ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ދޫކުރައްވައި ރައީސް އަބްދުﷲ ޔާމީން އަބްދުލްގައްޔޫމް އުފައްދަވާ އައު ޕާޓީ “ޕީޕަލްސް ނެޝަނަލް ފްރަންޓް” އަށް މެމްބަރުން ހަމަކުރުމުގެ މަސައްކަތް ފަށައިފި އެވެ.
ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމަށް ފަހު، ގާތް ގުޅުމެއް ނުބާއްވާކަމުގެ ތުހުމަތާއި އެކު ރައީސް ޔާމީން ވަނީ ޕީޕީއެމުން ވަކިވެ، ޕީޕަލްސް ނެޝަނަލް ފްރަންޓް (ޕީއެންއެފް) ގެ ނަމުގައި އައު ޕާޓީއެއް އުފެއްދެވުމުގެ ހުއްދައަށް އެދި އިލެކްޝަންސް ކޮމިޝަނަށް ހުށަހަޅުއްވާފަ އެވެ. ދެ ރައީސުންގެ ދެމެދު މިފަދަ މައްސަލައެއް ޖެހެން، ދިމާވީ ކޮން ހާލަތެއްކަން އަދި ސާފުވެފައި ނުވައިރު ހިޔާނާތުގެ ދައުވާތަކެއް ސާބިތުވެ 11 އަހަރުގެ ޖަލު ހުކުމެއްގައި ހުންނެވުމުން ރައީސް ޔާމީނަށް މީޑިއާތަކާއި އެއްވެސް ވާހަކައެއް ނުދެއްކޭނެ އެވެ.
ޕީއެންއެފްއަށް ރައީސް ޔާމީން ސޮއި ވެސް ކުރައްވާފައިވާކަމަށް، އެ ޕާޓީ އުފެއްދުމުގައި އިސްކޮށް އުޅުއްވާ ކުރީގެ މިނިސްޓަރު މުހައްމަދު މަލީހު ޖަމާލު ވަނީ ވިދާޅުވެފަ އެވެ. އަދި އޭނާ ވަނީ ސިޔާސީ ޕާޓީތަކަށް ދޫކުރާ ހުއްދަ ވީހާވެސް އަވަސް ވާން ޖެހޭކަމަށް ޕޯސްޓު ވެސް ކުރައްވާފަ އެވެ.
ޕާޓީ އުފެއްދުމާއި އަދި ހުއްދަ ދޫކުރުމާއި ގުޅޭގޮތުން މަލީހު ވިދާޅުވެފައި ވަނީ އަމާޒަކީ ވީހާވެސް އަވަހަށް 3،000 މެމްބަރުންގެ ސޮއި ހަމަކޮށް ޕާޓީ އުފެއްދުމަށް ހުށަހެޅުން ކަމަށެވެ. އެއަށް ފަހު ވީހާވެސް އަވަހަށް ކޮންގްރެސް ބާއްވާނެކަމަށް އޭނާ ވިދާޅުވި އެވެ. އޭނާ ވިދާޅުވީ ރައީސް ޔާމީނަށް ތާއީދު ކުރާ، އެމަނިކުފާނުގެ އިހުލާސްތެރިން ތިބީ އެކުގައި މަސައްކަތް ކުރަން ތައްޔާރަށް ކަމަށެވެ. އަދި އަމާޒަކީ ސިޔާސީ ގޮތުން އައު ވިސްނުންތަކެއް ގެނައުންކަމަށް މަލީހު ވިދާޅުވި އެވެ.
ނޫސްވެރިންގެ ސުވާލުތަކަށް ރައީސް ޔާމީންގެ ސަރުކާރުގެ ފުރަތަމަ ނައިބު ރައީސް އަދި އިސް ގާނޫނީ ވަކީލު ޑރ. މުހައްމަދު ޖަމީލް އަހުމަދު ވިދާޅުވީ ރައީސް ޔާމީން އެކަހެރި ކުރުމަކީ ލިބުނު އެންމެ ބޮޑު ހިތާމަ ކަމަށެވެ. އަދި ރައީސް ޔާމީން މިނިވަން ކުރުމުގެ އުންމީދާއި އެކު ވޯޓު ދިން އެތައް ރައްޔިތުންގެ ހައްގު ގެއްލިގެން ގޮސްގެން ނުވާނެކަމަށް އޭނާ ވިދާޅުވި އެވެ.
މީގެއިތުރުން މަލީހު ވިދާޅުވީ ޕީއެންއެފްއަކީ ސަރުކާރާއި އެއްކޮޅު އަދި ދެކޮޅު ޕާޓީއެއް ވެސް ނޫން ކަމަށެވެ. އެނާ ވިދާޅުވި ގޮތުގައި ރައްޔިތުންނަށް ފައިދާ ހުރި ކޮންމެ ކަމެއްގައި ޕީއެންއެފް ދެމި އޮންނާނެ އެވެ.
ރައީސް ޔާމީން އައު ސިޔާސީ ޕާޓީއެއް އުފައްދަވާއިރު، ސަރުކާރުގެ ދިފާއުގައި ނިކުމެ، ޕީޕީއެމް/ޕީއެންސީގެ ލީޑާޝިޕާއި އަދި ވަޒީރުން ވަނީ މިއީ ގައުމު އިސް ކުރަން ޖެހޭ ވަގުތުކަން ފާހަގަކޮށް ރައްޔިތުން ފަސް އަހަރު ދުވަހަށް އިންތިހާބު ކުރި ވެރިކަމެއް ދަމަހައްޓަން ކުރަން ޖެހޭ މަސައްކަތުގައި ފަސް ޖެހުމެއް ނެތްކަމަށް ވިދާޅުވެފަ އެވެ. ރައީސް ޔާމީން އެކަހެރި ކުރިކަމުގެ ތުހުމަތުކޮށް ޕީއެންއެފް އުފެއްދުމުގައި ދެން އިސްކޮށް އުޅުއްވާ ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދާއި، މަލީހުގެ އެންމެ ބޮޑެތި ފާޑުކިއުންތައް ވަނީ އެބޭފުޅުންނަށް އަމާޒުވެފަ އެވެ.
އެކަމަކު މެމްބަރުން ވަނީ ޖަމީލާއި، މަލީހަކީ ރައީސް ޔާމީނަށް ހެޔޮ އެދިގެން ރަނގަޅު ނިޔަތެއްގައި ދުވަހަކު ވެސް މަސައްކަތް ކުރައްވާނެ ބޭފުޅުން ނޫންކަމަށް ވިދާޅުވެފަ އެވެ.
