ރިސޯޓެއްގެ ގޮތުގައި ތަރައްޤީކުރަމުން އަންނަ ރަށެއްގައި މަސައްކަތްކުރާ ބިދޭސީންތަކެއް ނިކުމެ އިހުތިޖާޖުކޮށް ހަމަނުޖެހުން ހިންގައިފިއެވެ.
މި ކަން ހާމަކޮށް ހޯމަދުވަހުގެރޭ ފުލުހުން ބުނީ، ހަމަނުޖެހުން ހިންގާފައިވަނީ ވ.އަތޮޅުގައި ރިސޯޓެއްގެ ގޮތުގައި ތަރައްޤީކުރަމުން އަންނަ ރަށެއްގައިކަމަށެވެ. ނަމަވެސް އެއީ ކޮން ރަށެއްކަމަެއް ފުލުހުން ހާމަކޮށްފައެއް ނުވެއެވެ.
ފުލުހުން ބުނީ އެ ރަށުގައި މަސައްކަތްކުރާ ބައެއް ބިދޭސީން ނިކުމެއެ ރަށުގައި މަސައްކަތްކުރަމުން އަންނަ އެހެންމީހުންގެ މަސައްކަތްތަކަށް ހުރަސްއަޅާއި ހަމަނުޖެހުން ހިންގާފައިވާކަމަށެވެ.
ފުލުހުން ބުނީ، އެ ރަށުގައި ބިދޭސީން ނިކުމެ ހިންގި ހަމަނުޖެހުމުގައި އެއްވެސް މީހަކަށް އަނިޔާއެއް ނުވާކަމަށެވެ. ނަމަވެސް އެ ބިދޭސީންގެ ސްޕަވައިޒަރުގެ ރޫމަށް ގެއްލުންތައްދީފައިވާކަމަށް ވެސް ފުލުހުން ބުނެއެވެ. މި ގޮތުން އެ މައްސަލަ ހައްލިކުރުމަށްޓަކައި، އެ ބިދޭސީންގެ ސްޕޮންސަރު އަންނަނީ، އެ މީހުންނާއި ވާހަކަދައްކަމުންކަމަށް ވެސް ފުލުހުން މަޢުލޫމާތުދީފައިވެއެވެ.
ވ.އަތޮޅުގައި ރިސޯޓެއްގެ ގޮތުގައި ތަރައްޤީކުރަމުން އަންނަ ރަށެއްގައި ބިދޭސީންތަކެއް ނިކުމެ ހަމަނުޖެހުން ހިންގާފައިވާއިރު، މިފަދަ މައްސަލަތައް އަންނަނީ ތަކުރާރުވަމުންކަން ފާހަގަކޮށްލެވެއެވެ. މި ގޮތުން ބ.ބޮޑުފިނޮޅުގައި ބިދޭސީންތަކެއް ނިކުމެ ހަމަނުޖެހުން ހިންގައި، ގިނަ ޢަދަދެއްގެ ދިވެހިން ރަހީނުކޮށް މުދަލަށްވަނީ ގެއްލުންތައްދީފައެވެ.
މީގެ އިތުރުން ހުޅުމާލޭގައި ފުލުހުންނާއި، ސިފައިންނަށް ޚާއްސަކޮށް ޢިމާރާތްކުރަމުން އަންނަ ފްލެޓްތައް އެޅުމުގެ މަސައްކަތްކުރާ ބިދޭސީންތަކެއް ވެސް ވަނީ ހަމަނުޖެހުން ހިންގައިފައެވެ. މުސާރަނުދީ އެތައްދުވަހެއް ދިގުދެމިގެން ގޮސްފައިވާތީ ބިދޭސީން ނިކުމެ ހިންގި މި ހަމަނުޖެހުން ހިންގާފައިވަނީ، މި ހިނަގާމަހުގެ 13 ވަނަ ދުވަހުގައެވެ. އެ ބިދޭސީންނަކީ އައިލެންޑް އެކްސްޕާޓްގައި މަސައްކަތްކުރާ ބިދޭސީންތަކެކެވެ.
