ދުނިޔެ ހޫނުވުމުގެ މައްސަލަ ވަގުތުން ވަގުތަށް ހައްލުކުރަން މަސައްކަތްކުރަން އދގެ ސެކެޓްރީ ޖެނަރަލް އެންޓޯނިއޯ ގުޓޭރެޒް ވިދާޅުވެއްޖެއެވެ.
މީޑިއާތަކުން ރިޕޯޓުކުރާގޮތުން، ގުޓޭރެޒްވަނީ ދާއިމީކޮށް ގަނޑުވެފައިވާ ސަރަހައްދެއްކަމަށްވާ އެންޓްއާކްޓިކާއަށް ޒިޔާތްކުރައްވާފައެވެ. އަދި އެތަނަކީ ބައިނަލްއަގުވާމީ ގޮތުން މުހިންމު ތަނެއްކަމަށާއި އެހެންނަމަވެސް މިހާރު އެތައް މިލިއަން އަހަރުތަކެއްގެ މަތިން އުފެދިފައިވާ ގަނޑުފެން ވިރެމުންދާކަށާއި އެ މައްސަލަ ހައްލުކުރުމަށް އަވަސް ފިޔަވަޅުތަކެއް އަޅަންޖެހޭކަމަށްވެސް ވިދާޅުވިއެވެ.
ގުޓޭރެޒް ވިދާޅުވީ، އެންޓްއާކްޓިކާގައި ހިނގާކަންކަމުގެ އަސަރުތައް ކުރަނީ އެ ސަރަހައްދަށް އެކަނި ނޫންކަމަށެެވ. އޭނާ ވިދާޅުވީ، ދުނިޔެއާއި ދުރަށް އިރުގެ ދޯދިތައް އަނބުރާ ފޮނުވާލުމުގެ މަސައްކަތްތަކުގެ އިތުރުން ދުނިޔޭގެ މޫސުން ވަކި ގޮތެއްގެ މަތީ ދެމެހެއްޓެމުގައިވެސް އެ ސަރަހައްދު މުހިންމު ރޯލެއް އަދާކުރާކަމަށެވެ. އަދި ގިނަ އަދަދެއްގެ ގަނޑުފެން ވިރުމުން ކަނޑުގެ ލޮނުގަނޑު އުފުލިގެންދާނެކަމަާއި އެކަމުގެ ސަބަބުން ލޮނުގެ މިންގަނޑުތަކަށް އަސަރުކޮށް ދިރިއުޅޭ ތަކެތީގެ މާހައުލުތަކަށްވެސް ބޮޑެތި ބަދަލުތައް އަންނާނެކަމަށް ވިދާޅުވިއެވެ.
މީޑިއާތަކުން ބުނާގޮތުން، އަހަރީގޮތުން ބާއްވަމުންދާ ސަމިޓުތަކާއި ބައްދަލުވުންތަކުގެ މަގުސަދަކީ މޫސުމަށް ބަދަލުތައް އަންނަ އައުމަށް ހައްލުތަކެއް ގެނައުންކަމަށްވެސް ގައުމުތަކުން ކުރަމުންދާ މަސައްކަތްތަކުން ގްލޯބަލް ވޯމިންގް ހުއްޓުވުމުގައި މާ ބޮޑު ކުރިއެރުމެއް ލިބިފައިނުވާކަމަށާއި ސަބަބަކީ ގްރީން ހައުސް އެމިޝަންސްއާއި ހަކަތައް އުފެއްދުމުގެ ގޮތުން ތެޔޮ އެންދުންކަމަށްވެސް ބުނެފައިވެއެވެ.