ޕެރޫގެ އެންޑީޒް ފަރުބަދަމަތީ ސަރަހައްދުން އަލަށް ފެނުނު މާގަހަކަށް، ދުނިޔޭގެ މަޝްހޫރު ފުޓުބޯޅަ ތަރި ލިއޮނަލް މެސީގެ ނަމުން ނަންދީފިއެވެ. މި ގަހަށް މެސީގެ ނަމުން ނަންދީފައިވަނީ އެ ގަހުގައި އަޅާ މާތަކުގެ ކުލަ، އާޖެންޓީނާގެ ގައުމީ ދިދަައިގެ ކުލަ ކަމަށްވާ މަޑު ނޫކުލައާއި ހުދުކުލައާ އެއްގޮތްވާތީއެވެ.
’ސަލްވިއާ މެސީ‘ ގެ ނަމުން ނަންދެވިފައިވާ މި ގަހުގެ ތަފުސީލުތައް ދިރާސާވެރިން ރަސްމީކޮށް އާންމުކޮށްފައިވަނީ 2026 ވަނަ އަހަރުގެ އޮކްޓޫބަރު މަހު ނެރުނު ’ފައިޓޯޓެކްސާ‘ ސައިންޓިފިކް މަޖައްލާގައެވެ. މި ހޯދުމަކީ ފުޓުބޯޅައިގެ ދާއިރާގައި މެސީ ހޯދާފައިވާ ބޮޑެތި ކާމިޔާބީތަކުގެ އަގުވަޒަންކުރުމުގެ ގޮތުން ސައިންސްވެރިން ދިން ހާއްސަ ޝަރަފެކެވެ.
މި ގަހަކީ ’ސަލްވިއާ‘ ޖިންސްގެ، ’މިންޓް‘ ނުވަތަ ކަނދޮޅު އާއިލާއަށް ނިސްބަތްވާ މާ އަޅާ ގަހެކެވެ. މި ގަސް ހެދެނީ ޕެރޫގެ އެންޑީޒް ފަރުބަދަތަކުގެ މެދުތެރެއާއި ދެކުނު ސަރަހައްދުތަކުގެ ހިލަގަނޑުތަކުގެ ތެރޭގައި، ކަނޑުގެ ސަތަހައަށްވުރެ 2,000 އާއި 2,400 މީޓަރު އުސްމިނުގައެވެ. ދިރާސާވެރިން ހާމަކުރި ގޮތުގައި، މި ގަސް ފެންނަކަން 2009 ވަނަ އަހަރުން ފެށިގެން އެނގިފައިވީ ނަމަވެސް، މިއީ މުޅިން އައު އަދި ވަކި ބާވަތެއްގެ ގަހެއްކަން ސައިންޓިފިކް ގޮތުން ކަށަވަރުކުރެވޭވަރަށް ބޭނުންވާ މައުލޫމާތާއި ސާމްޕަލްތައް ލިބިފައިވަނީ ދާދި ފަހުންނެވެ.
މި ގަސް ހެދެނީ ވަކި ހާއްސަ ސަރަހައްދެއްގެ ނާޒުކު މާހައުލެއްގައި ކަމަށްވާތީ، މިއީ ނެތިދިއުމުގެ ބިރު އޮތް ބާވަތެއްގެ ގޮތުގައި ސައިންސްވެރިން ވަނީ ކަނޑައަޅާފައެވެ. އެހެންކަމުން، މި ގަސް ދިގު މުއްދަތަކަށް ރައްކާތެރިކޮށް ދެމެހެއްޓުމަށްޓަކައި އެ ގަސް ހެދޭ ގުދުރަތީ މާހައުލު ހިމާޔަތްކުރުމުގެ މުހިންމުކަން ދިރާސާގައި ވަނީ ފާހަގަކޮށްފައެވެ.
ފުޓުބޯޅައިގެ ތާރީހުގައި އުފެދުނު އެންމެ މޮޅު އެއް ކުޅުންތެރިޔާ ކަމަށްވާ ލިއޮނަލް މެސީ ވަނީ އޭނާގެ ހަޔާތުގައި ގިނަގުނަ ކާމިޔާބީތަކެއް ހާސިލުކޮށްފައެވެ. އޭގެ ތެރޭގައި އަށް ފަހަރު ދުނިޔޭގެ އެންމެ މޮޅު ކުޅުންތެރިޔާގެ ’ބެލޮންޑޯ‘ އެވޯޑް ހޯދުމާއި، 2022 ވަނަ އަހަރު އާޖެންޓީނާއަށް ފީފާ ވޯލްޑް ކަޕް ކާމިޔާބުކޮށްދިނުން ހިމެނެއެވެ.
މިއީ މެސީގެ ނަމުން ދިރޭ އެއްޗަކަށް ނަންދެވުނު ފުރަތަމަ ފަހަރެއް ނޫނެވެ. މީގެ ކުރިން އާޖެންޓީނާއިން ފެނުނު ހޯނުގެ ބާވަތަކަށްވެސް ވަނީ ’ލިއޮލޭމަސް މެސީ‘ ގެ ނަމުން ނަންދީފައެވެ.
ޕެރޫގެ އެންޑީޒް ސަރަހައްދުން އަލަށް ފެނުނު މި ގަހުން ދައްކުވައިދެނީ، އެ ސަރަހައްދުގެ ގުދުރަތީ މުއްސަނދިކަމުގެ އިތުރުން، މެސީގެ މަގުބޫލުކަމާއި ސަގާފީ ނުފޫޒު ކުޅިވަރުގެ ދާއިރާއިން ބޭރުވެ، ސައިންޓިފިކް ދާއިރާއާ ހަމައަށްވެސް ފުޅާވެފައިވާ މިންވަރެވެ. މި ތާރީހީ ނިންމުމާއެކު، ފުޓުބޯޅައިގެ އިތުރުން ދުނިޔޭގެ ސައިންސްގެ ތާރީހުގައިވެސް މެސީގެ ނަން އަބަދަށް ދެމިއޮންނާނެއެވެ.
