އިދިކޮޅުގެ ލީޑަރު އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް މިނިވަންކަން ހޯދައިދޭން ސިޔާސީ ބާރުވެރިކަން ހޯދުން މުހިންމުކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެ އެވެ.
އަންނަ މަހުގެ 09 ގައި އޮތް ރިޔާސީ އިންތިހާބުގެ ކެމްޕެއިން އެންމެ އުތުރުން މުއިއްޒު ފެއްޓެވި އިރު ވޯޓާއި ދެމެދު ބާކީ އޮތީ 27 ދުވަހެވެ. ހއ. އާއި ހދ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ހދ. މަކުނުދޫގެ ރައްޔިތުންނާއި ބައްދަލު ކުރައްވައި މުއިއްޒު ވިދާޅުވީ ރައީސް ޔާމީނަކީ ރާއްޖޭގެ ތަރައްގީގެ ބާނީކަމަށާއި އެކަން ދިވެހި ކޮންމެ ރައްޔިތަކު ވެސް ގަބޫލު ކުރާކަމަށެވެ.
އެމަނިކުފާނުގެ ވިސްނުމާއި އެއްގޮތަށް ދިވެހިންނަކީ ތަރައްގީ ބޭނުންވާ ތަރައްގީއަށް ލޯބި ކުރާ ބައެއްކަން ފާހަގަކޮށް މުއިއްޒު ވިދާޅުވީ ޕީޕީއެމްގެ ސަރުކާރަކުން ގާނޫނީ ހަމަތަކާއި އެއްގޮތަށް ރައީސް ޔާމީން މިނިވަން ކުރާނެކަމަށެވެ. އެކަމަށް ބޭނުން ވަނީ ސިޔާސީ ބާރުވެރިކަންކަމަށާއި ސެޕްޓެމްބަރުގެ 09 ގައި އޮތް އިންތިހާބުން ރައްޔިތުން މި ސަރުކާރު ބަލި ކުރަން ޖެހޭކަމަށް މުއިއްޒު ވިދާޅުވި އެވެ.
ރައީސް ޔާމީން އޮންނެވީ ނުހައްގުން ޖަލުގަ… 1000 ދުވަސް ވީ.. އެމަނިކުފާނު ޖަލުން މިނިވަން ކުރުމަށް ސިޔާސީ ބާރުވެރިކަން ލިބެން ޖެހޭ.. އެހެންކަމުން އެންމެ ފުރަތަމަ ދުވަހު ވެސް އެމަނިކުފާނު މިނިވަން ކުރުމަށް ކުރަންޖެހޭ މަސައްކަތް ކުރުމަކީ އަޅުގަނޑުގެ ޒިންމާއެއް.. އެކަން އަޅުގަނޑު ކުރިޔަށް ގެންދާނަން
