ރައްޔިތުންގެ މަޖިލީހުގެ ރައީސްގެ މަގާމުން ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވަކި ކުރުމަށް އެމްޑީޕީގެ ޕާލިމަންޓު ގުރޫޕުން ހުށަހަޅާފައިވާ މައްސަލައިގެ ވޯޓު ނެގުން މާދަމާގެ ޖަލްސާއަށް އެޖެންޑާކޮށްފި އެވެ.
ސަރުކާރުގެ މައި ޕާޓީގެ ގޮތުގައި އޮވެ، އެމްޑީޕީން އިވާއާއި ދެކޮޅަށް މައްސަލަ ހުށަހެޅީ 50 މެމްބަރުންގެ ސޮޔާއި އެކު ނޮވެމްބަރު 16 ގަ އެވެ. އައު ސަރުކާރާއި އެކު އިދިކޮޅު މައި ޕާޓީއަކީ އެމްޑީޕީ އެވެ. ރައީސް މުހައްމަދު ނަޝީދު މަޖިލީހުގެ ރައީސްކަމުން ދުރު ކުރުމަށް ކުރެވުނު މަސައްކަތުގައި އީވާއާއި ދެކޮޅަށް ވެސް ގަރާރެއް ވެއްދީ ރައީސް ނަޝީދު މަގާމުން އެކަހެރިވުމަށް ދެކޮޅު ހެއްދެވުމުންނެވެ. ގިނަ ދުވަސްތަކެއް އެ މައްސަލަ ތާށިވެފައި އޮތުމަށް ފަހު، އެންމެ ފަހުން ރައީސް ނަޝީދު އިސްތިއުފާ ދެއްވީ 2024 ގެ ބަޖެޓު ކުރިޔަށް ގެންދިއުމަށް އެމްޑީޕީން ހުރަސްއަޅަން ފެށުމުންނެވެ.
އީވާގެ މައްޗަށް އިތުބާރު ނެތްކަމަށް އެމްޑީޕީން ހުށަހެޅީ، ރައީސް ނަޝީދުގެ މައްސަލަ ލަސްކޮށް ހިފެހެއްޓުމުގައި އިސްކޮށް ހުންނެވިކަމުގެ ތުހުމަތުގަ އެވެ. އަދި ރައީސް ނަޝީދު ވަކި ކުރާ ޖަލްސާއެއްގެ ރިޔާސަތު ބެލެހެއްޓެވުމަށް ބޭނުން ނުވާ މޭރުމަކުން އީވާ މަސައްކަތް ކުރައްވަމުން ގެންދަވާތީ އެވެ.
މީގެ ކުރިންވެސް އެމްޑީޕީއިން އީވާގެ އިތުބާރު ނެތްކަމުގެ މައްސަލަ ހުށައެޅިއެވެ. އެފަހަރު މައްސަލަ ކުރިއަށް ނުގެންދެވުނީ، މަޖިލީހުގެ ރައީސް އާއި ނައިބު ރައީސްގެ އިތުބާރު ނެތްކަމުގެ މައްސަލަ އެއްފަހަރާ ހުށައަޅާފައި އޮތުމުން، ދެބޭފުޅުންވެސް ރިޔާސަތު ބެލެހެއްޓެވުމަށް އުޒުރުވެރިވެވަޑައިގަތުމުން، ވިލުފުށީ ދާއިރާގެ މެންބަރު ހަސަން އަފީފް ރިޔާސަތުގައި އިންނެވުމުން އިހުތިޖާޖުކޮށް މަޖިލީހުގެ ނިޒާމު ގެއްލުވާލުމާއި ގުޅިގެންނެވެ. އެކަމަކު ރިޔާސީ އިންތިހާބުގެ ފުރަތަމަ ބުރުގެ ނަތީޖާއަށް ފަހު އެމްޑީޕީން ދެބޭފުޅުންގެ މައްސަލަ ވެސް އަނބުރާ ގެންދިޔައީ މަސްލަހަތަށްކަމަށް ބުނެ އެވެ.
ރައީސް ނަޝީދު މަގާމުން އިސްތިއުފާ ދެއްވުމުން، މަޖިލީހުގައި މެޖޯރިޓީ އޮތް އެމްޑީޕީން އެ މަގާމަށް ގެނައުމަށް ނިންމީ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމެވެ. ޕާލިމަންޓު ގުރޫޕުގެ ލީޑަރަކަށް ހުންނެވި އަސްލަމް އެ މަގާމަށް އަންނާނެކަން އޭރު އޮތީ ބެލެވިފަ އެވެ.
އީވާ ވަކި ކުރުމަށް ފަހު ދެން ނައިބު ރައީސްކަމަށް ގެނައުމަށް އެމްޑީޕީގެ ޕީޖީގެ ވިސްނުން ހުރި ކޮން މެމްބަރެއްގެކަން އަދި ސާފެއް ނޫނެވެ. އެކަމަކު މަޖިލީހުގެ ނައިބުކަމަށް އައުމަށް ބައެއް ބޭފުޅުންގެ ޝައުގުވެރިކަން ހުރިކަމަށް ވާހަކަ ދެކެވޭއިރު އެކަމަށް ޑިމޮކްރެޓްސްގެ މެމްބަރުން ކުރާ ތުހުމަތުތައް ވެސް ގިނަ އެވެ.
