ރަސްމާލޭގައި ”މޯލްޑިވްސް ވޯޓާ ފްރަންޓް އެންޑް މެރީނާ“ މަޝްރޫއު ހިންގަން މަގުފަހިކުރުމުގެ ގޮތުން އާ ރިއަލް އެސްޓޭޓް ގާނޫނަކާއި އިތުރު ގާނޫނުތަކެއް ފާސްކުރަންޖެހޭ ކަމަށް އެޓާނީ ޖެނެރަލް އަހުމަދު އުޝާމް ވިދާޅުވެފައިވާއިރު، އެ ގާނޫނުތަކުގެ މަސައްކަތްތައް ވެސް މަޖިލީހުގެ ފެށޭ ދައުރުގެ ތެރޭގައި ކުރިއަށް ދާނެ ކަމަށް ބެލެވެއެވެ.
