އެމްޑީޕީގެ ވެރިކަމެއްގައި ރައްޔިތުންނަށް ހަމަޖެހިލައިގެން މާބޮޑު ހާސްކަމެއް ފިކުރެއްނެތި އުޅެވޭކަމަށާއި ނަމަވެސް އެމްޑީޕީގެ ވެރިކަން ބަދަލުވާ ކޮންމެ ފަހަރަކު ޤާނޫނު އަސާސީ އަތަށް މަހާލާ ބޭނުން އެއްޗެއް ހަދަމުންދާކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.
އެމްޑީޕީގެ ކޮންގްރެސް ނިންމުމުގެ ރަސްމިއްޔާތުގައި، ފައްޔާޒު ވިދާޅުވީ، މި ސަރުކާރުން ތިން ބާރު މަސްހުނިކޮށް، ހުދުމުހުތާރުކަން އިސްކޮށްފައިވާ ކަމަށެވެ.
ރާއްޖޭގައި ކޮރަޕްޝަން އިންތިހާއަށް އެބައޮތް ކަމަށާއި އެ ޕާޓީން މީގެ 20 އަހަރު ކުރިން ގާނޫނުއަސާސީއަށް ބަދަލުތަކެއް ގެނައީ ތިން ބާރު ވަކިކުރެވިފައިވާ ނިޒާމަކުން ރައްޔިތުންނަށް ރައްކާތެރިކަން ލިބޭނެ ކަމުގެ ފޮނި އުންމީދުގައި ކަމަށް ވީނަމަވެސް، މި ސަރުކާރުން ތިން ބާރު މަސްހުނިކޮށް، ރައްޔިތުންގެ ހައްގުތައް ނިގުޅައިގަންނަމުންދާކަމަށް އޭނާ ވިދާޅުވިއެވެ. އަދި މިހާރު ރައްޔިތުން ތިބީ ވަރަށް ނާޒުކު ފައްތަރެއްގައި ކަމަށް ފައްޔާޒު ވިދާޅުވިއެވެ.
”އެމްޑީޕީގެ ވެރިކަމެއްގައި ހަމަޖެހިލައިގެން އުޅެވޭ. އެކަމަކު ވެރިކަން ބަދަލުވާ ކޮންމެ ފަހަރަކު މިފެންނަނީ ޤާނޫނު އަސާސީ އަތަށް މަހާލައިގެން ބޭނުން އެއްޗެއް ހަދަމުންދާތަން“ ފައްޔާޒު
ފައްޔާޒު ވިދާޅުވީ، މިއަދު ރައްޔިތުންނަށް ޑޮލަރެއް ނުލިބޭ ކަމަށާއި ތަކެތީގެ އަގު އިންތިހާއަށް ބޮޑުވެ، ސިއްހީ ނިޒާމު ވެސް އޮތީ ބޮއްސުންލާފައި ކަމަށެވެ. އަދި އެންމެ ކުޑަމިނުން ބޭސް ވެސް ނުލިބޭ ކަމަށް ފައްޔާޒު ވިދާޅުވިއެވެ.
މީގެއިތުރުން، ގައުމު މިހާރު މިއޮތް ހާލަތަށް ދިޔައީ ކީއްވެގެން ކަމާމެދު ވިސްނާލަން ޖެހޭކަމަށާއި، ގައުމުގެ ކަންކަން ބޮއްސުންލައިގެން ގޮސް އިގްތިސާދީ ގޮތުން ރާއްޖެ މިހާރު ވެއްޓިފައިވާ ހާލަތަށް ވެއްޓުނީ ގައުމު ހިންގާ ގޮތުގެ ނިޒާމުގެ ސަބަބުންކަމަށް ވެސް ފައްޔާޒު ވިދާޅުވިއެވެ.
މިއަދު ޒުވާނުން މާޔޫސްވެ ޤައުމު ދޫކޮށް ރާއްޖެއިން ބޭރަށް ދިރިއުޅުން ބަދަލު ކުރަމުންދާކަމަށް ފައްޔާޒު ވިދާޅުވިއެވެ. އަދި މިހާލަތަށް ޤައުމު ވެއްޓުމުން ދެން މިކަމާއި މެދު ވިސްނަންޖެހޭކަމަށް އޭނާ ވިދާޅުވިއެވެ.
”ޑޮލަރަށް ޖެހިއްޖެ، ކާޑަށް ޖެހިއްޖެ، ބޭހަށް ޖެހިއްޖެ. މި ހާލަތަށް ވެއްޓުނީމާ އެބަ ވިސްނަން ޖެހޭ ކިހިނެއްބާއޭ މިވަނީ… ނިޒާމުގެ މައްސަލައެއްހޭ މިއީ ވެރިޔާގެ މައްސަލައެއްބާއޭ. އަޅުގަނޑު ދަންނަވާނީ ނިޒާމުގެ މައްސަލައެކޭ“ ފައްޔާޒު
ފާއިތުވެދިޔަ 20 އަހަރުގެ ތެރޭގައި ދިވެހި ރައްޔިތުންނަށް އެމީހުންގެ ހައްޤުތަކެއް ވާކަން ބުނެދިނީ އެމްޑީޕީން ކަމަށާއި އެޕާޓީގެ ކޮންގްރެސްގެ ތެރެއިން ”ބޮޑު ބަދަލު“ ގެ ނަމުގައި ފާސްކުރެވުނު ނިޒާމުގެ ސަބަބުން ކުރިއަށް އޮތްތަނުގައި ރާއްޖޭގައި ވެރިކަން ކުރާ ފަރާތަކަށް ޤައުމަށް ބޮޑެތި ގެއްލުންތަކެއް ނުދެވޭނެކަމުގެ ފުރިހަމަ ޔަޤީންކަން އޭނާ ދެއްވިއެވެ.
