ރާއްޖޭގެ ކަނެކްޝަންތައް މެދުވެރިކޮށް އެކްސެސް ކުރެވޭ ބަރަހަނާ ވެބްސައިޓުތައް ދިވެހި ސަރުކާރުން އަންގައިގެން ބްލޮކްކޮށްފި އެވެ.
ބަރަހަނާ، އަދި މުޖްތަމައުގެ އާންމު މިންގަނޑާއި ހިލާފު މަންޒަރުތައް ފެންނަ ސައިޓުތައް ބްލޮކް ކުރުމަށް އެކި ލެވެލްތަކުގައި މަޝްވަރާކޮށް ވާހަކަ ދެއްކި ނަމަވެސް އަމަލީ ގޮތުން ފިޔަވަޅު އެޅުމުގެ އެއްވެސް މަރުހަލާއެއް މީގެ ކުރިން ކުރިޔަށް ގެންގޮސްފައި ނުވެއެވެ. އެހެންކަމުން ބަރަހަނާ ވެބްސައިޓުތަކަށް ނުވަދެވޭހެން، ބްލޮކް ކުރި މިއީ ފުރަތަމަ ފަހަރެވެ.
މިކަމާއި ގުޅޭގޮތުން ސަރުކާރުގެ ރަސްމީ އެއްވެސް އިދާރާއަކުން، އަދި އެއްވެސް ތަފްސީލީ މައުލޫމާތުތަކެއް ނުދެ އެވެ. އަދި މުއާސަލާތީ ކުންފުނިތަކުން ވެސް އެއްވެސް ވާހަކައެއް ދައްކާފައި ނުވާއިރު އެ ކުންފުނިތަކުގެ ނެޓްވޯކުތައް މެދުވެރިކޮށް މިހާރު އެފަދަ އެއްވެސް ވެބްސައިޓަކަށް ނުވަދެވެ އެވެ.
