ދިރާގުގެ 38ވަނަ އަހަރީ ދުވަހާ ހަމައަށް ވާސިލުވީއިރު ރާއްޖޭގެ ޑިޖިޓަލް ޓްރާންސްފޯމޭޝަންގެ މޭސްތިރިއެއްގެ ގޮތުން ހޯދައިފައިވާ ކާމިޔާބީތައް ފާހަގަކުރަމުން، މި ދުވަހުގެ މުނާސަބަތުގައި ދިރާގުން ކަސްޓަމަރުންނަށް ހާއްސަ އޮފަރތަކެއް ތައާރަފްކޮށްފިއެވެ.
މި އޮފަރތައް އިއުލާނުކޮށްފައިވަނީ މިއަދު ދިރާގު ހެޑް އޮފީހުގައި ބޭއްވި ހާއްސަ ޕްރެސް ކޮންފަރެންސެއްގައެވެ. މި ޕްރެސް ކޮންފަރެންސްގައި އެ ކުންފުނީގެ އައު ސީއީއޯ އަދި އެމްޑީ ވަލްޑީ ފެރަޑާޒް ވެސް ވަނީ ބައިވެރިވެވަޑައިގެންފައެވެ.
މި ޕްރެސް ކޮންފަރެންސްގައި ވާހަކަދައްކަވަމުން ވަލްޑީ ވިދާޅުވީ ދިރާގުގެ 38ވަނަ އަހަރީ ދުވަސް ފާހަގަކުރަމުންދާއިރު، ދިވެހިރާއްޖެ ހޯދާފައިވާ ކުރިއެރުމާއި ކާމިޔާބީގެ ބާރުވެރިއެއްގެ ގޮތުގައި ދިރާގުން އަދާކޮށްފައިވާ މުހިންމު ދައުރަކީ ކުންފުންޏަށް ލިބޭ ވަރަށް ބޮޑު ފަހުރެއް ކަމަށެވެ. އެގޮތުން، ރާއްޖޭގެ އިގްތިސާދުގެ ދާއިރާއަށް، އަދި އެހެނިހެން ސިނާއަތްތަކަށް ލިބިފައިވާ ކުރިއެރުންތަކަކީ ދިރާގުގެ ބައިވެރިވުމާ ނުލައި ތަސައްވަރުކުރަން ވެސް ދަތި ކަންކަން ކަމށް ވަލްޑީ ވިދާޅުވިއެވެ.
”ދިވެހިރާއްޖޭގެ ރަށްތައް ގުޅުވައިދިނުމުން ފެށިގެން، ގައުމުގެ ޑިޖިޓަލް ބަދަލުތަކަށް މަގުފަހިކޮށްދިނުމާ ހަމައަށް، މުޅި ރާއްޖޭގެ ތަރައްގީގެ ބިންގާ އެޅުމުގައި ދިރާގުން ވަނީ ނުހަނު މުހިންމު ދައުރެއް އަދާކޮށްދީފައެވެ. މި ފުރުސަތުގައި، އަޅުގަނޑުމެންގެ ކަސްޓަމަރުންނާއި، ޕަރޓްނަރުންނާއި، ހިއްސާދާރުންނާއި، ރެގިއުލޭޓަރުންގެ އިތުރުން ދިވެހި ސަރުކާރުން އަޅުގަނޑުމެންނަށް ދެއްވަމުންގެންދަވާ އިތުބާރާއި އެއްބާރުލުމަށްޓަކައި ޝުކުރު ދަންނަވަމެވެ. އަދި ދިރާގުގެ ކާމިޔާބީގެ އަސްލުކަމުގައިވާ ދިރާގުގެ ހުނަރުވެރި އަދި ހީވާގީ ކުރީގެ އަދި މިހާރުގެ މުވައްޒަފުން ހޯދަމުންގެންދާ ކާމިޔާބީތައް ފާހަގަކޮށް، ޝުކުރާއެކު ސާބަސްދެމެވެ. އަޅުގަނޑުމެންގެ ކާމިޔާބު މާޒީއާއެކު ކުރިއަށް ފިޔަވަޅުއަޅާއިރު، ކުރިއަށް އޮތް ތަނުގައި ވެސް އެންމެ ފަހުގެ ޓެކްނޮލޮޖީގެ އެހީގައި، އެންމެ ފެންވަރުގެ ނެޓްވޯކްތަކާއި، ޑިޖިޓަލް އީޖާދުތައް ފޯރުކޮށްދިނުމުގެ މެދުވެރިއެއްގެ ގޮތުގައި ދިވެހީންގެ ދިރިއުޅުން އިތުރަށް ފުރިހަމަކޮށް އުޖާލާކޮށްދިނުމުގައި އަޅުގަނޑުމެން ސާބިތުކަމާއެކު ދެމިތިބޭނެކަމުގެ ޔަގީންކަން އަރުވަމެވެ.“
ދިރާގުގެ 38ވަނަ އަހަރީ ދުވަހުގެ މުނާސަބަތުގައި ތައާރަފްކޮށްފައިވާ އޮފަތަކަކީ:
- 38ޖީބީ މުޅިން ހިލޭ: ދިރާގުގެ ޕްރީޕެއިޑް އަދި ޕޯސްޓްޕެއިޑްގެ ކޮންމެ ކަސްޓަމަރަކަށް ވެސް 1 އޮކްޓޫބަރު 2026ވަނަ ދުވަހު 38ޖީބީ މުޅިން ހިލޭ ލިބިގެންދާނެއެވެ. މި ހިލޭ ޑޭޓާ ދިރާގުއެޕް މެދުވެރިކޮށް އެކްޓިވޭޓްކުރުމަށްފަހު 24 ގަޑިއިރަށް ބޭނުންކުރެވޭނެއެވެ.
- 38 އައިޑީޑީ މިނިޓް މުޅިން ހިލޭ: ދިރާގުގެ ޕްރީޕެއިޑް ކަސްޓަމަރުންނަށް ބަންގްލަދޭޝް، އިންޑިއާ، ނޭޕާލް، ސްރީލަންކާ، ޕާކިސްތާން، ފިލިޕީންސް އަދި އިންޑޮނޭޝިއާއަށް ގުޅުމަށް 38 މިނެޓް މުޅިން ހިލޭ ލިބިގެންދާނެއެވެ.
- އައިވް: ދިރާގުން ވަނީ މި ހާއްސަ މުނާސަބަތުގައި އޭއައި މެދުވެރިކޮށް ފޯނު ކޯލްތަކަށް ޖަވާބުދީ، ފޯނު ކޯލުތައް މެނޭޖްކުރުމަށް ބޭނުންކުރެވޭނެ ”އައިވް“ ތައާރަފުކޮށްފައެވެ. މި ހިދުމަތައް ދިރާގުއެޕް މެދުވެރިކޮށް ސަބްސްކްރައިބްކުރެވޭނެއެވެ.
- އޯއެންޓީ ހިލޭ އަޕްގްރޭޑް: ދިރާގު ފައިބަރ ބްރޮޑްބޭންޑް ކަސްޓަމަރުންގެ ތެރެއިން ޝަރުތު ހަމަވާ ކަސްޓަމަރުންނަށް މިހާރު ބޭނުންކުރަމުންދާ ކުރީގެ ރައުޓަރ، ފަހުގެ ރައުޓަރއަކަށް މުޅިން ހިލޭ އަޕްގްރޭޑްކުރެވޭނެއެވެ.
- 38 ދުވަހުގެ ޕަރޓްނަރ ވައުޗަރސް: ދިރާގު ޕްރިޕެއިޑް އަދި ޕޯސްޓްޕެއިޑް ކަސްޓަމަރުންނަށް އެލީޓް ކްލަބްގެ 12 ޕަރޓްނަރ އައުޓްލެޓަކުން 38 ދުވަސް ވަންދެން ކޮންމެ ދުވަހަކު ވެސް ހިލޭ ވައުޗަރ ލިބިގެންދާނެއެވެ.
ކޮންމެ އައުޓްލެޓަކުން ވެސް އެ އައުޓްލެޓަކަށް އެންމެ ފުރަތަމަ ޒިޔާރަތްކުރާ 38 ކަސްޓަމަރުންނަށް ކޮންމެ ޕަރޓްނަރ އައުޓްލެޓަކުން އެއް ވައުޗަރު ހޯދުމުގެ ފުރުސަތު ލިބިގެންދާނެއެވެ. އެ ވައުޗަރތައް މެދުވެރިކޮށް ކެފޭ، ރެސްޓޯރަންޓް، ރީޓެއިލް ފިހާރަތަކުން ވިޔަފާރިކުރުމުގެ ފުރުސަތު އަދި ޗުއްޓީ ހޭދަކުރުމުގެ ފުރުސަތު ލިބިގެންދާނެއެވެ.
ދިރާގުން ދަނީ ރާއްޖޭގެ ޑިޖިޓަލް ޓްރާންސްފޯމޭޝަންގެ ދަތުރުގައި އެންމެ އިސްކޮށް ހަރަކާތްތެރިވެ ކަސްޓަމަރުންގެ ދިރިއުޅުމަށް އިތުރު ފުރިހަމަކަން ގެނެސްދިނުމަށް ގިނަ މަސައްކަތްތަކެއް ކުރަމުންނެވެ. އެގޮތުން 1988އިން ފެށިގެން ދިރާގުން ވަނީ ރާއްޖޭގެ ޑިޖިޓަލް ކުރިމަގު ބިނާކުރުމުގެ މުހިންމު ދައުރު އަދާކޮށްފައެވެ. އެ ކުންފުނިން ވަނީ ރާއްޖޭގައި އެންމެ ފުރަތަމަ ފަހަރަށް %100 މޮބައިލް ކަވަރޭޖް ފޯރުކޮށްދީ، ޒަމާނީ ހިދުމަތްތައް ތައާރަފްކޮށްފައެވެ. އޭގެ ތެރޭގައި ރާއްޖެއަށް 5ޖީގެ ހިދުމަތް ތައާރަފްކޮށް، މި ހިދުމަތްވަނީ ރާއްޖޭގެ އާބާދީގެ %73އަށް ފުޅާކޮށްފައެވެ. އަދި، ދިރާގުން ވަނީ ރާއްޖޭގެ %100 މީހުން ދިރިއުޅޭ ހުރިހާ ރަށަކަށް ފައިބަރ ބްރޮޑްބޭންޑްގެ ހިދުމަތް ފޯރުކޮށްދީފައެވެ.
