ރިޔާސީ އިންތިހާބާއި ދިމާކޮށް އެންމެ އާންމު އެއް މަންޒަރަކީ، ފައިސާ ބަހައި ނުފޫޒެއްގައި ޖެއްސުމަށް ކުރާ މަސައްކަތް ނަމަވެސް ވަގުތީ އުފަލަކަށް ގައުމީ މަސްލަހަތު ނަގާނުލުމަށް އިދިކޮޅު ކޮންގްރެސް ކޯލިޝަން ޕީޕީއެމް/ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެ އެވެ.
އަންނަ މަހުގެ 09 ގައި ބާއްވާ ރިޔާސީ އިންތިހާބަކީ، ވާދަވެރި އަދި ފޯރިގަދަ އިންތިހާބަކަށް ވާނެ އެވެ. ކެމްޕެއިނަށް ކެންޑިޑޭޓުން ދަތުރުތައް ފަށައި، ސިޔާސަތުތައް އާންމު ކުރަމުން ގެންދާއިރު މުއިއްޒު މިވަގުތު ހުންނެވީ މ. އަތޮޅުގަ އެވެ. ކެމްޕެއިން ޖަލްސާގައި ވާހަކަ ދައްކަވަމުން މިއަދު މުއިއްޒު ވިދާޅުވީ ވޯޓެއް ބޯމަތިވުމާއި އެކު ފައިސާގެ ނުފޫޒު އޭގެ ތެރެއަށް ވަންނަ ކަމަށެވެ. އެކަމަކު އެ ފައިސާގައި ޖެހި، ގައުމާއި މެދު ރައްޔިތެއްގެ ހައިސިއްޔަތުން ވިސްނަން ޖެހޭ ޖެހުމާއި، ފިކުރުގެ މައްޗަށް ހިޔަނި އެޅިޔަ ނުދިއުމަށްކަމަށް މުއިއްޒު ގޮވާލެއްވި އެވެ.
މުއިއްޒު ވިދާޅުވީ ފައިސާތައް ބަހައި ވަކި ގޮތަކަށް ވޯޓު ދޭން ޝަރުތު ކުރުމަކީ އާންމުކަމެއްކަމަށާއި، ލިބިގެންވާ ހައްގެއްގެ ދަށުން ލާ ވޯޓަކަށް ހިޔާނަތް ނުވުމަށް އެދޭ ކަމަށެވެ. އަދި މިިއީ ގައުމުގެ ކުރިމަގާއި، މުސްތަގުބަލަށް އެޅޭ ހުރަހެއް ކަމަށް ވެސް މުއިއްޒު ވިދާޚުވި އެވެ.
ފައިސާގައި ޖެހި ނަފްސު ވިއްކާލުމަކީ އެއީ، ތަރައްގީއަށް އެޅޭ ހުރަހެއްކަމަށް ސިފަކުރައްވައި މުއިއްޒު ވިދާޅުވީ އެއީ ވިސްނުމާއި ކުރިއަށް ދިއުމުގެ އެތައް ހަރުފަހަތަކަށް އެޅޭ ހުރަހެއް ކަމަށެވެ. އެހެންކަމުން އެ ފައިސާއަކީ ވިސްނުމަށް އެޅޭ، އަނދިރި ހިޔަންޏަކަށް ވިޔަ ނުދޭން މުއިއްޒު ގޮވާލެއްވި އެވެ. މުއިއްޒު ވިދާޅުވި ގޮތުގައި އެއީ ގައުމަށް ވާން ބޭނުން ގޮތެއް، ވާން ދޫކޮށްލުމެވެ.
މުއިއްޒު ވިދާޅުވީ ގައުމާއި މެދު ނުވިސްނައި ދޭ ވޯޓެއްގެ ސަބަބުން، އެކަމާ ހިތަމާ ކުރަން ޖެހޭ ފަދަ ހާލަތު އަންނާނެ ކަމަށެވެ. މިސާލެއްގެ ގޮތުގައި މި ސަރުކާރު ނަންގަވައު މުއިއްޒު ވިދާޅުވީ ރައްޔިތުންނަށް ވީ ވައުދުގެ ތަރައްގީ ގެނެސްދެވިފައި ނެތް ކަމަށެވެ. އެހެންކަމުން ދެން ވެސް އިތުރަށް އެގޮތުގައި ކުރިޔަށް ދާންވީތޯ އޭނާ ސުވާލު ކުރެއްވި އެވެ.
ޖަލްސާހައި ވާހަކަ ދައްކަވަމުން މުއިއްޒު ވަނީ، އިސްލާމް މާއްދާ އެހެން ބަހުން ކިޔަވައިދޭ މައްސަލައަށް ފާޑުވިދާޅުވެފަ އެވެ. ވިދާޅުވީ ދިވެހ ިރައްޔިތުންގެ ގޮތުގައި ފަރުދީ ޒިންމާ އަދާ ކުރަން ކުރަން ޖެހޭކަމަށާއި، ދިވެއްސަކަށް ވީތީ ގައުމިއްޔަތުގެ ޒިންމާ ވެސް އަދާ ކުރަން ޖެހޭ ކަމަށެވެ.
މީގެއިތުރުން މުއިއްޒު ވިދާޅުވީ ޕީޕީއެމަކީ ތަރައްގީ ގެންނާނެ، ތަރައްގީއާއި ރައްޓެހި ޕާޓީއެއްކަމަށާއި އެހެން ރައީސް ޔާމީންގެ ފަސް އަހަރުން ވެސް ސާފުވާނެ ކަމަށެވެ.
