ސަރުކާރުން ރަސްމާލޭގައި އީގަލް ހިލްސް ކުންފުންޏާ ހަވާލުކޮށްގެން ކުރިއަށް ގެންދިއުމަށް ނިންމާފައިވާ މަޝްރޫއުގެ ހިތި ނަތީޖާއަކަށް ވާނީ އަނެއްކާވެސް އެކުވެރި ދައުލަތްތަކާ މޫނު ކެނޑުން ކަމަށް އެމްޑީޕީގެ ކުރީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އެމްޑީޕީގެ ކޮންގްރެސް ނިންމުމުގެ ރަސްމިއްޔާތުގައި ވާހަކަދައްކަވަމުން ޝާހިދު ވިދާޅުވީ ދުނިޔެ މިދަނީ ދުވަހުން ދުވަހަށް ބަވަނަވަމުން ކަމަށާއި އެކަކު އަނެކަކާ ނުލައި މި ދުނިޔޭގައި ނޫޅެވޭނެ ކަމަށެވެ. އަދި އެއް ގައުމާއި އަނެއް ގައުމުގެ ޑިޕްލޮމެޓިކް ގުޅުމަކީ މިއަދު ދުނިޔޭގެ އިގްތިސޯދުގެ ”ކަންވާރު“ ކަމަށާއި، އެ ކަންވާރު ބުރިވެއްޖެ ނަމަ ރާއްޖެ ފަދަ ކުޑަ ގައުމެއްގެ އިގްތިސޯދަށް އަންނާނީ ހީވެސް ނުކުރާ ފަދަ ލޮޅުމެއް ކަމަށް އޭނާ ފާހަގަކުރެއްވިއެވެ. މީގެއިތުރުން، މިކަމުގެ ނިކަމެތިކަން ތަހައްމަލު ކުރަންޖެހޭނީ އަމިއްލަ ވިޔަފާރިތަކަށާއި އާންމު ރައްޔިތުންނަށް ކަމަށްވެސް ވިދާޅުވިއެވެ.
ރަސްމާލޭގައި ހިންގަން ސަރުކާރުން ނިންމާފައިވާ މަޝްރޫއަކީ ވަރަށް ވިސްނަން ޖެހޭ ކަމެއްކަން ފާހަގަކުރައްވަމުން ޝާހިދު ވިދާޅުވީ،
”އެ މަޝްރޫއުއަކީ ޑިޕްލޮމެޓިކް ހާލަތުގެ ހަތަރު އަނގޮޅިއަކަށް ރާއްޖެ ގެންދާ ހިނދުކޮޅެއް. ޓްރާންސްޕޭރެންސީއާއި ގުޑް ގަވަރނެންސްގެ ކަންފުޅެއްވެސް އަދުގެ ސަރުކާރުގައި ނެތުމުން އެ ހެދިކަމަށް ބުނާ އެއްބަސްވުމުގައި އޮތް އެއްޗެއް ނެތް އެއްޗެއް އެނގޭ ހަމަ އެކަކުވެސް ނެތް. ދެން ރައްޔިތުންނަށް މިޖެހެނީ ސްޕެކިއުލޭޓް ކުރަން“ ކަމަށެވެ.
ރަސްމާލެއާއި އެނޫންވެސް ދިވެހި ދައުލަތާއި ބޭރުގެ ބޮޑެތި ކުންފުނިތަކާ ދެމެދު ވެވޭ އެއްބަސްވުންތައް ސިއްރު ނުކޮށް ހާމަކުރުމަށް ޝާހިދު ވަނީ ގޮވާލައްވާފައެވެ. އަދި ރައްޔިތުންގެ އިތުބާރު ލިބޭނީ ކަންކަން ހާމަކަން ބޮޑުކުރި މިންވަރަކުން ކަމަށްވެސް އޭނާ ވިދާޅުވިއެވެ.
މީގެއިތުރުން، ފުށިދިއްގަރުފަޅުގެ އެގްރީމެންޓަކީ އުފެދުމުގައިވެސް އޮޅުވާލައިފައިވާ (ޑިސެޕްޓަރ އެބް އިނިޝިއޯ) މަޝްރޫއެއް ކަމަށް ވިދާޅުވެ، އެ ތަން ހިއްކުމުގައްޔާއި ވެލިއެޅުމުގައި އަދި ހުރިހާ ދިމާއަކުންވެސް ވަނީ ބޮޑުތަނުން އޮޅުވާލާފައި ކަމަށް ޝާހިދު ވަނީ ތުހުމަތު ކުރައްވާފައެވެ.
