ހިލްޓަން މައްސަލައިގައި ސިންގަޕޫރުން ޕާސްޕޯޓު ހިފަހައްޓާފައިވާ ރައްޔިތުންގެ މަޖިލީހުގެ މީދޫ ދާއިރާގެ މެމްބަރު، އަދި 2023 އަށް ރައީސް އިބްރާހިމް މުހައްމަދު ސޯލިހު ހަދާފައިވާ ކޯލިޝަން ޕާޓްނަރު އަހުމަދު ސިޔާމްގެ ދިފާއުގައި އެ ގައުމުގެ އިދާރާތަކަށް ދިވެހި ސަރުކާރުގެ ޚާރިޖިއްޔާއިން ފޮނުވިކަމަށް ބުނާ ސިޓީއެއް އާއްމުވެއްޖެ އެވެ.
ސިޔާމްގެ ކުންފުނިން ތަރައްގީ ކުރި ނ. އިރުފުށި ހިންގުމަށް ދުނިޔޭގެ މަޝްހޫރު ހޮޓެލް ޗެއިން ހިލްޓަން ކުންފުންޏާއި އެކު އެއްބަސްވުމެއް ހެދުމަށް ފަހު ސަންއިން އެ އެއްބަސްވުން ބާތިލު ކުރި މައްސަލައިގައި ބަދަލު ނަގައިދޭން ސިންގަޕޫރުގެ އާބިޓްރޭޝަނުން ވަނީ ނިންމާފަ އެވެ.
ސިޔާމްގެ ސަން ޓްރެވެލްސްގެ މައްޗަށް އާބިޓްރޭޝަނުން ހުކުމްކޮށްފައި ވަނީ، ނ. އިރުފުށި ރިސޯޓު ހިންގުމަށް ހިލްޓަންއާއި އެކު ހެދި އެއްބަސްވުން ބާތިލު ކުރި މައްސަލައިގަ އެވެ. ހުކުމުގައި ވަނީ އެ ކުންފުންޏަށް 24 މިލިއަން ޑޮލަރު ނުވަތަ ދިވެހި ފައިސާއިން ބަލާނަމަ 368 މިލިއަން ރުފިޔާގެ ބަދަލެއް ދިނުމަށެވެ. އެކަމަކު އެ މައްސަލައިގައި ހުކުމާއި އެއްގޮތަށް ސަން ކުންފުނިން ފައިސާ ދައްކާފައި ނުވާތީ، އެ ނިންމުން ތަންފީޒުކޮށްދޭން އެދި ހިލްޓަންގެ ފަރާތުން މައްސަލަ ސިންގަޕޫރުގެ ހައިކޯޓަށް ހުށަހެޅީ އެވެ.
މި މައްސަލައިގެ އަޑުއެހުމަކަށް ސިންގަޕޫރަށް ވަޑައިގަތުމުން ސިޔާމްގެ ޕާސްޕޯޓު ހިފަހައްޓައި ފުރުން މަނާ ކުރީ މިދިޔަ ހޯމަ ދުވަހު އެވެ. އަދި އިއްޔެ އެ ހަބަރުތައް މީޑިއާތަކައި އާއްމުވީއިރު، ޕާސްޕޯޓު ހިފެހެއްޓުމާއި އެކު އޭގެ ޖެހިގެން އައި ދުވަހު ރާއްޖޭގެ ފޮރިން މިނިސްޓްރީން ވަނީ ސިންގަޕޫރުގެ ހައިކޯޓަށް ރަސްމީ ސިޓީއެއް ފޮނުވާފަ އެވެ.
ސޯޝަލް މީޑިއާގައި ދައުރުވަމުން ދާ ސިޓީގެ ސައްހަކަން ކަށަވަރު ނުވީ ނަމަވެސް އެ ލިއުމުގައި ވަނީ، ސިޔާމަކީ ރައްޔިތުންގެ މަޖިލީހުގައި ދުވަސްވީ ސީނިއާ ފަސް މެމްބަރުންގެ ތެރެއިން އެއް މެމްބަރުކަމަށާއި މަޖިލީހުގެ ރައީސް ނެތް ހާލަތުގައި އޭނާ ރިޔާސަތު ވެސް ބަލަހައްޓާ ކަމަށެވެ.
ރާއްޖޭގައި ހިންގަމުން ދާ ހަތަރުވަނައަށް އެންމެ ބޮޑު ސިޔާސީ ޕާޓީގެ ލީޑަރު ކަމަށެވެ. ސިޔާމްގެ ދިފާއުގައި އެ ސިޓީގައި އިތުރަށް ބުނެފައި ވަނީ، އޭނާއަކީ ރާއްޖޭގެ ފަތުރުވެރިކަމުގެ ދާއިރާގައި ފާހަގަކުރެވޭ ބޮޑެތި ކާމިޔާބީތައް ހޯދާފައިވާ ބޭފުޅެއް ކަމަށެވެ. އަދި ސިޔާމަކީ ވަރަށް ރަނގަޅު ޝަހުސިއްޔަތެއްކަމަށް ސިޓީގައި ވެއެވެ.
މީގެއިތުރުން ސިޔާމަކީ ނެޝަނަލް އެވޯޑު ލިބިފައިވާ، ޒުވާން ވިޔަފާރިވެރިއެއްކަމަށާއި ފަތުރުވެރިކަމުގެ ދާއިރާއިން ގައުމަށް ކުރެއްވި އަގުހުރި ހިދުމަތްތަކަށް ރައީސުލްޖުމްހޫރިއްޔާ ދެއްވާ ރަން މެޑަލް ވެސް ލިބިފައިވާނެކަމަށް ފޮރިން މިނިސްޓްރީގެ ސިޓީގައި ވެއެވެ. އަދި ސިޔާމަކީ ދެކުނު ކޮރެއާއާއި ރޯމޭނިއާއިން ރާއްޖެއަށް ކަނޑައަޅާފައިވާ އޮނަރަރީ ކޮންސުލްކަމަށާއި އެއީ ރަނގަޅު ބޭފުޅެއްކަމަށް ބުނެފައި ވެއެވެ.
ސިޓީ ނިންމާލަމުން ފޮރިން މިނިސްޓްރީން އެދިފައި ވަނީ ސިޔާމަކީ ރައްޔިތުންގެ މަޖިލީހާއި ޑިޕްލޮމެޓިކް އެކި ހިދުމަތްތައް އަދި ގައުމަށް އެހާ ގިނަ މަސައްކަތްތަކެއް ކުރެއްވި ބޭފުޅަކަށް ވާތީ އެކަމަށް ރިޔާއަށްކޮށް ދިނުމަށެވެ.
ސިޔާމަކީ މަޖިލީހުގެ ރިޔާސަތު ވެސް ބަލަހައްޓަން ޖެހޭ ބޭފުޅެއްކަމަށް ފޮރިން މިނިސްޓްރީން ބުނިއިރު، އޭނާއަކީ މަޖިލީހުގެ ހާޒިރީގެ އެންމެ ފަހަތުގައި އުޅުއްވާ ބޭފުޅާ އެވެ. އަދި 19 ވަނަ މަޖިލީހުގެ ވެސް ވަޑައިގެންފައި ވަނީ ވަރަށް މަދު ޖަލްސާއަކަށެވެ.
ހުކުމާއި އެއްގޮތަށް ފައިސާ ނުދައްކާތާ، 08 އަހަރުވީ މައްސަލައިގައި ސިންގަޕޫރުގެ އާބިޓްރޭޝަނުގައި ހިނގާ މައްސަލައިގެ ތެރެއަށް، ސިޔާމްގެ ދިފާއުގައި ދިވެހި ސަރުކާރުން ވަދެފައިވަނީ ކޮން ސަބަބަކާއި ހުރެކަމެއް ސާފެއް ނޫނެވެ. އަދި މި މައްސަލައިގައި މިހާތަނަށް ސަރުކާރުގެ އެއްވެސް ރަސްމީ ބަހެއް ވެސް ނުލިބެ އެވެ.
ސިޔާމް ސިންގަޕޫރަށް ވަޑައިގަތީ، މި އަހަރުގެ ރިޔާސީ އިންތިހާބަށް ރައީސުލްޖުމްހޫރިއްޔާ ކުރައްވަމުން ގެންދަވާ ކެމްޕެއިން ދަތުރުތަކުގައި އެމަނިކުފާނާއި އެކު އުޅުއްވުމަށް ފަހު އެވެ. މިވަގުތު ސިޔާމް ޓީމުގައި ނެތް ނަމަވެސް، އެމްޑީއޭ ދަނީ ދަތުރުތަކުގައި ބައިވެރިވަމުންނެވެ.
