ދިވެހިންގެ އުޖާލާ މުސްތަގުބަލަށް އޮތް އެންމެ ބޮޑު ހައްލަކީ ރިޔާސީ އިންތިހާބު އިދިކޮޅުގެ ކެންޑިޑޭޓު ޑރ. މުހައްމަދު މުއިއްޒަށް ކާމިޔާބުކޮށް ދިނުންކަމަށް ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
2023 ގެ ރިޔާސީ އިންތިހާބުގެ ކެމްޕެއިނަށް މިވަގުތު ހދ. އަތޮޅުގައި ހުންނެވި މުއިއްޒާއި އެކު ޕާޓީގެ ލީޑާޝިޕްގެ ބޭފުޅުން ވެސް ދަނީ ދަތުރު ކުރައްވަމުންނެވެ. އިންތިހާބަށް ބާކީ 27 ވަރަކަށް ދުވަސް އޮތް އިރު، އިދިކޮޅުން ތަކުރާރުކޮށް ބުނަމުންދަނީ މިއީ ގައުމު މިނިވަން ކުރުމަށް ލިބޭނެ އެންމެ ފަހު ފުރުސަތުކަމަށާއި ދިވެހިންނަށް އޮތީ އިބްރާހިމް މުހައްމަދު ސޯލިހު ނޫން ގޮތެއް ހޯދުން ކަމަށެވެ.
ހދ. އަތޮޅުގެ ދަތުރުގެ ތެރެއިން ނޮޅިވަރަމްގެ އާންމު ރައްޔިތުންނާއި ބައްދަލު ކުރައްވައި ދެއްކެވި ވާހަކައިގައި އަބްދުއްރަހީމް ވިދާޅުވި މި ސަރުކާރު އޮތީ އިންޑިއާގެ ނުފޫޒެއްގައިކަން އެއީ އެންމެން ދަންނަ ހަގީގަތެއް ކަމަށެވެ. އެހެންކަމުން މި ސަރުކާރަށް އިތުރު ދައުރެއް ދިނުން ވެގެން ދާނީ، ޒަމާނުއްސުރެ ރާއްޖޭގެ މައްޗަށް ގަދަވެގަތުމަށް އިންޑިއާ ކުރަމުން އަންނަ މަސައްކަތަށް ދޭ ހިތްވަރަކަށް ކަމުގައި އޭނާ ވިދާޅުވި އެވެ.
މި އަހަރުގެ ރިޔާސީ އިންތިހާބު މުއިއްޒަށް ކާމިޔާބުކޮށްދިނުމަށް ގޮވާލައި، އަބްދުއްރަހީމް ވިދާޅުވީ ގައުމަށް ބޭނުން ވަނީ ތައުލީމީ ގާބިލު ދަރީން ކަމަށެވެ. އެ ހުރިހާ ސިފައެއް މުއިއްޒުގެ އެބަހުރިކަމަށާއި، ރާއްޖެއަށް އުޖާލާ މުސްތަގުބަލެއް ގެނެސް ދެވެން އޮތީ މުއިއްޒާއި އެކު ކުރިޔަށް ގޮސްގެންކަމަށް އަބްދުއްރަހީމް ވިދާޅުވި އެވެ.
އަބްދުއްރަހީމް ވިދާޅުވީ ގައުމު ހިންގުމަށް މުއިއްޒު ދަރިވަރުވީ ރައީސް އަބްދުﷲ ޔާމީންގެ ފަރާތުންކަމަށާއި، އެހެން ކަމުން ގާބިލުކަން ހުންނާނެ ކަމަށެވެ. ތަކުރާރުކޮށް އަބްދުއްރަހީމް ވިދާޅުވީ ދިވެހިންގެ ރާއްޖެ ދިވެހިންނަށް ލިބިގެން ދާނީ އަަބްދުއްރަހީމް ވިދާޅުވި ގޮތުގައި މުއިއްޒު ފަދަ އިލްމީ ގާބިލު ބޭފުޅަކަށް ވޯޓު ދީގެންނެވެ.
މުއިއްޒަށް ވޯޓު ދިނުން އެއީ ގައުމު ސަލާމަތްކޮށް، ރައީސް ޔަމީނަށް ސަރުކާރުން ކުރަމުންދާ އަނިޔާތަކުން ސަލާމަތް ކުރުމަށް ދޭ ވޯޓެއްކަމަށް އަބްދުއްރަހީމް ވިދާޅުވި އެވެ. އެހެންވެ އަބްދުއްރަހީމް ގޮވާލީ ވޯޓު ލުން ކުރިޔަށް ދާވަގުތު ރައްޔިތުން ފަރުވާތެރިވުމަށެވެ. އަދި އިންތިހާބު އޮޅުވާލައި ނަތީޖާ ގަޑުބަޑު ކުރުމަށް އެއްވެސް ފުރުސަތެއް ދީގެން ނުވާނެކަމަށް އޭނާ ވިދާޅުވި އެވެ.
އާންމުނާއި އެކު މިއަދު އޮތް ބައްދަލުވުމުގައި މުއިއްޒު ވިދާޅުވީ، ރައްޔިތުންނަށް ހިދުމަތް ކުރާނީ ވަކި ބަޔަކަށް މަންފާ ހޯދައިދޭން އަނެއް ބަޔަކު ބާކީ ކުރާ އުސޫލުން ނޫނެވެ. ކޮންމެ ރަށަކީ ވެސް ހަމަހަމަ އުސޫލުން މަގުތައް ރަނގަޅު ފެންވަރަކަށް ތަރައްގީކޮށް، ތާރު އަޅައި ޒަމާނީ ވަސީލަތްތަކާއި އެކު އަސާސީ ހިދުމަތްތައް ލިބެން ހުރި ރަށަކަށް ވާން ޖެހޭކަމަށް މުއިއްޒުގެ ވާހަކައިގައި ވަނީ ފާހަގަކުރައްވާފަ އެވެ.
