ށ. އަތޮޅު މަރޮށި، ޅައިމަގު އަދި ނަރުދޫގެ ޞިއްޙީ މަރުކަޒުގައި ލެބޯޓަރީގެ ޚިދުމަތް ފަށައިފިއެވެ.
މި ޚިދުމަތް އަލަށް ފަށާފައިވަނީ ށ. ނަރުދޫ އާއި، ޅައިމަގު އަދި މަރޮށީގައެވެ. މި ޚިދުމަތް ފައްޓަވައިދެއްވީ، ޞިއްޙަތާއި ޢާއިލާއާއި އިޖްތިމާޢީ އެހީއާއި ބެހޭ ވަޒީރު ގީލާ އަލީއެވެ.
މި ތިން ރަށުގައި ލެބޯޓަރީގެ ހިދުމަތް ފަށާފައިވަނީ ސިއްހަތާއި އާއިލާއާއި އިޖްތިމާޢީ އެހީއާއި ބެހޭ ވަޒީރު ގީލާ އަލީ ށ. އަތޮޅަށް މިހާރު ކުރައްވަމުން ގެންދަވާ ރަސްމީ ދަތުރުގެ ތެރެއިންނެވެ. އެގޮތުން، ޅައިމަގާއި މަރޮށީގައި އިއްޔެ މި ހިދުމަތް ފަށާފައިވާއިރު، ނަރުދޫ ސިއްހީ މަރުކަޒުގެ ލެބޯޓަރީ ހިދުމަތް ރަސްމީކޮށް އިފްތިތާޙު ކޮށްދެއްވީ މިއަދު އެރަށުގައި ބޭއްވި ހާއްސަ ރަސްމިއްޔާތެއްގައި ވަޒީރު ގީލާ އަލީއެވެ.
މި ރަސްމިއްޔާތުގައި ސިއްހީ ވުޒާރާގެ އިސްވެރިންނާއި، ނަރުދޫ ކައުންސިލްގެ މެންބަރުންގެ އިތުރުން ސިއްހީ މަރުކަޒުގެ އިސް މުވައްޒަފުން ބައިވެރިވެފައިވެއެވެ. ހިދުމަތް ފައްޓަވައިދެއްވުމަށްފަހު ވަޒީރު ވަނީ އަލަށް ގާއިމުކުރި ލެބޯޓަރީ ބައްލަވާލައްވައި، މަރުކަޒުގެ މުވައްޒަފުންނާއި އިސްވެރިންނާ ބައްދަލުކުރައްވައި މަޝްވަރާ ކުރައްވާފައެވެ.
ރާއްޖޭގެ މީހުން ދިރިއުޅޭ ހުރިހާ ރަށެއްގައި ލެބޯޓަރީގެ ޚިދުމަތް ޤާއިމުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ރިޔާސީ ވަޢުދުފުޅެކެވެ. އެގޮތުން މިހާތަނަށް ލެބޯޓަރީގެ ޚިދުމަތް ލިބެން ނެތް 76 ރަށެއްގައި މި ޚިދުމަތް ޤާއިމުކުރުމުގެ މަސައްކަތް ސަރުކާރުން މިހާރު އަންނަނީ ވަރަށް ބާރު ސްޕީޑެއްގައި ކުރިއަށް ގެންދަމުންނެވެ. ނަރުދޫގެ ލެބޯޓަރީއަކީ މިސަރުކާރުން އަތޮޅުތަކުގައި ހުޅުވި 21 ވަނަ ލެބޯޓަރީއެވެ.
އަބާދީގެ ގޮތުން ކުޑަ ނަމަވެސް ލެބޯޓަރީ ފަދަ ޚިދުމަތްތަކީ ކޮންމެ ރަށަކަށްވެސް ބޭނުންތެރި ޚިދުމަތެކެވެ. ލެބޯޓަރީގެ ޚިދުމަތް ނެތް ރަށްރަށުގެ ރައްޔިތުން އާންމު ޓެސްޓުތައް ހެދުމަށްޓަކައި އެހެން ރަށްރަށަށް ދަތުރުކުރަން ޖެހުމަކީ ބޮޑު ތަކުލީފެކެވެ. މީގެ ކުރިން ނަރުދޫ އަދި މިފަދަ އެހެން ރަށްރަށުގެ ރައްޔިތުންވެސް ކުޑަ ޓެސްޓެއް ހަދާލުމަށްޓަކައި ޖެހެނީ އަތޮޅުގެ ޚިދުމަތް ލިބޭ އެހެން ރަށަކަށް ދަތުރުކުރާށެވެ. ނަމަވެސް، މިއަދު ނަރުދޫ ޞިއްޙީ މަރުކަޒުގައި ލެބޯޓަރީ ޤާއިމުވެގެން ދިއުމާއެކު، އަމިއްލަ ރަށުގައި ތިބެގެން ލޭގެ ޓެސްޓުތަކާއި އެހެނިހެން ޓެސްޓުތައް ހެދުމުގެ ފުރުޞަތު މިވަނީ ތަނަވަސްވެފައެވެ.
