ފުލުހުންގެ ހިދުމަތުގެ ރަސްމީ ތަރުޖަމާނުގެ މަގާމަށް އިންސްޕެކްޓާ އޮފް ޕޮލިސް އަހުމަދު ޝިޔާމް އައްޔަންކޮށްފިއެވެ.
މީގެ ކުރިން ވެސް ފުލުހުންގެ މީޑިއާ ޑިޕާޓްމަންޓް ހިންގެވުމުގައި އިސް ދައުރެއް އަދާކުރެއްވި އަދި ނޫސްވެރިންނާ ގާތްގުޅުމެއް އޮތް ޝިޔާމް މި މަގާމަށް ހަމަޖެއްސެވީ، ކުރިން ތަރުޖަމާނުގެ މަސްއޫލިއްޔަތު އަދާކުރައްވަމުން ގެންދެވި ސުޕްރިންޓެންޑެންޓް އޮފް ޕޮލިސް އަހުމަދު އާރިފްގެ ބަދަލުގައެވެ.
ފުލުހުން މީޑިއާތަކަށް ފޮނުވި މެސެޖެއްގައި ބުނި ގޮތުގައި، ގެނެވުނު މި ބަދަލާއެކު ދިވެހި ފުލުހުންގެ ހިދުމަތުގެ ފަރާތުން މީޑިއާތަކަށް މައުލޫމާތު ދިނުމާއި، އާންމުން ހޭލުންތެރިކުރުމުގެ މުއާމަލާތްތަކުގައި އެންމެ އިސްކޮށް ދެން މަސައްކަތް ކުރައްވާނީ އިންސްޕެކްޓާ އަހުމަދު ޝިޔާމެވެ.\
ޝިޔާމް މި މަގާމަށް އައްޔަނު ކުރީ، މީގެ 12 އަހަރު ކުރިން އޭނާ ވަޒީފާއިން ވަކިކުރި މައްސަލަ ކޯޓުގައި ކާމިޔާބުކޮށް، އަލުން ވަޒީފާ އިޔާދަކޮށްދީފައި ވަނިކޮށެވެ. ނޯތު ޕޮލިސް ޑިވިޝަންގެ ކޮމާންޑަރުގެ މަގާމުގައި ހުންނަވަނިކޮށް، މަގާމުގެ ނުފޫޒު ނަހަމަ ގޮތުގައި ބޭނުންކުރިކަމަށް ބުނެ މެއި 2014 ގައި އޭނާ ވަޒީފާއިން ވަކިކުރި މައްސަލައިގައި ސިވިލް ކޯޓުން ކުރިން ނިންމީ ވަޒީފާ އަލުން ދެވެން ނެތް ކަމަށެވެ.
ނަމަވެސް، އެ ނިންމުން ބަދަލުކޮށް ހައި ކޯޓުން ވަނީ ޝިޔާމް ވަޒީފާއިން ވަކިކުރީ އެކަށީގެންވާ ސަބަބެއް އޮވެގެންކަން ދައުލަތަށް ސާބިތުކޮށްދެވިފައި ނުވާތީ، އޭނާއަށް އަލުން ވަޒީފާ ދިނުމަށާއި ވަކިކުރި ދުވަހުން ފެށިގެން މުސާރައާއި އިނާޔަތްތައް ދިނުމަށް ހުކުމްކޮށްފައެވެ. އެ ހުކުމާ ގުޅިގެން މިދިޔަ ޖޫން މަހުގެ 3 ވަނަ ދުވަހު އޭނާ ވަނީ އަލުން ފުލުހުންގެ ހިދުމަތަށް ނުކުމެވަޑައިގެންފައެވެ.
