ރާއްޖެއަށް ކުރަމުންދާ ވިއްސާރައިގައި ފާއިތުވި 24 ގަޑިއިރު ތެރޭގައި އެންމެ ގިނައިން ވާރޭ ވެހިފައިވާ ލ. ކައްދޫއަށް ކަމަށް މޫސުމާއި ބެހޭ ގައުމީ އިދާރާ މެޓު އޮފީހުން ބުނެފިއެވެ.
މެޓު އޮފީހުން ބުނި ގޮތުގައި އިއްޔެ ހެނދުނު 8:00 އިން ފެށިގެން މިއަދު ހެނދުނު 8:00 އާއި ހަމައަށް ކައްދޫއަށް ވަނީ 119 މިލިމީޓަރުގެ ވާރޭ ވެހިފައެވެ. ދެވަނައަށް އެންމެ ގިނައިން ވާރޭ ވެހިފައިވަނީ މާލެއަށެވެ. އެއީ 73.7 މިލިމީޓަރުގެ ވާރޭއެވެ.
މިހާރު ކުރަމުންދާ ވިއްސާރާގައި ގެއްލުން ލިބުނުކަމުގެ ރިޕޯޓުތައް، ފ. ނިލަންދޫ، ކ.ގުރައިދޫ، ލ.ގަން އަދި ފޮނަދޫ އާއި ސ.މަރަދޫއިން ވަނީ ލިބިފައި. އަދި ކ. ގުރައިދޫ ގެ 20 ގެއެއްގައި ފެންބޮޑުވެ 3 ގެއަކުން އެހެން ތަންތަނަށް ބަދަލުވެފައިވޭ
— NDMA Maldives (@NDMAmv) December 31, 2023
މާލެ ފިޔަވައި ދެން އެންމެ ގިނައިން ވާރޭ ވެހުނު ކަމަށް ރިކޯޑް ކުރެވިފައިވަނި އއ. ތޮއްޑުއާއި ހުޅުމާލޭގެ އިތުރުން ކާށިދޫއަށެވެ. ރާއްޖެއަށް މިހާރު ކުރަމުން އަންނަ ވިއްސާރާގައި ގިނަ ރަށްތަކުގައި ފެންބޮޑުވުމުގެ ހާދިސާތައް ވަނީ ހިނގާފައެވެ. ފެންބޮޑުވެފައިވާ ރަށްތަކުގައި ފެންހިންދުމުގެ މަސައްކަތް ކަމާއި ބެހޭ ފަރާތްތަކުން އަންނަނީ ކުރަމުންނެވެ.
ރާއްޖޭގެ މޫސުން ގޯސްވެފައިވާ މި ދަނޑިވަޅުގައި މޫސުމާއި ބެހޭ ގައުމީ އިދާރާ (މެޓް) އިން ވަނީ ބޯކޮށް ވާރޭވެހި ގުގުރުން އަދި ވިލާގަނޑުގައި ގަޑިއަކު 45 މޭލަށް ވައި ގަދަވެ، ކަނޑުތައް ގަދަވާނެ ކަމަށް ލަފާކޮށް ނ. އަތޮޅުން ފެށިގެން ލ. އަތޮޅާއި ހަމައަށް ހަވީރު 17:00 އާއި ހަމައަށް ވަނީ ރީނދޫ ސަމާލު ނެރެފައެވެ.