މާލެ އުތުރު ފަރާތު ބަނދަރު ބޭނުންކުރުމުގައި ދިމާވާ ދަތިތަކަށް ޙައްލެއް ހޯދައިދިނުމުގެ ގޮތުން، އެ ސަރަޙައްދުގެ ޖެޓީތައް ތަރައްގީކުރުމަށް ނިންމައިފިއެވެ.
ބިނާރާއި ގެދޮރުވެރިކަމާއި އުމްރާނީ ތަރައްގީއާ ބެހޭ ވުޒާރާއިން ނެރުނު އިއުލާނެއްގައިވަނީ، މާލެ އުތުރު ފަރާތު ބަނދަރު ބޭނުންކުރުމުގައި ދިމާވާ ދަތިތަކަށް ޙައްލެއް ހޯދައިދިނުމުގެ ގޮތުން، އެ ސަރަޙައްދުގެ ޖެޓީތައް ތަރައްގީކުރުމުގެ އަމަލީ މަސައްކަތް ފެށުމަށް ހަމަޖެހިފައިވާ ކަމަށެވެ.
އެގޮތުން އެ ވުޒާރާއިން ނެރިފައިވާ އިއުލާނުގައި ވަނީ މަސްވެރިންގެ ޕާކު ސަރަޙައްދުން ފެށިގެން ނާދީ ގޯޅިއާއި ހަމައަށް އަޅާފައިވާ އުޅަނދުފަހަރު، 02 އޮކްޓޫބަރުވާ ހުކުރު ދުވަހުގެ ރޭގަނޑު 11:00 ގެ ކުރިން އެ ސަރަހައްދުން ނެގުމަށް އަންގާފައެވެ. އަދި މި ތާރީހުގެ ފަހުން ނުނަގައި ހުންނަ އުޅަނދުފަހަރު، ވުޒާރާގެ ފަރާތުން ނަގާނެ ކަމަށްވެސް އިއުލާނުގައިވެއެވެ.
އެ މަޝްރޫއަކީ މާލޭގެ އުތުރު ފަރާތު ބޮޑުތަކުރުފާނު މަގާއި ފަޅުތެރެ ޒަމާނީ ފެންވަރަށް ތަރައްގީކުރުމަށް ސަރުކާރުން ކުރިއަށްގެންދާ މުހިންމު މަސައްކަތެކެވެ.
