ރައްޔިތުންގެ މަޖިލީހުގެ މެމްބަރުން ޒާތީގޮތުން ދައްކަވާ ވާހަކަތަކުގެ ސަބަބުން ފެންނަނީ، އަހުލާގާއި ގުޅިފައިވާ ތަރުބިއްޔަތުކަމަށް ރައްޔިތުންގެ މަޖިލީހުގެ ރައީސް މުހައްމަދު އަސްލަމް ވިދާޅުވެއްޖެ އެވެ.
ސަޕްލިމެންޓްރީ ބެޖެޓާއި، އަންނަ އަހަރަށް ލަފާ ކުރާ ދައުލަތުގެ ބަޖެޓުގެ މަސައްކަތް މަޖިލީހުގައި ކުރިޔަށް ނުގެންދެވި އެތައް ދުވަހެއް ދިގުލައިގެން ދިއުމަށް ފަހު އިއްޔެ އެ މަސައްކަތް ވަނީ ފަށާފަ އެވެ. މަޖިލީހުގެ ރައީސްކަމުން، މުހައްމަދު ނަޝީދު އިސްތިއުފާ ދެއްވުމާއި އެކު ބަޖެޓުގެ މަސައްކަތް ތާވަލު ކުރުމުން މިހާރު ޑިމޮކްރެޓްސްގެ މެމްބަރުން ދަނީ އެކަމަށް ދެކޮޅު ހަދަމުންނެވެ.
އެބޭފުޅުން ގަބޫލު ކުރާ ގޮތުގައި ސަޕްލިމެންޓްރީ ބަޖެޓެއް ހުށަހެޅުމުގެ ބޭނުމަކީ ސިޔާސީ މަންފާއެއް ހާސިލު ކުރުމެވެ. އަދި ސަރުކާރުގެ ވަކި އެޖެންޑާއެއް މިކަމުގައި ހިމެނޭކަމަށް ތުހުމަތު ކުރި އެވެ.
މިއަދު ވެސް ޖަލްސާ ފެށުމާއި އެކު ނިޒާމީ ނުކުތާތައް ނަންގަވައި މެމްބަރުން ތަކުރާރު ކުރެއްވި ވާހަކައަކީ އެއީ އެވެ. އަދި މެމްބަރުން ވާހަކަ ދައްކަވަމުން ގެންދެވި ވަގުތު އަޑުދަގަ ކުރަމުން ދިއުމުގެ ސަބަބުން ރިޔާސަތުގައި ހުންނެވި މުހައްމަދު އަސްލަމް ވަނީ ގަވައިދަތަށް ހުރުމަތްތެރިކޮށް ހިތުމަށް ނަސޭހަތްތެރިވެފަ އެވެ.
އަސްލަމް ވިދާޅުވީ މެމްބަރުން ވާހަކަ ދައްކަވާ ވަގުތު އެކަމަށް ހުރަސްއަޅައި، އަޑުގަދަ ނުކުރުމަށް އެދޭ ކަމަށެވެ. އަދި ނިޒާމީ ނުކުތާތަކަށް ވެސް ފުރުސަތު ދޭނީ އެކަންކަމަށް ބެއްލެވުމަށް ފަހުކަމަށް އަސްލަމް ވިދާޅުވި އެވެ.
އަދި މެމްބަރުން ވާހަކަ ދައްކަމުންދާއިރުގާ، އަޅުގަނޑު ނިޒާމީ ނުކުތާއަކަށް ނާރުވާނަން..
މެދުހެންވޭރު ދާއިރާގެ މެމްބަރު އަލީ އާޒިމް އަޑުގަދަކޮށް، ބައެއް ބޭފުޅުންނަކީ ހިޔާނާތްވެފައި ތިބި ބައެއްކަމަށް ގޮވާލަމުން ދިއުމުން ނިޒާމީ ނުކުތާ ނަންގަވައި ދުވާފަރު ދާއިރާގެ މެމްބަރު އިސްމާއިލް އަހުމަދު ވިދާޅުވީ ކޮންމެ ތުހުމަތެއް ކުރިޔަސް އޭނާގެ މައްސަލައެއް ނެތްކަމަށާއި، އެކަމަކު މެމްބަރަކާއި މުހާތަބު ކުރާނެ ގޮތް ގަވައިދުގައި ބަޔާންކޮށްފައި އެބައޮތް ކަމަށެވެ.
އިސްމާއިލް ވިދާޅުވީ ބޭނުން ވާހަކައެއް ދެއްކުމަށް ޖާގަ ދޭކަމަށާއި، ސަބަބަކީ މިއަދު އެބޭފުޅުން ތިއްބެވީ ހަމްދަރުދީ ވާން ޖެހޭ ހާލަތެއްގައި ކަމަށެވެ. އަދި ޒާތީވިޔަސް ދޭނެ ރައްދެއް ނެތްކަމަށް އޭނާ ވިދާޅުވި އެވެ.
އިސްމާއިލް ނެންގެވީ ނިޒާމީ ނުކުތާއެއްކަމަށް ބަލައިގަނެވެން ނެތްކަމަށް ފާހަގަކުރައްވައި، އަސްލަމް ވިދާޅުވީ އަހުލާގު ގުޅިފައި ވަނީ ތަރުބިއްޔަތާ ކަމަށެވެ.
އިއްޒަތްތެރިންގެ އަހުލާގު އެއީ ތަރުބިއްޔަތުގައި ހުރިކަމެއް.. އެކަމަކަށް އަޅުގަނޑު އަޅާނެ ފިޔަވަޅެއް ނެތް..
މަޖިލީހުގައި މެމްބަރުންނަށް ވަގަށް ގޮވުމާއި، އަދި ޒާތީ ވާހަކަތައް ދެއްކުމަކީ އާންމު ކަމެކެވެ. އަދި ޖަލްސާގައި ނިޒާމު ގެއްލުވާލުމަށް މަސައްކަތް ކުރާ ވަގުތުތަކުގައި ރިޔާސީ މޭޒު ކައިރީ އަޑުގަދަ ކުރުމާއި، އަޑުގަދަ ކުރާ ބޭނުންކޮށްގެން ޖަލްސާތަކަށް ހުރަސް އަޅަމުން ދާކަން ފާހަގަކުރެވެ އެވެ.
