ދޮގު މަޢުލޫމާތާއި ފިތުނަ އުފެދޭ ފަދަ ކަންކަމުން ދުރުހެލިވެ، ޤައުމީ މަޞްލަޙަތު އިސްކޮށް، ޒިންމާދާރުކަމާއެކު ޚަބަރާއި މަޢުލޫމާތު ފެތުރުމަށް މޯލްޑިވްސް މީޑިއާ އެންޑް ބްރޮޑްކާސްޓިން ކޮމިޝަނުން ގޮވާލައިފިއެވެ.
ދިވެހިރާއްޖޭގެ ބްރޯޑްކާސްޓިންގ ދުވަހުގެ މުނާސަބަތުގައި އެމްއެމްބީސީން ނެރުނު ނޫސްބަޔާނެއްގައި ބުނީ ބްރޯޑްކާސްޓިންގ ދާއިރާ ތަރައްޤީކޮށް، ދާއިރާގެ މަސައްކަތްތެރިންގެ ޙައްޤުތައް ރައްކާތެރިކުރުމަށް ކޮމިޝަނުން ކުރަމުންދާ މަސައްކަތްތައް ހުއްޓުމެއްނެތި ކުރިއަށްގެންދާނެ ކަމުގެ ޔަޤީންކަންދޭ ކަމަށެވެ.
ޓެކްނޮލޮޖީގެ ގޮތުންނާއި މީޑިއާގެ ދާއިރާއަށް އަންނަމުންދާ ބަދަލުތަކާއެކު، ބްރޯޑްކާސްޓިންގ ދާއިރާ ކުރިއަރުވައި، ޒަމާނީ ވަސީލަތްތަކާއެކު ފެންވަރު ރަނގަޅު ޚިދުމަތްތަކެއް ރައްޔިތުންނަށް ފޯރުކޮށްދިނުމަށް ކޮމިޝަނުން އަބަދުވެސް މަސައްކަތް ކުރަމުން ގެންދާނެ ކަމަށްވެސް ވަނީ ބުނެފައެވެ.
މީގެއިތުރުން ދާއިރާގެ މަސައްކަތްތެރިންގެ ފަންނީ ތަމްރީނުތަކާއި، ޤާބިލުކަން އިތުރުކުރުމާއެކު ޤާނޫނާއި ޤަވާއިދުތަކުގެ އިމުގެ ތެރެއިން، މިނިވަން އަދި ޒިންމާދާރު ނޫސްވެރިކަމަކާއި ބްރޯޑްކާސްޓިންގ ވެއްޓެއް ޤާއިމުކުރުމަށް ބާރުއެޅުމަކީ ކޮމިޝަންގެ މައިގަނޑު އެއް އަމާޒުކަމަށް އެމްއެމްބީސީން ވަނީ ބުނެފައެވެ.
