2023 ގެ ރިޔާސީ އިންތިހާބުގައި ދަ ޑިމޮކްރެޓްސްގެ ރިޔާސީ ކެނޑިޑޭޓެއްގެ ގޮތުގައި ވާދަކުރުމަށް ޕާޓީގެ ރިޔާސީ ޓިކެޓު ހޯދުމަށް ޕްރައިމެރީގައި ވާދަކުރާނެކަމަށް އައްޑޫ ހުޅުދޫ ދާއިރާގެ މެމްބަރު އިލްޔާސް ލަބީބް ވިދާޅުވެއްޖެ އެވެ.
ރައްޔިތުންގެ މަޖިލީހުގެ ރައީސް އަދި އެމްޑީޕީގެ ކުރީގެ ރައީސް މުހައްމަދު ނަޝީދުގެ ޑިމޮކްރެޓްސް ރިޔާސީ އިންތިހާބުގައި ވާދަކުރާއިރު، އެމަނިކުފާނު ވަނީ ޕްރައިމެރީގައި ވާދަ ކުރުމުގެ އެއްވެސް ޝައުގުވެރިކަމެއް ނެތްކަމަށް ވިދާޅުވެފަ އެވެ. ރައީސް ނަޝީދާއި އަރިސް އިލްޔާސް ޕާޓީގެ ޕްރައިމެރީގައި ވާދަކުރާނެކަމަށް އިއުލާނު ކުރިއިރު ރައީސް ނަޝީދު އެމްޑީޕީގެ ޕްރައިމެރީ ކާމިޔާބު ކުރެއްވި ނަމަ އިލްޔާސަކީ ރަނިންމޭޓަށް ވެދާނެކަމުގެ އަޑުތައް ވެސް ފެތުރުނެވެ. އެކަމަކު، އެކަން އެއްވެސް ވަރަކަށް ކަށަވަރެއް ނުވެ އެވެ.
ޑިމޮކްރެޓްސްގެ ޕްރައިމެރީގައި ވާދަ ކުރުމަށް ހުޅުވާލާފައި ވަނީ، މިއަދު އެވެ. އަދި އެކަމަށް ޝައުގުވެރިކަން ހުރި ކެނޑިޑޭޓުންނަށް ފޯމު ހުށަހެޅުމުގެ ފުރުސަތު ހޮނިހިރު ދުވަހުގެ ނިޔަލަށް އޮންނާނެ އެވެ.
އެމްޑީޕީ ދެބައިވެ އުފައްދާ ޑިމޮކްރެޓްސްގެ އެންމެ އިސް މެމްބަރުންގެ ތެރޭގައި އިލްޔާސް ހިމެނޭއިރު، އޭނާއަކީ ސަރުކާރުގެ ސިޔާސަތުތަކަށް އެންމެ ބޮޑަށް ފާޑުވިދާޅުވާ މެމްބަރެވެ.
އިލްޔާސްގެ އިތުރުން ދެން ޑިމޮކްރެޓްސްގެ ޕްރައިމެރީގައި ވާދަކުރައްވާނެކަމަށް ބެލެވެނީ، އެސްޓީއޯގެ ކުރީގެ މެނޭޖިން ޑިރެކްޓަރު ހުސެއިން އަމްރު އެވެ.
