ޖުމްހޫރީ މައިދާނުގައި ތިބި އިދިކޮޅު ކޮންގްރެސް ކޯލިޝަނުގެ ލީޑާޝިޕް ހައްޔަރުކޮށްފި އެވެ.
2023 ގެ ރިޔާސީ އިންތިހާބުގައި ވާދަ ކުރުމަށް، އިލެކްޝަންސް ކޮމިޝަނުން އަންނަ އާދީއްތަ ދުވަހު ހުޅުވާލާއިރު އިދިކޮޅުގެ ލީޑަރު އަދި ކުރީގެ ރައީސް އަބްދުﷲ ޔާމީނަށް އިންތިހާބުގައި ވާދަކުރެވޭނެކަމާއި މެދު ވަނީ ސުވާލު އުފެދިފަ އެވެ. ޖަލު ހުކުމެއްގައި ހުންނެވުމާއި އެކު، ދަށު ކޯޓުގައި އެމަނިކުފާނުގެ މައްޗަށް އެމްއެމްޕީއާރުސީ ހިޔާނާތުގެ ފައިސާއިން މަންފާ ނެންނެގިކަމުގެ ތުހުމަތަށް ޝަރީއަތް ދަނީ ކުރިޔަށެވެ. އިދިކޮޅުން ގަބޫލު ކުރާގޮތުގައި ރައީސް ޔާމީންގެ ކެނޑިޑެސީ ހައްގަށް އަރައިގަނެފައި ވަނީ ސަރުކާރުންނެވެ. އަދި ރައީސް އިބްރާހިމް މުހައްމަދު ސޯލިހު ބޭނުންފުޅު ވަނީ އެމަނިކުފާނު އެކަނި ވާދަ ކުރާ އިންތިހާބެއް ބޭއްވުމަށެވެ.
ރައީސް ޔާމީނަށް އަނިޔާ ކުރަމުންދާކަމަށާއި، ޝަރުއީ ދާއިރާއަށް ފޯރުވަމުންދާ ނުފޫޒުތައް ހުއްޓާލުމަށް ގޮވާލައި އިދިކޮޅުން މިއަދު ވެސް ހައިކޯޓުގެ ރެޖިސްޓްރާއާއި ބައްދަލު ކުރުމަށް ކުރި މަސައްކަތް ނާކާމިޔާބުވުމުން ޕާޓީގެ ލީޑާޝިޕް އެއްވީ ޖުމްހޫރީ މައިދާނަށެވެ. ލީޑާޝިޕްގެ ބޭފުޅުން އެކަނި ތިއްބަވައި މީޑިއަތަކާއި ވާހަކަ ދައްކަވަމުން ގެންދެވި އިރު މުޅި ސަރަހައްދު ފުލުހުން އޮތީ ބެރިކޭޑު ޖަހައި ބަންދުކޮށްފަ އެވެ.
ޖުމްހޫރީ މައިދާނަށް އެއްވީ ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެމްބަރު އަހުމަދު ޝިޔާމާއި، މަހިބަދޫ ދާއިރާގެ މެމްބަރު އަހުމަދު ތޯރިގް (ޓޮމް) އާއި، ހުޅުމާލެ ދާއިރާގެ ކައުންސިލް މެމްބަރު އިބްރާހިމް ޝުޖާއުގެ އިތުރުން ޕީއެންސީގެ ދެ ނައިބު ރައީސުންކަމަށްވާ މަޑުއްވަރީ ދާއިރާގެ މެމްބަރު އާދަމް ޝަރީފް އުމަރާއި، މާވަށު ދާއިރާގެ މެމްބަރު މުހައްމަދު ސައީދެވެ.
ފުލުހުން އެ ސަރަހައްދުން، އިދިކޮޅު ލީޑަރުން ހައްޔަރު ކުރީ އެތަނުގައި ތިބި މީޑިއާތަކަށް ވެސް ވަރަށް ބޮޑަށް ހުރަސްއެޅުމަށް ފަހު އެވެ. އަދި ނޫސްވެރިން ފަހަތަށް ޖައްސައި، ވީޑިއޯ ކުރުމަށް ވެސް ހުރަސްއެޅި އެވެ. އަދި ކަވަރު ކުރުމަށް ޖުމްހޫރީ މައިދާނުން ނިކުތުމަށް ވެސް ދިޔައީ ގޮވާލަމުންނެވެ. އެއަށް ފަހު ކުއްލި ގޮތަކަށް އެސްއޯ ފުލުހުން އިދިކޮޅު ލީޑަރުން ހައްޔަރު ކުރީ އެވެ.
ފުލުހުން އިދިކޮޅު ލީޑާޝިޕް ހައްޔަރު ކުރުމުގެ ތެރޭގައި އެތަނުގައި ހުރި، އަންހެނަކަށް ވަރަށް ބޮޑަށް އަނިޔާވެ އައިޖީއެމްއެޗަށް ވަނީ ގެންގޮސްފަ އެވެ.
