ރަސްމާލެއިން ބައެއް 99 އަހަރަށް ދޭން 58% މީހުން ބޭނުން ނުވާކަން ސަންގު ފޭސްބުކް ޕޯލްއިން ހާމަވެއްޖެއެވެ.
ޔޫއޭއީގެ މަޝްހޫރު ކުންފުންޏެއް ކަމަށްވާ އީގަލް ހިލްސްއާ ގުޅިގެން ރަސްމާލޭގައި 20 ބިލިއަން ޑޮލަރުގެ މެރީނާއެއް ތަރައްގީކުރުމަށް 500 ހެކްޓަރުގެ ބިން 99 އަހަރަށް ދިނުމަށް ސަރުކާރުން ވަނީ އެއްބަސްވުމަކަށް އައިސްފައެވެ. މިކަމާއި ގުޅިގެން ސަންގުން މިކަމުގައި އާއްމުންގެ ހިޔާލު ހޯދުމަށް ސެޕްޓެމްބަރު 30ގައި ވާނީ ޕޯލްއެއް ހުޅުވާފައެވެ.
މި ޕޯލްގެ ނަތީޖާ ދައްކާގޮތުން 58 ފަސެންޓު މީހުން މި މަޝްރޫއު މިގޮތަށް ހިންގަން ތާއިދު ނުކުރެއެވެ. އަދި 40 ޕަސެންޓު މީހުން މި މަޝްރޫއަށް ތާއިދު ކުރާއިރު، ދެ ޕަސެންޓު މީހުން ބުނަނީ އަދި މަޝްރޫއުއާއި ގުޅިގެން އެއްޗެއް ބުނަން އަވަސް ކަމަށެވެ.
ސަރުކާރުން އީގަލް ހިލްސްއާއިއެކު މި މަޝްރޫއު ކުރިއަށް ގެންދިޔުމަށް ނިންމާފައިވާއިރު، ގިނަ ބައެއްގެ ފާޑުކިޔުން ސަރުކާރަށް އަމާޒުވެފައިވެއެވެ. އެގޮތުން އެއްބަސްވުން އާއްމު ނުކުރަނީ ކީއްވެތޯ ގިނަ ބަޔަކު ދަނީ ސުވާލު އުފައްދަމުންނެވެ.
ރަސްމާލެއިން 500 ހެކްޓަރަށްވުރެ ބޮޑު ބިން ޔޫއޭއީގެ އީގަލް ހިލްސް ކުންފުންޏަށް 99 އަހަރަށް ދިނުމަށް ދިވެހި ސަރުކާރުން ވެފައިވާ އެއްބަސްވުމަކީ ގާނޫނުއަސާސީއާ ހިލާފު އެއްބަސްވުމެއް ކަމަށް ކަނޑައަޅައިދިނުމަށް އެދި ރައްޔިތުންގެ މަޖިލީހުގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން ވަނީ ސުޕްރީމް ކޯޓަށް ދުސްތޫރީ މައްސަލައެއް ވެސް ހުށަހަޅުއްވާފައެވެ.
މީގެއިތުރުން، ބަޖެޓުން ބޭރުން ރަސްމާލެ ހިއްކުމުގެ މަސައްކަތް ކުރިއަށްގެންދިއުމާއި، އެއްވެސް ބިޑް ކުރުމަކާ ނުލައި އީގަލް ހިލްސްއާއެކު އެއްބަސްވުމެއްގައި ސޮއިކޮށްފައިވާތީ، މި މުއާމަލާތުގައި ކޮރަޕްޝަން އެކުލެވޭކަމަށް ތުހުމަތުކޮށް އަލީ ހުސައިން ވަނީ މި މައްސަލަ އެންޓި-ކޮރަޕްޝަން ކޮމިޝަން (އޭސީސީ) އަށް ހުށަހަޅުއްވާފައެވެ.
މިކަމާ ގުޅިގެން އެޓާނީ ޖެނެރަލް އަހުމަދު އުޝާމް ވިދާޅުވީ، ”މޯލްޑިވްސް ވޯޓާފްރޮންޓް އެންޑް މެރީނާ މަޝްރޫއު“ ހިންގަން އީގަލް ހިލްސްއާއެކު މިހާތަނަށް ސޮއިކޮށްފައިވަނީ ހަމައެކަނި ލެޓާ އޮފް އިންޓެންޓް (ކޮމާޝަލް ޓާމްސް އެގްރީމެންޓެއް) ގައި ކަމަށެވެ. އަދި މަޝްރޫއު އަމަލީ ގޮތުން ފެށޭނީ އެ އެގްރީމެންޓުގައިވާ ޓާމްސްތަކުގެ މައްޗަށް ބިނާކޮށް، އިތުރަށް މަޝްވަރާކުރުމަށްފަހު އެކުލަވާލާ ޑެފިނިޓިވް އެއްބަސްވުންތަކެއްގައި ސޮއިކޮށްގެން ކަމަށް ވިދާޅުވިއެވެ.
