އަންނަ ސެޕްޓެމްބަރު 9 ގައި އޮންނަ ރިޔާސީ އިންތިހާބުގެ ކެމްޕެއިންގައި މ. ދިއްގަރަށް ވަޑައިގެން އެ ރަށުގައި ތިބި ޕީޕީއެމް/ޕީއެންސީ ސަޕޯޓަރުންނާ ބައްދަލު ކުރައްވައި މުއިއްޒު ވިދާޅުވީ މި ސަރުކާރުން ބިން ހިއްކުމުގެ މަޝްރޫއު ކުރިއަށް ގެންދަން ނިންމާފައި ވަނީ ރައްޔިތުންގެ އަޑު އަހައިގެން ނޫން ކަމަށެވެ.

އެހެންވެ، އޭނާގެ ވެރިކަމެއްގައި ރައްޔިތުންގެ އަޑު އަހައިގެން، އެ ރައްޔިތުން ބޭނުންވާ ގޮތަށް މަޝްރޫއު ގެންގޮސް ނިންމާލައްވާނެ ކަމަށް ވެސް މުއިއްޒު ވިދާޅުވިއެވެ. މުއިއްޒު ވިދާޅުވީ ސަރުކާރަށް ފަސް އަހަރު ވެގެން ދިޔައީ، ދިއްގަރުގެ ކުނި މެނޭޖު ކުރުމަށް އެއްވެސް މަސައްކަތަކެއް ނުކުރެވި ކަމަށެވެ. ސަރުކާރުން އެ ކަންކަމަށް އިހުމާލުވުމަކީ ވަރަށް ބޮޑު ގޯހެއްކަމަށާއި، އެއީ އިހުމާލެއްކަމަށް އޭނާ ވިދާޅުވި އެވެ.

މުއިއްޒުގެ ކުރިން ވާހަކަ ދެއްކެވި ޕީޕީއެމްގެ ދާއިރަގެ މެމްބަރު ވެސް ވަނީ، ސްކޫލަށް ދިމާވެފައިވާ ދަތިތައް ފާހަގަކޮށް ދަރިވަރުން އިމްތިހާން ހަދަން ޖެހިފައި ވަނީ ޓީޗަރެއްގެ އެހީއާއި ނުލައިކަމަށް ވިދާޅުވެފަ އެވެ. އެހެންވެ އެކަމަށް އިޝާރާތްކޮށް މުއިއްޒު ވިދާޅުވީ އެގޮތަށް ދިމާވަނީ ސަރުކާރުގެ ދޯހަޅި ނިޒާމުގެ ސަބަބުން ކަމަށެވެ.

ސްކޫލަށް ދިމާވެފައިވާ ދަތިތައް ހައްލުކޮށް، އިންސާނީ ވަސީލަތްތައް ހޯދައިދިނުން އެއީ މުއިއްޒު  ވިދާޅުވި ގޮތުގައި އެޑިއުކޭޝަން މިނިސްޓްރީގެ ޒިންމާއެކެވެ. ހާއްސަ ސަމާލުކަމެއް ދީގެން، ދިވެހި އިސްލާމް މާއްދާ ކިޔަވައިދޭނެ ދާއިމީ ޓީޗަރުން ހަމަޖައްސަން ޖެހޭނެކަމަށް މުއިއްޒު ވިދާޅުވި އެވެ.