ކޮތަޅުން އަގުނަގަން ފެށުމާއިއެކު އުފެދިފައިވާ ކަންބޮޑުވުންތައް ހައްލުކޮށްދެއްވުމަށް މަޖިލީހަށް ހުށައަޅުއްވާނެކަމަށް މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.
ކޮތަޅަކުން ދެ ރުފިޔާ ނަގަން ފެށުމާއިއެކު، އުފެދިފައިވާ މައްސަލައަށް އަލިއަޅުވައި އިދިކޮޅުންނާއި އާންމުންވެސް ވަނީ ސަރުކާރަށް ގިނަ ފާޑުކިޔުންތަކެއް އަމާޒުކޮށްފައެވެ. މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް އުމަރުވަނީ މައްސަލައަށް ހައްލެއް ނުގެނެސް މަޖިލިސް ޗުއްޓީއަށް ނުދިއުމަށް އެދިވަޑައިގަންނަވާފައެެވެ.
ޝަރީފް ކުރެއްވި ޓްވީޓެއްގައި ވިދާޅުވީ، މަޖިލީހުގެ ޗުއްޓީ ރަސްމީގޮތުން ފެށުމަށް ކަނޑައެޅިފައިވަނީ މޭ މަހުގެ އެއް ވަނަ ދުވަހުގައިކަމަށެވެ. އެހެންކަމުން އަދި ޖަލްސާ ބާއްވައިގެން އުނި ކުރެވިފައިވާ މާއްދާ އިތުރު ކުރުމަށް ހަތަރު ދުވަސް އޮތްކަމަށް އޭނާ ފާހަގަކުރެއްވިއެވެ. ޝަރީފް ވިދާޅުވީ، ކުރިއަށް އޮތް ހަފްތާ އެއްކޮށް މަޖިލީހުގެ ޖަލްސާތައް ބާއްވައިގެން މައްސަލައަށް ހައްލެއް ގެނެސްދެއްވުމަށް މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް ގޮވާލައްވާކަމަށެވެ.
Majlis chuhtee rasmee koh fesheynee anna mahu eh vana dhuvahun feshigen kamah vaathee,maadhamai feshigen 4dhuvas eba oi jalsaa baavaigen Majlis in uni kuri maadhaa alun bill ithurukoh dheyn.Alhugadu govaalan @MohamedNasheed ah mi hafthaa ekkoh jalsa baavaigen mi masala nimman
— Ibrahim Shareef (@AdduShareef) April 23, 2023
ޝަރީފް ވިދާޅުވީ، ކުރިއަށް އޮތް ހަތަރު ޖަލްސާގެ ތެރޭގައި ކޮތަޅުގެ މައްސަލައަށް ހައްލެއް ގެނެވެންވާނެކަމަށެވެ. އެހެންކަމުން މާދަމާ ބޭއްވުމަށް ހަމަޖެހިފައިވާ މަޖިލީހުގެ ޖަލްސާގައި ވަގުތު އިތުރުކޮށްގެން ކޮތަޅުގެ މައްްސަލަ ހައްލުކުރެއްވުމަށް އޭނާ ހުށައަޅުއްވާނެކަމަށް ޝަރީފް ފާހަގަކުރެއްވިއެވެ.
ކޮތަޅުގެ މައްސަލައިގައި އުފެދިފައިވާ ކަންބޮޑުވުންތައް ހައްލުކޮށްދެއްވުމަށް މަސައްކަތްކުރައްވާނެކަމަށް ޝަރީފް ފާހަގަކުރެއްވިއިރު، ބައެއް ވިޔަފާރިތަކުން ކޮތަޅަކަށް ނަގަން ކަނޑައެޅިފައިވާ އަގަށްވުރެ ބޮޑު އަގެއް ނެގުމަށް ކަނޑައަޅައިގެން ކުރިއަށް ގެންދާކަމުގެ ޝަކުވާތައް ބައެއް ފަރާތްތަކުންވަނީ ސޯޝަލް މީޑިއާގައިވެސް ހިއްސާކުރައްވާފައެވެ. މީގެ އިތުރުން ދިވެހިރާއްޖޭގައި އެންމެ ގަދަޔަށް ރީޓެއިލް ވިޔަފާރި ކުރަމުންދާ އެއް ކުންފުނިކަމަށްވާ ރެޑްވޭވްއިންވަނީ އަމިއްލަ އިސްނެގުމުގެ މަތިން ހައްލުތަކެއް ގެނައުމަށްޓަކައި މަސައްކަތްތަކެއް ކޮށްފައެވެ. އެގޮތުން ކުރިން އެއް ރުފިޔާއަށް ކޮތަޅެއް ވިއްކުމަށް ކަނޑައެޅިފައިވާނަމަވެސް މިހާރު އެ އަދަދުވެސް ނުނެގުމަށް ނިންމާފައިވާކަން އެ ކުންފުނިންވަނީ ދާދި ފަހުން ހާމަކޮށްފައެވެ.
